ကိုဖြူ။ ယနေ့ အိမ်မြေတွေကို အရပ်စာချုပ်နဲ့ပဲ ဝယ်နေကြတာတွေ့နေရတယ်ဆရာ။ အကျိုးအပြစ်ပြောပြပါ။
ယူတီကေ။ ဥပဒေအရ၊ ကျပ်တစ်သိန်းနဲ့အထက် မရွှေ့မပြောင်းနိုင်တဲ့ အိမ်မြေကိုဝယ်ရင်၊ တရားဝင်ဝယ်ယူခြင်းမြောက်အောင် ဘာတွေလုပ်ရမလဲဆိုတာ ဥပဒေမှာ ပြဋ္ဌာန်းထားတယ်။

(၁) စာချုပ်ချုပ်ရမယ်။
(၂) ဝယ်ယူတဲ့ တန်ဖိုးအလျောက်တံဆိပ်ခေါင်းထမ်းဆောင်ရမယ်။
(၃) စာချုပ်မှာ ရောင်းသူနဲ့ဝယ်သူတို့လက်မှတ်ထိုးရမယ်။
(၄) သက်သေ(၂)ယောက် လက်မှတ်ရေးထိုးရမယ်။
(၅) စာချုပ်ကို စာချုပ်စာတမ်းမှတ်ပုံတင်ရုံးမှာ မှတ်ပုံတင်ကြေးပေးဆောင်ပြီး မှတ်ပုံတင်ရမယ်။

ဒါမှသာ အပြည့်အဝ၊ တရားဝင်၊ ဥပဒေနဲ့အညီဝယ်ယူခြင်းဖြစ်ကြောင်း၊ ပစ္စည်းလွှဲပြောင်းခြင်းအက်ဥပဒေ၊ စာချုပ်စာတမ်း မှတ်ပုံတင်အက်ဥပဒေ၊ အခွန်တော်ခေါင်းအက်ဥပဒေ၊ ပဋိညာဉ်အက်ဥပဒေတွေမှာ ပြဋ္ဌာန်းထားတယ်။ ဒီလိုမှတ်ပုံတင်စာချုပ်နဲ့ ဝယ်ယူ ပြီးနောက် ပြန်လည်ရရှိလာတဲ့ မှတ်ပုံတင်စာချုပ်နဲ့ သက်ဆိုင်ရာမြေစာရင်း၊ မြို့တော်စည်ပင်ဌာနမှာ မိမိ ဝယ်ယူတဲ့မြေအမျိုး အစားအလျောက် အမည်ပြောင်း၊ ဂရန်အမည်ပေါက်ဖောက်ပေးဖို့ ဆက်လက်လုပ်ဆောင်ရပါတယ်။ ဘိုးဘွားပိုင်မြေဆိုရင် မိမိအမည်နဲ့ ဂရန်မြေဆိုရင် မိမိအမည်ပေါက်ဂရန်စာချုပ်နဲ့အတူ မြေစာရင်းပုံစံ (၁၀၅)မြေပုံ၊ မြေစာရင်းပုံစံ(၁၀၆)မြေရာဇဝင် ထွက်လာပါမယ်။ ဒါဆိုရင် မိမိကဝယ်ယူတဲ့ အိမ်မြေရဲ့ပိုင်ရေးဆိုင်ခွင့်ကို သက်သေခံစာချုပ် စာတမ်းများနဲ့အတူ ပိုင်ဆိုင်တယ်လို့ မှတ်ယူပါတယ်။

အပြည့်အ၀ တရားဝင် ဥပဒေနဲ့အညီဝယ်ယူခြင်းဟာ အပြည့်အ၀ တရားဝင်ပိုင်ဆိုင်ခွင့်ရရှိစေပါတယ်။ ကိုယ်ဝယ်ယူထား တဲ့ အိမ်မြေက နင်ထုတ်လို့မရဘူး။ သူများကျူးကျော်ဝင်ရောက်လို့မရဘူး။ ကိုယ်သေရင် ကိုယ့်ရဲ့အမွေခံများ ဆက်ဆံခွင့်ရကြ တယ်။ မသက်ဆိုင်သူများကို အိမ်မြေက နှင်ထုတ်လို့ရတယ်။ ကိုယ်က အခြားသူကို လွှဲပြောင်းရောင်းချလို့ရတယ်။ နောက်ဝယ် တဲ့သူဟာ တရားဝင်ပိုင်ဆိုင်ခွင့်ရတယ်။

