Pirates of the Caribbean ဇာတ်လမ်းတွဲရဲ့ ကမ္ဘာကျော်မင်းသား  Johnny Depp နဲ့ Aquaman မင်းသမီး Amber Heard တို့ရဲ့ ခမ်းနားကြီးကျယ်လှတဲ့ ဇိမ်ခံအိမ်ကြီးကို ဘယ်လိုတွေဖွဲ့စည်းတည်ဆောက်ထားလဲဆိုတာ ပရိသတ်တွေလည်းသိချင်ကြမယ်ထင်ပါတယ်။ကိုယ့်ရဲ့အဖိုးတန်အိမ်လေးကို ဘယ်လိုမျိုး ဖွဲ့စည်းတည်ဆောက်ရမလဲဆိုတာ စဉ်းစားနေတဲ့သူတွေရှိရင်လည်း Johnny Depp နဲ့ Amber Heard တို့ရဲ့ဇိမ်ခံအိမ်ကြီးအကြောင်း ဖတ်ရှုလေ့လာကြည့်လိုက်ပါဦးနော် 



အိမ်ရဲ့တည်နေရာ

Johnny Depp နဲ့ Amber Heard တို့ရဲ့ဇိမ်ခံအိမ်ကြီးဟာ သြစတေးလျနိုင်ငံ၊ Queesland ပြည်နယ်၊Coomera မြို့မှာ တည်ရှိပြီး အိမ်ပတ်ပတ်လည်မှာ အဆုံးမရှိ စိမ်းစိုလန်းဆန်းတဲ့သစ်ပင်ပန်းမန်တွေနဲ့ ဝန်းရံနေပါတယ်။Johnny Depp ဟာ ဧက ၄၀ ကျယ်ဝန်းတဲ့ ဒီဇိမ်ခံအိမ်ကြီးကို ၂၀၁၅ ခုနှစ်  “Pirates of the Caribbean 5" ရိုက်ကူးစဉ်က ငှားရမ်းခဲ့တာဖြစ်ပြီး ထိုဇိမ်ခံအိမ်ကြီးရဲ့ပိုင်ရှင်ဟာ Motorcycling Champion Mick Doohan ဖြစ်တယ်လို့သိရပြီး  သူစတင်ဝယ်ယူချိန်မှာ ဒေါ်လာ ၁.၇ သန်းသာ ရှိခဲ့ပေမဲ့ လက်ရှိပေါက်ဈေးဟာတော့  ဒေါ်လာ ၂၇သန်းနီးပါးရှိနေပြီဖြစ်ပါတယ်။

ကားပါကင်

အိမ်အဝင်လမ်းဟာလည်း ကြီးမားကျယ်ပြန့်ပြီး ကားပါကင်ဟာဆိုရင် ကား၆ စီးခန့်ဆန့်ပါတယ်။အိမ်အပြင်ဘက် အပြင်အဆင်ကိုကြည့်မယ်ဆိုရင် တစ်အိမ်လုံးကို အဖြူရောင်အုတ်တွေ၊ကြွေပားတွေနဲ့ ဆင်ယင်ထားတာ မြင်တွေ့ရပါတယ်။

အတွင်းပိုင်းဖွဲ့စည်းပုံ

အိမ်အတွင်းဘက်ဖွဲ့စည်းပုံကိုကြည့်မယ်ဆိုရင်တော့ Johnny Depp နဲ့ Amber Heard တို့ရဲ့အိမ်ထဲမှာ  အိပ်ခန်း ၁၀ ခန်း ၊ ရေချိုးခန်း ၁၀ ခန်း ၊ ဧည့်တွေ့ခန်း၊ဧည့်ခန်းကျယ်ကြီး၊ထမင်းစားခန်း၊ရုပ်ရှင်ရုံ၊ဂိမ်းကစားခန်း၊အားကစားခန်း၊ဘား၊ရုံးခန်း၊ဝိုင်သိုလှောင်ခန်းစတဲ့အခန်းပေါင်းမြောက်မြားစွာရှိတဲ့အပြင် ဓာတ်လှေကားလည်းပါဝင်ပါတယ်။အပြင်ဘက်ခြံဝန်းမှာဆိုရင်လည်း ရေကူးကန်နဲ့တင်းနစ်စ်ကစားကွင်း ၊ Spa ၊ Go-Kart ကားပြိုင်ကွင်းနဲ့ ဟယ်လီကော်ပတာကွင်းလည်းရှိတယ်လို့သိရပါတယ်။


