ဘီယာကို သောက်သုံးရုံတင်မဟုတ်ဘဲ အိမ်မှာ အသုံးဝင်တဲ့နည်းလမ်းတွေ ရှိတယ်ဆိုတာကို သင်သိပါသလား။

အများစုအတွက် အပန်းဖြေဖို့ သောက်တတ်တဲ့ အယ်လ်ကိုဟောပါတဲ့ သောက်စရာ တစ်မျိုးဖြစ်တဲ့ ဘီယာမှာ သင်မသိသေးတဲ့ အခုလိုအသုံးဝင်မယ့် အကျိုးကျေးဇူးတွေရှိပါတယ်။

ဘီယာနဲ့ သန့်ရှင်းရေး၊ အလှအပနဲ့ ကျန်းမာရေးအတွက် အံ့ဖွယ်အသုံးဝင်ပုံတွေထဲကမှ ဒီတစ်ခေါက်မှာတော့ ဘီယာနဲ့ လုပ်လို့ရတဲ့ ထူးခြားတဲ့နည်းလမ်းတွေကို မျှဝေပေးသွားမှာပါ။

၁. ဆံပင်ထိန်းသိမ်းမှုမှာ အထောက်အကူဖြစ်ခြင်း

ဘီယာမှာပါတဲ့ ဗီတာမင် B နဲ့ ပရိုတင်းဓာတ်တွေက ဆံပင်ကို အာဟာရဖြည့်ပေးပြီး ပိုမိုပျော့ပျောင်းတောက်ပလာအောင် ကူညီပေးနိုင်ပါတယ်။ ဘီယာအနည်းငယ်ကို ရေနဲ့ရောပြီး ဆံပင်ဆေးကြောပြီးနောက် လိမ်းပေးကာ မိနစ်အနည်းငယ်ထားပြီး ရေနဲ့ဆေးချလိုက်ပါက ဆံပင်က ပိုမိုသန်စွမ်းပြီး တောက်ပနေမှာပါ။

 ၂. အစွန်းအထင်းဖယ်ရှားရာမှာ အသုံးဝင်ခြင်း

ဘီယာရဲ့ ကာဗွန်နိတ်ဓာတ်နဲ့ အရက်ဓာတ်က အဝတ်ပေါ်က အစွန်းအထင်းတချို့ကို ဖယ်ရှားဖို့ အထောက်အကူဖြစ်စေပါတယ်။ ကော်ဖီအစွန်းလို ဖယ်ရှားရခက်တဲ့ အစွန်းတွေကို ဘီယာအနည်းငယ်နဲ့ ညင်သာစွာ ပွတ်တိုက်ပြီး ရေနဲ့ဆေးလိုက်ရင် အံ့သြဖွယ်ကောင်းလောက်တဲ့ ရလဒ်ကို တွေ့ရမှာပါ။

၃. ပရိဘောဂတွေကို သန့်ရှင်းရာမှာ အသုံးဝင်ခြင်း

သစ်သားပရိဘောဂတွေကို ဘီယာနဲ့ သန့်ရှင်းလို့ရပါသေးတယ် ။ ဘီယာကို အဝတ်စတစ်ခုပေါ်မှာ လောင်းပြီး သစ်သားစားပွဲတွေ၊ ကုလားထိုင်တွေကို ပွတ်တိုက်ပေးလိုက်မယ်ဆိုရင် ဘီယာထဲက အရက်ဓာတ်က ဖုန်တွေကို ဖယ်ရှားပေးပြီး သစ်လွင်တောက်ပသွားမှာဖြစ်ပါတယ်။

၄. ဥယျာဉ်ခြံထဲက ပိုးမွှားတွေကို ဖယ်ရှားရာမှာ အထောက်အကူဖြစ်ခြင်း

ဘီယာကို အနည်းငယ်ခွက်ထဲထည့်ပြီး ဥယျာဉ်ထဲမှာ ထားထားရင် ခရုတွေ၊ ပိုးကောင်တွေလို အပင်တွေကို ဒုက္ခပေးတတ်တဲ့ ပိုးမွှားတွေကို ဖယ်ရှားဖို့ အထောက်အကူပြုနိုင်ပါတယ်။ ဘီယာရဲ့ အနံ့က သူတို့ကို ဆွဲဆောင်ပြီး အပင်တွေကို ကာကွယ်ပေးနိုင်တဲ့ သဘာဝနည်းလမ်းတစ်ခုလည်းဖြစ်ပါတယ်။

၅. မီးဖိုချောင်သုံး သတ္တုပစ္စည်းတွေကို သန့်ရှင်းနိုင်ခြင်း

ဘီယာရဲ့ အက်စစ်ဓာတ်က သံချေးတက်တာ ဒါမှမဟုတ် ညစ်ပတ်နေတဲ့ သတ္တုမျက်နှာပြင်တွေကို သန့်ရှင်းဖို့အတွက် သုံးရမှာ အထောက်အကူပြစေပါတယ်။ သံချေးတကနေတဲ့ မီးဖိုချောင်က ဒယ်အိုးတွေ၊ ဇွန်းတွေကို ဘီယာနဲ့ စိမ်ပြီး ပွတ်တိုက်ရင် သံချေးတွေကို ဖယ်ရှားပြီး ပြန်လည်တောက်ပြောင်လာအောင် လုပ်ပေးနိုင်ပါတယ်။

ဘီယာကို သောက်ဖို့အတွက်တင်မဟုတ်ဘဲ ဆံပင်ထိန်းသိမ်းတာကစလို့ ပိုးမွှားအန္တရာယ်ကာကွယ်တာအထိ သင့်အိမ်အတွက် မမျှော်လင့်ထားတဲ့ အကူအညီလေတွေရရှိစေလို့ နောက်တစ်ကြိမ် ဘီယာဝယ်တဲ့အခါ ဒီနည်းလမ်းတွေနဲ့ အိမ်မှာအကျိုးရှိရှိအသုံးချကြည့်ပါ။