ကိုဖြူမေးတဲ့ “အိမ်မြေတွေကို အရပ်စာချုပ်နဲ့ဝယ်ခြင်း” ဟာ အပြည့်အဝဆောင်ရွက်ခြင်း၊ ဝယ်ယူခြင်းမဟုတ်ဘူး။ တရားဝင်ဝယ်ယူခြင်း မမြောက်ဘူး။ အကြောင်းက -
(၁) စာချုပ်ဟာ မှတ်ပုံတင်စာချုပ်မဟုတ်ဘူး။ အရပ်စာချုပ်။
(၂) တံဆိပ်ခေါင်းခွန် (၇%) ထမ်းဆောင်မထားဘူး။
(၃) စာချုပ်ကို မှတ်ပုံတင်ကြေးပေးပြီး မှတ်ပုံတင်ရုံးမှာ မှတ်ပုံတင်မထားဘူး။ ရုံးမှာ စာချုပ်မရှိဘူး။
(၄) မြေစာရင်းနဲ့စည်ပင်ဌာနမှာ မိမိအမည်ပြောင်းလျှောက်ထားလို့မရဘူး။ မိမိအမည်ပေါက်နိုင်ဘူး။ ဂရန်မရနိုင်ဘူး။
(၅) မြေပုံ၊ မြေရာဇဝင်မှာ မိမိအမည်မပေါက်ဘူး။

ဒီလိုအရပ်စာချုပ်နဲ့သာ ဝယ်ယူထားခြင်းကို “တစ်ပိုင်းတစ်စဆောင်ရွက်ခြင်း” PART PERFORMANCE လို့ခေါ်တယ်။ အပြည့်အဝဆောင်ရွက်ထားခြင်းမဟုတ်တဲ့အတွက် ပိုင်ဆိုင်ခွင့်မရနိုင်ဘူး။ တစ်ပိုင်းတစ်စ အခွင့်အရေးသာရနိုင်တယ်။ မြေရဲ့ ပိုင်ဆိုင်ခွင့်အကြောင်း တရားရုံးမှာ အရေးဆိုလို့မရဘူး။ အကြောင်းကတော့ တရားဝင်ဝယ်ယူခဲ့ခြင်းမဟုတ်လို့ တရားဝင်ပိုင်ရေး ဆိုင်ခွင့်မရဘူး။ ပိုင်ရေးဆိုင်ခွင့်ကိုအကြောင်းပြုပြီးတော့ အိမ်မြေအပေါ်ကျူးကျော်သူကို နင်ထုတ်လို့မရဘူး။ ကိုယ်ကအခြားသူ ကို တရားဝင်ပြန်လည်ရောင်းချလို့မရဘူး။ ရောင်းချခဲ့ရင်လည်း ဝယ်သူဟာ တရားဝင်ပိုင်ရှင်အဆင့် မရနိုင်ဘူး။ ဒါပေမဲ့ ရောင်းသူက ကိုယ့်ကိုဒီမြေပေါ်ကနှင်ထုတ်လိုမှုဆိုလာရင်တော့ သူနဲ့ကိုယ်နဲ့ ချုပ်ဆိုထားတဲ့ အရပ်ကတိစာချုပ်ကို ရုံးတော်ကိုတင်ပြပြီး (ဒိုင်း)အဖြစ် ခုခံကာကွယ်နိုင်တယ်။ ကိုယ့်ကို နင်ထုတ်လို့မရဘူး။ ဒါကြောင့် “တစ်ပိုင်းတစ်စ ဆောင်ရွက်ခြင်း၊ ဝယ်ယူခြင်းဟာ ဓားအဖြစ်ထိုးခုတ်လို့မရဘူး။ ဒိုင်းအဖြစ်သာ ခုခံ ကာကွယ်နိုင်တယ်” ။ (PART PERFORMANCE IS A SHIELD, NOT A SWORD) လို့ ဥပဒေဆိုရိုးစကားရှိပါတယ်။ ဒါက ဥပဒေ ပြဋ္ဌာန်းချက်ကို တင်ပြရတာပါ။

ကနေ့စာချုပ်စာတမ်းမှတ်ပုံတင်ရုံးတွေမှာ အိမ်မြေအရောင်းအဝယ်မှတ်ပုံတင်စာချုပ်ချုပ်ဆိုကြတာ အတော်နည်းသွား တယ်။ (၉၀%)လောက် လျော့နည်းသွားတယ်လို့ ပြောကြတယ်။ ဒါပေမဲ့ အိမ်မြေတွေကတော့ နေ့စဉ်နဲ့အမျှ အရောင်းအဝယ် ဖြစ်နေကြတယ်။ သူတို့ ဘယ်လိုအရောင်းအဝယ်လုပ်နေကြပါတယ်။

