ကျောက်ဖြူမြို့မှ ခုနစ်မိုင်အကွာအဝေး၌ ပင်လယ်ရေပြာပြာများဝိုင်းရံထားသည့် ကျောက်ဆောင်ကျောက်တန်းများ ကြားတွင် ရခိုင်တိုင်းရင်းသားအများစု နေထိုင်သော မဒေးကျွန်းတည်ရှိနေသည်။ ကျွန်းပေါ်ရှိဒေသခံများသည် မိရိုးဖလာလယ်ယာစိုက်ပျိုးရေးနှင့် တံငါလုပ်ငန်းကို အဓိက လုပ်ကိုင်ကြသည်။


သို့သော် လွန်ခဲ့သည့်နှစ်အနည်းငယ်အတွင်း မဒေးကျွန်းသားများအတွက် အိပ်မက်ဆိုးတစ်ခုကဲ့ သို့ ခြောက်လှန့်ခံရမည့် စီမံကိန်း တစ်ခုပေါ်လာခဲ့သည်။ အမေရိကန်ဒေါ်လာ နှစ်ဘီလီယံခွဲခန့် တန်ဖိုးရှိ ကမ္ဘာ့(၁၁)ခုမြောက် အကြီးဆုံး ရေနက်ဆိပ်ကမ်းစီမံကိန်းတစ်ခု ဖြစ်သည်။

ထိုစီမံကိန်းကြောင့် ဒေသခံ တိုင်းရင်းသားများ၏ လယ်ယာမြေ အမြောက်အမြား သိမ်းဆည်းခံခဲ့ရသည်။ တံငါလုပ်ငန်းဖြင့် အသက်မွေးဝမ်းကျောင်း ပြုလုပ်သူများသည် အရှေ့အာရှနှင့် အာဖရိကမှ ရေနံတင်သင်္ဘောကြီးများ၏  ရေလမ်းအသုံးပြုခြင်းကြောင့် တံငါလုပ်ငန်းများ ပျက်စီးပြီး လူမှုစီးပွားထိခိုက်လာခဲ့ကြောင်း ဒေသခံများက ပြောသည်။

 ရေနက်ဆိပ်ကမ်းစီမံကိန်း မပြီးဆုံးသေးမီမှာပင် အစိုးရက နောက်ထပ်စီမံကိန်းတစ်ခု ဖော်ဆောင်ရန် စီစဉ်လာခဲ့သည်။ ထို စီမံကိန်းမှာ ကျောက်ဖြူအထူးစီး ပွားရေးဇုန်စီမံကိန်းဖြစ်သည်။ အထူးစီးပွားရေးဇုန် စီမံကိန်းလျာထားချက်တွင် ရေနက်ဆိပ်ကမ်း စီမံကိန်း၊ စက်မှုဇုန်စီမံကိန်းနှင့် အိမ်ရာစီမံကိန်းများပါဝင်သည်။ မူလအစတွင် မဒေးကျွန်းပေါ်ရှိ စစ်တောကျေးရွာနှင့် စည်မော်ကျေး ရွာအနီး မြေဧက ၁,၀၀၀ ကျော်၌ တည်ဆောက်ရန် စီစဉ်ခဲ့သော်လည်း ရွှံ့မီးတောင်ကြောင့် မူလနေရာ၏ အနောက်မြောက်ဘက်သ့ို နေရာပြောင်းရွှေ့ခဲ့သည်။ စုစုပေါင်းမြေဧက ၄,၀၀၀ ကျော် တိုးချဲ့သတ်မှတ်ခဲ့ခြင်းဖြစ်သည်။

 ရေနက်ဆိပ်ကမ်းကို မဒေးကျွန်းတွင် လက်ရှိ ရှိနေသည့် တရုတ်ရေနက်ဆိပ်ကမ်းနှင့် ကပ်လျက်ကမ်းခြေ၌ တည်ဆောက်မည်ဖြစ်ပြီး အထူးစီးပွားရေးဇုန်အောက်ရှိ စက်မှုဇုန်ကို ကျောက် ဖြူမြို့စွန်ရှိ မင်းပြင်ရွာ၊ မင်းတက် တောင်ရွာအနီး တည်ဆောက်မည် ဖြစ်သည်။

