ကျောင်းနေဘက် ငယ်သူငယ်ချင်း တစ်ဦးက သူငှားထားသည့် အိမ်ကို ခဏဝင်မည်ဆိုသဖြင့် စာရေးသူလည်း လိုက်ပါသွားမိသည်။

လမ်းတစ်လျှောက်၌ -

''အိမ်ငှားထားတာက တိုက်ခန်းလား''

''မဟုတ်ဘူးသူငယ်ချင်း။ အိမ်လုံးချင်းပါ။ ကိုယ်က သမီးနဲ့ နိုင်ငံခြားကို လိုက်သွားတော့ အိမ်ငှားထားခဲ့တာ သူငယ်ချင်း''

''အင်းလေ - ဇနီးက ကွယ်လွန်သွားပြီဆိုတော့  သမီးဆီအလည်အပတ်နေရတာပေါ့။ အိမ်ငှားတွေရှိသေးလား''

''အိမ်ငှားတွေက တစ်နေ့က ဆင်းသွားပြီ။ ဒါပေမယ့် အိမ်ထဲမှာ အမှိုက်တွေ၊ ပစ္စည်းတွေ အစုံပဲပစ်ထားခဲ့တော့ အလုပ်သမားကို ခေါ်ရှင်းရတယ်။ အခု အဲဒါဝင်ကြည့်မလို့''

''အေး၊ အိမ်ငှားထားရတာက ဝင်ငွေရတယ်ဆိုပေမယ့် မိမိပစ္စည်းလို သဘောထားပြီး နေဖို့လိုတယ်။ ဖြစ်သလို နေရင်တော့ အိမ်ပျက်စီးတာမျိုး ဖြစ်တတ်တယ်''

''ကိုယ်တိုင်လည်း မနေနိုင်တော့ အငှားတင်ထားလိုက်တာ သူငယ်ချင်း'' ဟု ပြောဆိုရင်းနှင့်ပင် အိမ်ရှေ့သို့ ရောက်လာကြသည်။

ခြံစည်းရိုးတံခါးကလည်း ရွဲ့စောင်းနေသည်။ တံခါးမကြီးဖွင့်လိုက်တော့ ဖုန်နံ့တွေက ဆီးကြိုနေပါသည်။ ပြူတင်း ပေါက်တံခါးနှစ်ချပ်ကို ဖွင့်လိုက်သည်။ ဖွဲ့ထားသည့် အခန်းအကာအရံကို ဖယ်ရှားထားသည်။

ဒီနေရာက အိပ်ခန်းဖွဲ့ထားတာ မဟုတ်လား။

''ဟုတ်တယ် သူငယ်ချင်း၊ အလုပ်ခန်းလုပ်ဖို့ဆိုပြီး အိပ်ခန်းအကာ အရံတွေကို ဖယ်ရှားလိုက်တယ် ပြောတယ်''

''အလုပ်ခန်းဖွင့်ဖို့ မူလကတည်းက ငှားတာလား''

''အစကတော့ မိသားစုငါးဦးနေမယ်ဆိုပြီး လာငှားတာပဲ''

''မိသားစုငါးဦးဆိုတော့ သေချာမေးမကြည့်ဘူးလား''

''သူတို့ လင်မယားရယ်၊ ကလေးနှစ်ယောက်နဲ့ မောင်တစ်ယောက်လို့ ပြောတယ်။ ယောကျ်ားက ကားပွဲစား အရောင်းအဝယ်လုပ်တယ် ပြောတယ်''

''ဒီနံရံမှာ အလုပ်ချိန်၊  လေ့ကျင့်ချိန်ဆိုပြီး ကပ်ထားပါလား''

''ဘာလုပ်ငန်းလုပ်တယ်တော့ မသိဘူး''

''ကြည့်ရတာတော့ ကိုယ်ကာယ အလှသင်တန်းဖွင့်ထားတယ်လို့ထင်ရတယ်''

''အေး၊ မီးခလုတ်တွေလည်း နေရာပြောင်းဆွဲထားတာတွေဖြစ်နေတယ်။ နောက်ဖေးကြည့်လိုက်မှ ရေချိုးခန်း တံခါးကလည်း ဆွေးပြီးပြတ် ကျလုဖြစ်နေတယ်။ ပြီးတော့ ခြံဝန်းထဲမှာ မီးစက်ထားဖို့ဆိုပြီး အဆောက်အအုံခိုင် ခိုင်မာမာဆောက်ထား တယ်''