တွေ့ရတာကတော့ ကနေ့ အိမ်မြေအရောင်းအဝယ်စာချုပ်နဲ့ ပတ်သက်လို့ ညွှန်ကြားချက်အရ

(၁) ရောင်းသူူ၊ ဝယ်သူဟာ အရောင်းအဝယ်စာချုပ်ကြမ်းတင်ပြရတယ်။
(၂) တန်ဖိုးစိစစ်တဲ့အဖွဲ့က အိမ်မြေရဲ့ ဇုန်နှုန်းသတ်မှတ်ချက်အရ တန်ဖိုးသတ်မှတ်တယ်။
(၃) အခွန်ရုံးက ဒီတန်ဖိုးအလျောက်ရောင်းသူ (၁၀%) ဝယ်ယူ (၃၀%) အခွန်ဆောင်ဖို့ ပြေစာထုတ်ပေးတယ်။ အခွန် ဆောင်ရတယ်။
(၄) အခွန်ဆောင်ပြီးမှ သတ်မှတ်တန်ဖိုးအတွက် တံဆိပ်ခေါင်း(၇%) ဝယ်ခွင့်ပြုတယ်။ ဝယ်ရတယ်။
(၅) နောက်စာချုပ်ကို မှတ်ပုံတင်ရုံးမှာ မှတ်ပုံတင်ကြေးပေးသွင်းပြီး မှတ်ပုံတင်ကြရတယ်။

ဥပမာအားဖြင့် – မြို့ထဲက အိမ်မြေတစ်ခုကို တန်ဖိုးကျပ်သိန်း (၁၀၀၀၀)နဲ့ ရောင်းကြ ဝယ်ကြတယ်ဆိုရင် -
(၁) ရောင်းသူအခွန် ကျပ်သိန်း (၁၀၀၀)
(၂) ဝယ်သူအခွန်း ကျပ်သိန်း (၃၀၀၀)
(၃) စာချုပ်ခေါင်းဖိုးကျပ် သိန်း (၇၀၀)

စုစုပေါင်းကျပ်သိန်း (၄၇၀၀) အရင်အစိုးရထံအရင်ပေးသွင်းမှ စာချုပ်ကို မှတ်ပုံတင်ရုံးကို တင်ပြလို့ရပါလိမ့်မယ်။ မှတ်ပုံတင်ကြေး၊ အခြားကုန်ကျစရိတ်၊ ရှေ့နေခ စတာတွေမပါသေးဘူး။ ပြီးတော့ မိမိအမည်ပေါက်ဂရန်၊ မြေပုံ၊ မြေရာဇဝင်ရဖို့ ထပ်ကုန်ကြရဦးမယ်။ ဒီလုပ်ထုံးလုပ်နည်းဟာ သက်ဆိုင်ရာက နောက်ဆုံးညွှန်ကြားတဲ့အခွန်နှုန်းထားနဲ့ လုပ်ထုံးလုပ်နည်းလို့ သိရပါတယ်။

ရောင်းမယ့်သူ၊ ဝယ်မယ့်သူတွေဟာ ဒီလောက်ငွေတွေ အစိုးရထံကြိုတင်ဆောင်ထားကြဖို့ အတော်နားချယူရဦးမယ် ထင် ပါတယ်။
ရောင်းသူဟာလည်း ရောင်းကြေးကျပ်သိန်း (၁၀၀၀၀)သာ ရမယ်။ ဒါပေမဲ့ ခွဲဝေယူရမယ့်မောင်နှမက (၅)ဦး အကြွေးတွေ ရှိသေးတယ်။ ဒီ(၅)ယောက်က မြို့ပြင်၊ မြို့သစ်မှာ အိမ်ငယ်လေးတစ်လုံးစီ ပြန်ဝယ်ကြရဦးမယ်။ မိဘရည်စူးပြီး အလှူအတန်းက လည်း လုပ်ချင်သေးတယ်။ ဒီတော့ သိန်း(၁၀၀၀) ရောင်းခွန်ဆောင်ဖို့တိုက်တွန်းရတာ အတော်ခက်ပါတယ်။

ဝယ်ယူဘက်ကလည်း ဝယ်ကြေးက ကျပ်သိန်း(၁၀၀၀၀)ပေးရမယ်။ ဝယ်ခွန်က ကျပ်သိန်း(၃၀၀၀)၊စာချုပ်ခေါင်းဖိုးကျပ် သိန်း(၇၀၀) အခြားရုံးကိစ္စ၊ မှတ်ပုံတင်ကြေး ရှေ့နေခ၊ အမည်ပြောင်း၊ အတွက်ကုန်ကျဦးမယ့်ငွေ၊ စုစုပေါင်း ကျပ်သိန်း(၄၀၀၀) ထက် မနည်းဘူး။ စုစုပေါင်း အိမ်မြေပိုင်ခွင့်ရဖို့အတွက် တန်ဖိုးက သိန်း(၁၀၀၀) + (၄၀၀၀) သိန်း (၁၄၀၀၀)ရှိမှ တရားဝင် ပိုင်ဆိုင်ခွင့်ရတော့မယ့် အခြေအနေပဲ။