အထူးစီးပွားရေးဇုန်၊ စက်မှုဇုန်တည်ဆောက်ရန် ကျေးရွာ ၄၀ ခန့်နှင့် ကျောက်ဖြူမြို့ပေါ်ရှိ နေအိမ်အချို့ ဖယ်ရှားခံရမည်ဖြစ် သည်။ ဖယ်ရှားခံရမည်ဟု သတ် မှတ်ထားသည့် ကျေးရွာများတွင် မြေယာဆုံးရှုံးခံရမည်ကိုစိုးရိမ်နေပြီး အထူးသဖြင့် မဒေးကျွန်းပေါ်ရှိ ရွာ သားများအတွက် ၎င်းတို့လယ်ယာ မြေများနှင့်ပတ်သက်၍ နောက် ထပ်အိပ်မက်ဆိုးတစ်ခု ဖြစ်လာခဲ့ သည်။

‘‘ဒီစီးပွားရေးဇုန်က ကျွန်တော်တို့ အလုပ်အကိုင်တွေရမယ်ဆိုတာကိုလည်း ယုံကြည်ပါတယ်။ ဒီဒေသမှာ အလုပ်အကိုင်လည်း ရှားတယ်။ အခုလုပ်နေတဲ့ ရေနံ ပိုက်လိုင်းတရုတ်ကုမ္ပဏီလို ပရမ်းပတာလုပ်မယ်ဆိုရင် လက်မခံနိုင်ဘူး’’ဟု ကျောက်ဖြူမြို့မှ ကိုရဲနိုင် က ပြောသည်။

လက်ရှိ ကျောက်ဖြူရေနက်ဆိပ်ကမ်းကို တရုတ်အစိုးရ ကျောထောက်နောက်ခံပြုသည့် China national Petroleum Corporation(CNPC) က လုပ်ကိုင်ခွင့်ရရှိခဲ့ ပြီး တရုတ်နိုင်ငံသို့ ရေနံတင်သွင်း မှု ၈၀ ရာခိုင်နှုန်းခန့်ကို ယင်းဆိပ်ကမ်းမှ တစ်ဆင့် တင်သွင်းရန် တရုတ်ဘက်က စီစဉ်ထားခြင်းဖြစ်သည်။ ယင်းဆိပ်ကမ်းမှ ၃၂ လက်မ အချင်းရှိသည့် ရေနံပိုက်လိုင်းဖြင့် တရုတ်နိုင်ငံ ယူနန်ပြည်နယ်သို့ မိုင်ငါးရာကျော် သွယ်တန်းထားပြီး မြန်မာနိုင်ငံမှ ပြည်နယ်နှင့် တိုင်းဒေသကြီး လေးခုသို့ ဖြတ်ကျော်ပြီး မြန်မာနိုင်ငံကို ကန့်လန့် ဖြတ်သွယ်တန်းထားသည်။

 ရေနက်ဆိပ်ကမ်းနှင့် မြန်မာ -တရုတ် ရေနံပိုက်လိုင်းကို ယခုနှစ် ဇန်နဝါရီ ၃၀ ရက်တွင် စတင် ဖွင့်လှစ်ခဲ့ပြီး တရုတ်နိုင်ငံသို့ နေ့ စဉ်ရေနံစိမ်းတန်ချိန် ၂၂ သန်း ပို့လွှတ်နေသည်။ ရေနံပိုက်လိုင်းနှင့် အတူ ရွှေကမ်းလွန်ရေနံနှင့်သဘာ ဝဓာတ်ငွေ့လုပ်ကွက်မှ ထွက်ရှိ သည့် သဘာဝဓာတ်ငွေ့များကို တရုတ်နိုင်ငံသို့ ပို့လွှတ်ရန် မိုင်ပေါင်း ၁,၅၀၀ ကျော် ရှည်လျား သည့်  သဘာဝဓာတ်ငွေ့ပိုက်လိုင်းကို ၂၀၁၃တွင် စတင်ဖွင့်လှစ်ပြီး ဓာတ်ငွေ့များ  ပို့လွှတ်နိုင်ခဲ့သည်။ ၂၀၁၃ အတွင်း ၁ ဒသမ ၈၇ ဘီလီယံ ကုဗမီတာကို တရုတ်ကို စတင်ပို့လွှတ်နိုင်ခဲ့သည်။ ယင်း ပိုက်လိုင်းနှစ်ခုအတွက် ပိုက်လိုင်း ဖြတ်သန်းခတစ်နှစ်လျှင် ဒေါ်လာ ၁၃၈ သန်းရသည်ဟု ပိုက်လိုင်း သွယ်တန်းရေး လုပ်ဆောင်ပေးသည့် အရှေ့တောင်အာရှ ဂက်စ် ပိုက်လိုင်းကုမ္ပဏီ  (SEAOP, SEAGP) မှ လူထုဆက်ဆံရေးအ ရာရှိ မစ္စတာ Zhang က ပြော သည်။