ဟုတ်ပါသည်။ မိတ်ဆွေသူငယ်ချင်းပြမှ အိမ်ရှေ့ ခုနစ်ပေခန့်အကျယ်ရှိမည့် ကွန်ကရစ်ခင်းထားသည့် မြေနေရာ တွင် အုတ်ဖြင့်အဆောက်အအုံငယ်တစ်လုံးဆောက်ထားသည်ကို တွေ့လိုက်ရသည်။

အပေါ်ထပ်တက်ကြည့်လိုက်မှ ပို၍ ရင်မောရပေသည်။ အဆောက်အအုံမှာ အုပ်ညှပ်နှစ်ထပ်အိမ်ဖြစ်သည်။ အပေါ်ထပ်မှာ ပျဉ်ကာထားပြီး သစ်သားကြမ်းခင်းဖြစ်သည်။ အပေါ်ထပ်၌ အခန်းများ ထပ်မံတိုး ချဲ့ဖွဲ့ထားသည် ကို တွေ့ရသည်။

''မူလကတည်းက အပေါ်ထပ်မှာ အခုလို အခန်းတွေ ဖွဲ့ထားသလား''

''မဟုတ်ဘူး။ အိပ်ခန်းတစ်ခန်းအဖြစ် ရှေ့ပိုင်းကွက်လပ်ထားပြီး နောက်ပိုင်းကို အပြည့်ကာထားတာ''

''အခုက အခန်းလေးခန်းဖွဲ့ထားတော့၊ မူလပုံစံကို ဖျက်ပြီးလုပ်ထားတာပဲ၊ ငှားစဉ်က စာချုပ် သေချာမချုပ်ဘူး လား''

''ကိုယ်တိုင်က နိုင်ငံခြားရောက်နေတော့ အိမ်ပွဲစားလုပ်နေတဲ့ ညီမတစ်ဝမ်းကွဲကို အပ်ထားခဲ့တာ။ ဥပဒေက ဘယ်လိုရှိတယ်ဆိုတာ ပြောပြပါဦး ဗဟုသုတရှိထားမှ ဖြစ်မယ်''

ထို့နောက်စာရေးသူတို့ သူငယ်ချင်းနှစ်ယောက်သည် တောင်ဥက္ကလာပမြို့နယ် ရတနာလမ်းထောင့်ရှိ ချစ်တီး ထမင်းဆိုင်တွင် ထိုင်ဖြစ်ကြသည်။

''ထမင်းလည်းစား၊ ဥပဒေ ဗဟုသုတလည်း မျှဝေပါဦး''ဟု သူငယ်ချင်းက စကားစလိုက်ပါသည်။

''အခုငှားရမ်းထားတာ ဘယ်လောက်ကြာသွားသလဲ''

''အစက ခြောက်လအတွက် ငှားတယ်။ ခြောက်လပြည့်တော့ နောက်ခြောက်လထပ်ငှားပါဆိုလို့ တစ်နှစ်ဖြစ် သွားတယ်''

''ငှားရမ်းခကတော့ ခြောက်လပြည့်ပြီး အပြောင်းအလဲရှိသေးလား''

''မရှိဘူး။ သုံးသိန်းကျပ်နဲ့ ငှားတာ''

''ပစ္စည်းလွှဲပြောင်းခြင်း ဥပဒေ၊ ပုဒ်မ ၁ဝ၈ မှာ အငှားချထားသူနဲ့ ငှားယူသူတို့ရဲ့ အခွင့်အရေးတာဝန်တွေကို ပြဋ္ဌာန်းထားတယ်။ အငှားစာချုပ်မှာလည်း ငှားရမ်းခြင်းကာလ တစ်နှစ်ထက်ကျော်လွန်ပြီး အငှားချထားမယ် ဆိုရင် စာချုပ်စာတမ်းမှတ်ပုံတင်ဥပဒေအရ မှတ်ပုံတင်စာချုပ် ပြုလုပ်ချုပ်ဆိုရမှာ ဖြစ်တယ်''

''တစ်နှစ်အောက်ကာလအတွက်  ငှားရမ်းခြင်းဆိုရင် မှတ်ပုံတင်စာချုပ်မပြုလုပ်ဘဲ အရပ်ကတိစာချုပ်နဲ့ ရတယ်မ ဟုတ်လား''