အခွန်နှုန်းထားသစ်နဲ့ အိမ်မြေဝယ်သူတွေဟာ ကြောင်နဲ့ကြွက် လိုက်တန်းပြေးတမ်းကစားသလို အခွန်ရှောင်ဖို့ စဉ်းစား လာကြတယ်။ (၉၀%)က အိမ်မြေတွေကို ဘယ်လိုဝယ်နေကြသလဲ။

(၁) အရပ်ကတိစာချုပ်နဲ့ ငွေပြေချေဝယ်ယူတယ်။
(၂) ရောင်းသူဝယ်သူ လက်မှတ်ထိုး၊ သက်သေလက်မှတ်ထိုးကြတယ်။
(၃) အိမ်မြေကို ဝယ်သူလက်ရောက်ရယူတယ်။
(၄) အိမ်မြေရဲ့ပိုင်ရေးဆိုင်ခွင့်စာချုပ်၊ ဂရန်မူရင်းတွေဝယ်သူ ရယူတယ်။
(၅) ရောင်းသူဟာ ဒီအိမ်မြေနဲ့ မဆိုင်တော့ပါကြောင်း၊ ဝယ်သူကို ရောင်းချပြီးကြောင်း ကျမ်းကျိန်ချက် လုပ်ယူထား တယ်။
(၆) ရောင်းသူက ဝယ်သူကို (SPECIAL / GENERAL POWER) အထူးကိုယ်စားလှယ်စာ၊ အထွေထွေကိုယ်စားလှယ်ကို မှတ်ပုံတင်ရုံးမှာ လုပ်ပေးတယ်။ ဒါတွေကတော့ ကနေ့ လက်တွေ့ဖြစ်ပျက်နေတာပါ။
ကိုဖြူ။ အကျိုးအပြစ်ပြောပြပါ။

ယူတီကေ။ အမှန်တကယ်ဝယ်ဈေးက ကျပ်သိန်း(၁၀၀၀၀)ဖြစ်ပေမဲ့၊ တန်ဖိုးဖြတ်အဖွဲ့ရဲ့ သတ်မှတ်ချက်က (၁၅၀၀၀)/ (၂၀၀၀၀)သိန်းလို့ ဖြတ်လိုက်မှာကို။ ရောင်းသူဝယ်သူတွေက စိုးရိမ်နေကြတယ်။ ဖြစ်နိုင်တာပဲ။ ဒါဆိုရင် ကုန်ကျစရိတ်နဲ့အခွန် နှစ်ဆဖြစ်သွားမယ်။ ဒါကြောင့်ဝယ်သူတွေက အထက်ကအတိုင်းလုပ်ထားပြီး အခြေအနေစောင့်နေကြတယ်။ (၉၀%) အခွန်အခ မရဘဲ ဆိုင်းငံ့သွားတယ်။ နိုင်ငံတော်နစ်နာတယ်။
ကိုဖြူ။ အရပ်စာချုပ်နဲ့ဝယ်ထားတဲ့လူတွေကော ဘာဆုံးရှုံးနိုင်သလဲ။

ယူတီကေ ။ ဝယ်သူတွေအတွက် စာချုပ်ချုပ်ဆိုပေးတဲ့ ရှေ့နေတွေရှိပါတယ်။ ဝယ်သူမနစ်နာအောင် တတ်နိုင်သမျှတော့ အကုန်လုပ်ထားကြတာပါပဲ။ ဒါပေမဲ့ “ဘာမှမဖြစ်ရင်၊ ဘာမှမဖြစ်ပါဘူး။ ဖြစ်လာရင်တော့ ဘာမဆိုဖြစ်သွားနိုင်တယ်” ဆိုတဲ့ ဥပဒေရှိတယ်လေ။ ဥပမာ (S.P/GP) ပေးထားတဲ့သူ၊ ယူထားတဲ့သူ သေသွားရင်၊ ရူးသွားရင်၊ ပြန်ရုပ်သိမ်းရင် ပြဿနာစပေါ်တာ ပေါ့။ အမှုတွေဖြစ်လာရင်တော့ ရှေ့နေတွေအလုပ်ဖြစ်ကြတာပေါ့ဗျာ။ အခွန်ကောက်ခံသူ၊ အခွန်ထမ်းသူနှစ်ဦးနှစ်ဖက်စိတ်ဓာတ် MINDSET တွေပြင်ကြရင်တော့ ကောင်းသွားမှာပါ။

Ref : UTK

Posted By : Wai Phyoe Aung