 ရေနံပိုက်လိုင်းစတင်ပို့လွှတ် သည့် အခမ်းအနားတွင် တရုတ် ကုမ္ပဏီဘက်က ၂၀၁၂ မှ စ၍ ကန်ဒေါ်လာ ၁၃ ဒသမ ၂၆ သန်း အကုန်အကျခံ ကျန်းမာရေး၊ စာသင်ကျောင်း၊ ဆေးပေးခန်း၊ ရေကန်၊ လျှပ်စစ်မီး၊ လမ်းပန်း ဆက်သွယ်ရးအကူအညီပေးမည် ဟု ပြောကြားခဲ့သည်။ သို့သော် လည်း လက်ရှိအချိန်ထိ မဒေး ကျွန်းအပါအဝင် နေရာအများစုတွင် မြေယာလျော် ကြေးအပါအ ဝင်ကုမ္ပဏီဘက်က ပေးထားသည့် ကတိကဝတ်များ ဖောက်ဖျက်နေ ကြောင်း ဒေသခံများက ပြော သည်။

‘‘အရီးပိုင်လယ်မြေ ၁၀ ဧက လောက် အရင်တရုတ်စီမံကိန်းမှာ ပါသွားတယ်။ လျော်ကြေးက အခုထိ ခြောက်သိန်းပဲရသေးတယ်’’ဟု မဒေးကျွန်းမှ ရေနံတင်ရေနက်ဆိပ်ကမ်းစီမံကိန်းကြောင့် မြေယာများ ဆုံးရှုံးခဲ့သည့် အသက် (၆၀)ကျော် အမျိုးသမီးက ပြောသည်။

ရေနက်ဆိပ်ကမ်းနှင့် ပိုက် လိုင်းစီမံကိန်းများမလုပ်မီ ကျောက် ဖြူမြို့နယ် ကျေးရွာများအားလုံးကို မီးပေးမည်ဟု ဆိုသော်လည်း လက်ရှိအချိန်စီမံကိန်း စတင်လည် ပတ်နေချိန်၌ ကျေးရွာပေါင်း ၃၅၆ ရွာအနက် ၂၁ ရွာသာ မီးလင်းနေ ခြင်းကလည်း တရုတ်ကုမ္ပဏီ၏ ကတိစကားအပေါ် ဒေသခံများက ယုံကြည်မှု ယုတ်လျော့စေပြီး နောက်ထပ်ဝင်ရောက်လုပ်ကိုင် မည့် တရုတ်ကုမ္ပဏီများအပေါ်ပါ မယုံကြည်မှုများ၊ သံသယများ တိုး လာစေသည်။

‘‘ဒီကျွန်းပေါ်က ရွာတွေကို တစ်နေ့ခြောက်နာရီ မီးပေးပါ တယ်။ ဒါတောင် သူတို့ရုံးရှေ့ဆန္ဒ ပြပြီးမှ ရထားတာပါ’’ဟု မဒေး ကျွန်းဒေသခံ ကိုထွန်းကြည်က ပြောသည်။

‘‘ဒီကျွန်းပေါ်မှာ လုပ်မယ့် အထူးစီးပွားရေးဇုန်ကို မကန့် ကွက်ပါဘူး။ ဒါပေမဲ့ တရုတ် ကုမ္ပဏီတော့ မရစေချင်ဘူး။ တ ခြားဂျပန်ပဲဖြစ်ဖြစ်၊ ဘာပဲဖြစ်ဖြစ် လုပ်စေချင်တယ်။  အရီးတို့လို လယ်သမားတွေရဲ့မြေကို မတရား မသိမ်းတဲ့ ကုမ္ပဏီမျိုးကိုပဲလိုချင် တယ်’’ဟု မဒေးကျွန်းသူတစ်ဦးက ပြောသည်။