''ရပါတယ်။ ဒါပေမယ့် အိမ်ငှား ကတိစာချုပ်မှာ ပြည့်ပြည့်စုံစုံထည့်ဖို့ လိုတယ်။ အထူးသဖြင့် ဥပဒေနဲ့ ငြိစွန်း သည့် လုပ်ငန်းတွေ မလုပ်ဖို့ ကတိစာချုပ်ပါအတိုင်း လူနေရုံ သက်သက်ဖြစ်ပြီး၊ လူပိုထပ်ဆောင်းတင် ခွင့်မရှိ ခြင်း၊ ထပ်ဆင့်အငှားချထားခြင်းမျိုး မပြုလုပ်ဖို့ တားမြစ်ကြောင်း ကတိစာချုပ်မှာ ထည့်သွင်းထားဖို့ လိုတယ်''

အခုလို အိပ်ခန်းတွေ ပြန်လည် ဖွဲ့စည်းပြုလုပ်ခွင့်မရှိဘူး မဟုတ်လား''

''ပစ္စည်းလွှဲပြောင်းခြင်း ဥပဒေ ပုဒ်မ ၁ဝ၈ (တ) မှာ အိမ်ငှားသည် မိမိငှားရမ်းထားသော ပစ္စည်းကို ပိုင်ရှင်၏ ခွင့်ပြုချက်မရဘဲ ခိုင်မြဲသော အဆောက်အအုံကို မဆောက်လုပ်ရလို့ သတ်မှတ်ပြဋ္ဌာန်းထားတယ်။ ထပ်ခိုးကဲ့သို့ ကြီးမားခိုင်မြဲတဲ့ အထပ်များ မပြုလုပ်ရဘူး။ အခန်းများဖွဲ့ရာတွင် မူလငှားရမ်းထားသည့် အခန်းများကို ခေတ္တခဏအနည်းငယ်သာ ပြောင်းလဲပြုလုပ်ထားခြင်း မဟုတ်ဘဲ ယခင်ထားရှိသည့် အခန်းများနှင့် မတူအောင် များစွာပြုပြင်ပြောင်းလဲထားခြင်းသည် အိမ်ငှားတာဝန်ဖောက်ဖျက်ခြင်းဖြစ်တယ်လို့ မောင်ခင်မောင်နှင့် ဒေါ်လှ ရင် ၁၉၄၈ ခုနှစ် မြန်မာနိုင်ငံတရား စီရင်ထုံး စာမျက်နှာ - ၄၈၁ အမှုနဲ့ အေရာဟင်ဆီလော့နှင့် ဒေါ်အမာဂျန်ပါ ၁၉၆၅ ခုနှစ် မြန်မာနိုင်ငံ တရားစီရင်ထုံး စာမျက်နှာ - ၄ဝ၆ အမှုတွေမှာ ဆုံးဖြတ်ထားတယ်''

''အဲဒီလို တာဝန်ပျက်ကွက်ရင် အိမ်ရှင်က ဘယ်လိုဆောင်ရွက်ခွင့်ရသလဲ''

ဥပဒေအရတော့ အိမ်ငှားကို ငှားရမ်းခြင်းဖြတ်တောက်ပြီး အိမ်မှ နှင်ပိုင်ခွင့်ရှိမှာဖြစ်တယ်။ အခြား အဓိကအချက် ကတော့ အိမ်ငှားက အိမ်ရှင်ကို အိမ်ပြန်အပ်တဲ့အခါ မူလပုံစံအတိုင်း ပြန်လည်အပ်ရမယ်လို့ ပစ္စည်းလွှဲပြောင်း ခြင်းဥပဒေပုဒ်မ ၁ဝ၈ (ဇ) မှာ ပြဋ္ဌာန်းထားတဲ့အတွက် ကြမ်းခင်းပေါက်နေမယ်၊ မျက်နှာကြက်ပြုတ်နေမယ် စတာ တွေရှိရင် ပြုပြင်ပြီးထားခဲ့ရမှာဖြစ်တယ် သူငယ်ချင်း''ဟု အကြံပြုဆွေးနွေးလိုက်ပါသည်။

Ref : Zaygwet ထီယု (ဥပဒေအတိုင်ပင်ခံ)

Photo Credit : Freepik

Posted By : Sint Sint (ShweProperty.com)