အိမ်အတွင်းမှာလည်း အုတ်အဖြူရောင်၊ကြွေပြားအဖြူရောင်တွေနဲ့ ဖွဲ့စည်းထားတာကို အများဆုံးတွေ့ရပြီး ဒုတိယထပ်မှာရှိတဲ့ ထမင်းစားခန်းတစ်ခန်းလုံးကို အဖြူရောင်တွေနဲ့ မဟော်ဂနီရောင်ကိုသုံးပြီး အလှဆင်ထားတာဖြစ်ပါတယ်။ထမင်းစားခန်းမှာဆိုရင် မဟော်ဂနီရောင်တောက်နေတဲ့ မီးဖိုချောင်ဗီရိုတွေ၊ထမင်းစားစားပွဲတွေ၊အနက်ရောင်သားရေခင်းထားတဲ့ထမင်းစားခုံတွေရှိနေပါတယ်။

အိပ်ခန်းနှင့်ဇိမ်ခံခန်းမများ

Johnny Depp နဲ့ Amber Heard တို့ရဲ့အိမ်ကြီးထဲမှာ အကောင်းဆုံးအိပ်ခန်းလို့ဆိုရမယ့် အိပ်ခန်းကျယ်ငါးခန်းရှိပြီး  သီးသန့်လသာဆောင်များလည်း ပါရှိပါတယ်။အနားယူအပန်းဖြေဖို့အတွက် ပြင်ဆင်ထားတဲ့ရုပ်ရှင်ရုံအခန်းထဲမှာဆိုရင်လည်း အရည်အသွေးမြင့်တီဗီ ၊ တန်ဖိုးကြီးအညိုရောင်ဆိုဖာနှစ်လုံးနဲ့ ဖွဲ့စည်းထားပါတယ်။

အိမ်မှာရှိတဲ့ အိပ်ခန်းတိုင်းကနေ လှမ်းမျှော်ကြည့်လိုက်ရင် အစိမ်းရောင်မြက်ခင်းပြင်တွေ၊စိမ်းစိုနေတဲ့သစ်ပင်၊သစ်တောတွေကို မြင်တွေ့ရပြီး အိပ်ခန်းတိုင်းရဲ့နံရံတစ်ဖက်စီမှာ အနက်ရောင်နဲ့မြစိမ်းရောင်အရော လှပတဲ့ လိုက်ကာခန်းဆီးများနဲ့ အလှဆင်ထားပါတယ်။အိပ်ခန်းတွေထဲက တစ်ခန်းမှာတော့ အသုံးအဆောင်ပစ္စည်းတွေ၊ပရိဘောဂတွေသိပ်မရှိပဲ မဟော်ဂနီရောင်သစ်သားခင်းကိုအောက်ခံထားထားတဲ့ ကုတင် ၊ အစိမ်းရောင်ဆိုဖာရှည်တစ်လုံး ၊အနှိပ်ခုံတစ်လုံးနဲ့ပဲ ဖွဲ့စည်းထားတယ်လို့သိရပါတယ်။

Johnny Depp နဲ့ Amber Heard  တို့ရဲ့ဇိမ်ခံအိမ်ကြီးဟာ အဖြူရောင်အုတ်၊အဖြူရောင်ကြွေပြား တွေနဲ့ မဟော်ဂနီရောင်သစ်သားတွေကိုအများဆုံးသုံးပြီး ဖွဲ့စည်းတည်ဆောက်ထားတာဖြစ်လို့ ရိုးရိုးရှင်းရှင်းလေးနဲ့ မျက်စိအေးပြီးလှပတဲ့ဒီဇိုင်းအသွင်အပြင်ပဲဖြစ်ပါတယ်။

မိတ်ဆွေတို့အနေနဲ့ရော ကိုယ့်ရဲ့အိမ်လေးကို အလှဆင်တော့မယ်ဆိုရင် ဘယ်လိုဒီဇိုင်းမျိုး၊ဘယ်လိုအရောင်မျိုးတွေကို ကြိုက်နှစ်သက်လဲ။ 

ဖတ်ရှုမှုအများအဆုံး အိမ်ခြံမြေဗဟုသုတများ

နာမည်ကျော်အားကစားသမားတွေ ပိုင်ဆိုင်တဲ့ တန်ဖိုးအကြီးဆုံး စံအိမ်ကြီးတွေ

သင်ကြားရေးကိုပျော်စရာဖြစ်စေသည့် အိမ်တွင်း လုပ်ဆောင်ချက် (၁၀)ချက်

ဆယ်လ်လီတွေ ပိုင်ဆိုင်တဲ့ တန်ဖိုးအကြီးဆုံး စံအိမ်ကြီး ၅ လုံး

ကမ္ဘာကျော်ဘောလုံးသမားတွေ ပိုင်ဆိုင်တဲ့ တန်ဖိုးအကြီးဆုံး အိမ် ၅ လုံး

Posted By : Ra Wai (ShweProperty.com)