ယခင်ကျောက်ဖြူ အထူးစီးပွားရေးဇုန်အကောင်အထည်ဖော် ရန် တရုတ်အစိုးရကျောထောက် နောက်ခံပြု Citic  ကုမ္ပဏီက ၂၀၀၉ ၌ တင်ပြခဲ့ခြင်းဖြစ်သည်။ ၂၀၁၁ မြန်မာအစိုးရနှင့် တရုတ် ကုမ္ပဏီကြား နားလည်မှုစာချွန်လွှာများအရ Citic Groupကုမ္ပဏီ က အကောင်အထည်ဖော်လိုသော အထူးစီးပွားရေးဇုန်တွင် ရေနက် ဆိပ်ကမ်း၊ ရထားလမ်း၊ လေယာဉ်ကွင်းနှင့် စက်မှုဇုန်များ ပါ ဝင်သည်။ ထို့အပြင် Citic Group ကုမ္ပဏီ၏ လက်အောက်ခံကုမ္ပဏီ ဖြစ်သည့် Citic ဆောက်လုပ်ရေး ကုမ္ပဏီက လုပ်ကိုင်ခွင့်ရလျှင် အကောင်အထည်ဖော်ရန် ပြည်တွင်းရှိ ထူးကုမ္ပဏီနှင့် ကျောက်ဖြူအထူးစီးပွားရေးဇုန် လုပ်ငန်းဆိုင်ရာအတွက် သဘောတူစာချုပ်များ ချုပ်ဆိုထားကြသည်။

Citic ဆောက်လုပ်ရေး ကုမ္ပ ဏီ၏ တင်ပြချက်အရ ယင်းအထူး စီးပွားရေးဇုန်အတွက် ကနဦးရင်း နှီးမြှုပ်နှံမှုအမေရိကန်ဒေါ်လာ ရှစ် ဘီလီယံကျော်လိုအပ်မည်ဖြစ်ပြီး လုပ်ငန်းလည်ပတ်ပြီး ၃၅ နှစ်အ တွင်း ကန်ဒေါ်လာ ၈၉ ဘီလီယံ ကျော်ရှိမည်ဟု ခန့်မှန်းထားသည်။အဆိုပါတင်ပြချက်တွင် စက်မှုဇုန် အတွက် မြေဧကသုံးသောင်းကျော် အသုံးပြုမည်ဟုဆိုပြီး ကမ်းရိုး တန်းရေလမ်းအတွက် ရေမျက်နှာ ပြင် စတုရန်းကီလိုမီတာ ၇၀ကျော် အသုံးပြုမည်ဟုဆိုသည်။

သို့သော်  တရုတ် Citic ကုမ္ပဏီ၏ လုပ်ငန်းများကို ၂၀၁၁ တွင် အစိုးရကရပ်တန့်စေခဲ့သည်။ အကြောင်းမှာ နိုင်ငံတကာတင်ဒါခေါ်ယူရန်ဖြစ်ပြီး ၂၀၁၃ တွင် အစိုးရက နိုင်ငံတကာတင်ဒါခေါ်ယူခဲ့ သည်။

 ကျောက်ဖြူအထူးစီးပွားရေးဇုန်ကို အလုံးစုံကန့်ကွက်ခြင်း မဟုတ်သော်လည်း ယခင်နမူနာ များကြောင့် တရုတ်ကုမ္ပဏီများ လုပ်ဆောင်မည်ကို စိုးရိမ်နေခြင်းဖြစ်ကြောင်း ကျောက်ဖြူမြို့နယ် သံဃနာယကအဖွဲ့ဥက္ကဋ္ဌ ဆရာတော် ဘဒ္ဒန္တအဂ္ဂဓမ္မက မိန့်ကြားသည်။ ယခင် ရေနံပိုက်လိုင်းကုမ္ပဏီက ကျေးရွာအားလုံး မီးလင်းစေရမည်ဟု ကတိပေးသော်လည်း မီးမရ၍ မကျေနပ်ကြခြင်းဖြစ်ကြောင်း ဆရာတော်က ဆက် လက်မိန့်ကြားသည်။

‘‘မြေလျော်ကြေးက များများစားစားရမယ်။ ဒေသခံတွေအတွက် အလုပ်အကိုင်ရမယ်ဆိုရင်  ဒီအထူးစီးပွားရေး စီမံကိန်းကို ထောက်ခံကြမှာပါ’’ဟုဆရာတော်က ဆက်လက်မိန့်ကြားသည်။

ထို့အပြင် ယခင်စီမံကိန်းများတွင် မြေယာလျော်ကြေးအတွက် မြေလွတ်မြေရိုင်းများ၊ လယ်မြေများကို အစိုးရပိုင်းမှ တာဝန်ရှိသူ အချို့က နာမည်ပေါက်ပြုလုပ်ပြီး ကုမ္ပဏီ၏ မြေယာလျော်ကြေးများ ထုတ်ယူမှုအများအပြားရှိခဲ့သော ကြောင့် ယခုစီမံကိန်းတွင် ယင်းကဲ့သို့ မဖြစ်အောင် ဒေသအာဏာ ပိုင်များက သဘောပေါက်နေပြီ ဖြစ်ကြောင်း ကျောက်ဖြူမြို့နယ် အစိုးရအဖွဲ့ တာဝန်ရှိသူတစ်ဦးက ပြောသည်။ ကုမ္ပဏီဘက်က မြေယာလျော်ကြေးများ နစ်နာသူ တောင်သူများထံ အပြည့်အဝမ ရောက်ခြင်းမှာ ကြားတွင် အစိုးရတာဝန်ရှိသူအချို့က အမည်ပေါက်လိမ်ကာ ထုတ်ယူသွားခြင်းဖြစ် ကြောင်း ၎င်းကဆိုသည်။

ယခုအခါ ကျောက်ဖြူအထူး စီးပွားရေးဇုန် အကောင်အထည် ဖော်ရန် ရေနက်ဆိပ်ကမ်း တည်ဆောက်ခြင်း၊ စက်မှုဇုန်တည် ဆောက်ခြင်းနှင့် အခြားအခြေခံ အဆောက်အအုံများ တည်ဆောက် ခြင်းလုပ်ငန်းသုံးခုအတွက် နိုင်ငံ တကာသို့ အိတ်ဖွင့်တင်ဒါခေါ်ယူ ထားသည်။ ကျောက်ဖြူအထူး စီးပွားရေးဇုန်တည်ဆောက်လိုသူများ၊  တည်ဆောက်မှုလုပ်ငန်းစဉ် လျှောက်လွှာများ တင်သွင်းခြင်းအတွက် စိတ်ဝင်စားမှု ဖော်ပြလွှာအဆင့်  အောင်မြင်ထားသည့် ကုမ္ပဏီ ၁၂ ခုစလုံးကို တင်ဒါဝင် ပြိုင်ခွင့်ပြုထားကြောင်း တင်ဒါ စိစစ်ရွေးချယ်ရေးအဖွဲ့ တွဲဖက်အ တွင်းရေးမှူး ဦးအောင်ကျော်သန်း က ပြောသည်။

သို့သော်လက်ရှိတင်ဒါသွင်းသည့် ကုမ္ပဏီများ၏ တင်ပြချက်တွင် စံနှုန်းသတ်မှတ်ချက် မကိုက်ညီသောကြောင့် စက်မှုဇုန်နှင့် ရေနက်ဆိပ်ကမ်းကိုသာ လုပ်ကိုင်ခွင့် ပြုမည်ဖြစ်ပြီး အိမ်ရာစီမံကိန်းကို တင်ဒါမပေးတော့ကြောင်း တင်ဒါ စိစစ်ရေးကော်မတီအဖွဲ့ဝင် ဦးဘရွှေက ပြောသည်။

ထိုကုမ္ပဏီ(၁၂)ခုအနက် တစ် ခုဖြစ်သော တရုတ် Citic ဆောက်လုပ်ရေးကုမ္ပဏီက ကျောက်ဖြူ မြို့နယ်တွင် လူမှုရေးလုပ်ငန်းများ လုပ်ကိုင်နေပြီး မွေးမြူရေး၊ ရေလုပ်ငန်းနှင့် ကျေးလက်ဒေသဖွံ့ဖြိုးရေးဝန်ကြီးဌာနနှင့် ပူးပေါင်း၍ ကျေးရွာ ၅၀ အတွက် တစ်ရွာလျှင်  ကျပ်သိန်းသုံးရာဖြင့် ကျေးလက် ရန်ပုံငွေစီမံကိန်းများ လုပ်ဆောင်နေသည်။

 ကျောက်ဖြူတွင် တရုတ်ကုမ္ပဏီက အစိုးရနှင့်ပေါင်း၍ ကျေးလက်ဖွံ့ဖြိုးရေးလုပ်ငန်းလုပ်ကိုင် နေသော်လည်း ကျောက်ဖြူအထူး စီးပွားရေးဇုန်တင်ဒါ အောင်ခြင်း၊ မအောင်ခြင်းနှင့် မသက်ဆိုင် ကြောင်း ဦးဘရွှေကပြောသည်။

‘‘မြန်မာအစိုးရကအကြောင်းကြောင်းကြောင့် ဒီစီမံကိန်းကို ရပ်တန့်ခိုင်းပေမယ့် ကုမ္ပဏီက တင် ဒါရမယ်လို့ ယုံကြည်ပါတယ်။ ဒါ ကြောင့် ပတ်ဝန်းကျင်မှာရှိတဲ့ ရွာ တွေကို လူမှုရေးလုပ်ငန်းတွေစပြီး လုပ်ကိုင်ခဲ့ပါတယ်။ ဒီလုပ်ငန်းက တင်ဒါရသည်ဖြစ်စေ၊ မရသည် ဖြစ်စေ ဆက်လုပ်သွားမယ့် အလုပ်ပါ’’ ဟု Citic ဆောက်လုပ်ရေး ကုမ္ပဏီ ဒုဥက္ကဋ္ဌကပြောသည်။

 လာမည့်သြဂုတ် ၂ ရက်တွင် ကျောက်ဖြူ အထူးစီးပွားရေးဇုန် တင်ဒါအောင်မည့်စာရင်းကို အစိုး ရက ထုတ်ပြန်ရန်ရှိသည်။ကျောက် ဖြူမြို့နယ်မှ ရခိုင်တိုင်းရင်းသား များက ၎င်းတို့၏ မြေယာများအ တွက် မြေယာလျော်ကြေး အပြည့် အဝပေးပြီး အမှန်တကယ် ဒေသ ဖွံ့ဖြိုးရေး၊ အလုပ်အကိုင်ရရှိရေး အတွက် ဆောင်ရွက်ပေးနိုင်မည့် ကုမ္ပဏီမျိုးကို လုပ်ကိုင်ခွင့်ရစေလို သည်။ သို့သော် မဒေးကျွန်းရှိဒေသ ခံများကမူ ကျွန်းပေါ်ရှိ တရုတ် ကုမ္ပဏီလုပ်ရပ်များကြောင့် အခြား တရုတ်ကုမ္ပဏီကို လက်ခံရန် စိုး ရိမ်ကြောက်လန့်နေကြောင်း ဒေ သခံများကဆိုသည်။

  ရေနံနှင့် သဘာဝဓာတ်ငွေ့ ပိုက်လိုင်းကုမ္ပဏီနှင့် ရေနက်ဆိပ် ကမ်းလုပ်ကိုင်သည့် CNPC ကုမ္ပဏီ တို့သည် မဒေးကျွန်းအတွင်း ဒေသ ခံများအတွက် လျှပ်စစ်မီး၊ လမ်း ပန်းဆက်သွယ်ရေးနှင့် ဒေသဖွံ့ဖြိုး ရေးလုပ်ငန်းအတွက် ဆောင်ရွက် ပေးမည်ဟုဆိုသော်လည်း ဇွန်လ လယ်တွင် 7 Day News က မဒေးကျွန်းသို့ရောက်ရှိစဉ် ရွာလမ်းများ ပျက်စီးနေခြင်း၊ လျှပ်စစ်မီးအချိန် ပိုင်းသာရခြင်းနှင့် ဖုန်းလိုင်းများ   ပြတ်တောက်နေခြင်းတို့ကို   တွေ့ရှိ ရသည်။ ထို့အပြင် မြေယာလျော် ကြေးများလည်း ပေးအပ်ခြင်းမရှိ သေးကြောင်း ဒေသခံများက ပြော သည်။

 ရှေ့တွင်ဖြစ်ပွားသော နမူနာ များကြောင့် ဒေသခံများသည် မြေယာလျော်ကြေးမရဘဲ မြေယာများ ဆုံးရှုံးမည်ကို စိုးရိမ်ခြင်း၊ အလုပ် အကိုင်အခွင့်အလမ်း မရမည်ကို စိုးရိမ်ခြင်းနှင့် ရေရှားပါးသော ဒေ သဖြစ်၍ စက်မှုဇုန်မှ ရေအများအ ပြားသုံးပါက ဒေသခံများ ဒုက္ခ ရောက်ကို စိုးရိမ်ခြင်းများ ရှိနေကြ သည်။

အလုပ်အကိုင်အခွင့်အလမ်း အတွက် စိုးရိမ်ခြင်းမှာ စက်မှုဇုန်သည် ကျွမ်းကျင်လုပ်သားလိုအပ်မည်ဖြစ်၍ ဒေသခံများသည် ကျွမ်း ကျင်လုပ်သားမဟုတ်သောကြောင့် အလုပ်အကိုင်မရမည်ကို စိုးရိမ် ခြင်းဖြစ်သည်။

သို့သော် ကျောက်ဖြူအထူး စီးပွားရေးဇုန်အတွက်  တင်ဒါ အောင်မြင်ရန် မျှော်မှန်းထားသည့့် တရုတ် Citic ကုမ္ပဏီက ထိုကဲ့သို့ အမှားများကို ကျော်လွှားရန် အ ဆင်သင့်ရှိကြောင်း Citic ဆောက် လုပ်ရေးကုမ္ပဏီ ဒုတိယဥက္ကဋ္ဌက ဆိုသည်။

တရုတ်ကုမ္ပဏီများသည် နိုင်ငံတကာ ရင်းနှီးမြှုပ်နှံံမှု အတွေ့အကြုံမရှိသောကြောင့် ယခုကဲ့သို့ ပြဿနာဖြစ်ရကြောင်းနှင့် ၎င်းတို့ကုမ္ပဏီသည် နိုင်ငံတကာ အတွေ့အကြုံအပြည့်အဝရှိသောကြောင့် ယင်းအမှားမျိုး ကျူးလွန်မည်မ ဟုတ်ကြောင်း ၎င်းကဆိုသည်။

 ကျောက်ဖြူမြို့ခံ အချို့ကမူ အထူးစီးပွားရေးဇုန် ဆောင်ရွက်ခြင်းထက် ခရီးသွားလုပ်ငန်းဖြင့် ဒေသဖွံ့ဖြိုးရေးဆောင်ရွက်စေလိုသူများလည်းရှိသည်။

‘‘တကယ်တော့ ကျောက်ဖြူရေပင်လယ်ကြီးလည်း ရှိတယ်။ ခရီးသွားလုပ်ငန်းကို သေချာအကောင်အထည်ဖော်တဲ့ လုပ်ငန်းမျိုးကို အဓိကထားသင့်တယ်။ ဒါက သဘာဝပတ်ဝန်းကျင်ကို မထိခိုက်နိုင်ဘူး။ အထူးစီးပွားရေးဇုန် မက်လို့ သဘာဝပတ်ဝန်းကျင် ထိခိုက်ရင် ဒေသခံတွေပဲ အဓိကခံစားရမှာ။ လာလုပ်မယ့် ကုမ္ပဏီ အရှုံးအမြတ်ပဲရှိမှာ။ ခံရမှာက ဒေသခံတွေပဲ’’ဟု ကျောက်ဖြူမြို့မှ ကိုထွန်းနိုင်ကပြောသည်။

Ref  : 7daydaily

Posted By : Wai Phyoe Aung