လူသားတိုင်းဟာ တစ်ယောက်တည်းနေထိုင်ကြတဲ့သူတွေ မဟုတ်ပါဘူး။ ကမ္ဘာဦးအစကတည်းက အုပ်စုလိုက် စုဖွဲ့နေထိုင်ကြပါတယ်။ ဒါကြောင့် လူသားတွေဟာ ပတ်ဝန်းကျင် ဆိုတဲ့ အရာနဲ့ အမြဲထိတွေ့နေရပါတယ်။ ပတ်ဝန်းကျင်မကောင်းရင် အိမ်ဟာ မလုံခြုံနိုင်ပါဘူး။ နောက်ပြီးပတ်ဝန်းကျင် ဆူညံရင်လည်း အိမ်ဟာ ဆူညံတတ်ပါတယ်။ ပုပ်နေတဲ့ သစ်သီးဟာ သစ်သီးကောင်းတွေကို ကူးစက်တတ်သလို၊ အနံ့ဆိုးတဲ့ အဝတ်တွေဟာ လျှော်ဖွတ်ပြီးသားအဝတ်တွေကို အနံ့အလွယ်တကူ ကူးစက်တတ်သလို ပတ်ဝန်းကျင်ဆိုးရင်လည်း ပတ်ဝန်းကျင်ရဲ့ အငွေ့အသက်က ကိုယ့်အိမ်အပေါ် ကျရောက်လာတတ်ပါတယ်။ 

ကိုယ့်အိမ်ရဲ့ပြတင်းပေါက်တွေဆီကို အနီးဝန်းကျင်ကဖုန်းရွှေဓာတ်ဆိုး စွမ်းအင်တွေ စီးဝင်နေမယ်ဆိုရင် သင့်အိမ်ရဲ့ မင်္ဂလာအတွက်လည်းထိခိုက်ရပါတယ်။ ဒီဆောင်းပါးလေးမှာတော့ မကောင်းတဲ့ အိမ်နီးချင်းတွေရဲ့ ဖုန်းရွှေစွမ်းအင်ဆိုးတွေ ကိုယ့်အိမ်ထဲ ဝင်မလာစေဖို့ နည်းလမ်းတချို့ကိုဖော်ပြပေးသွားမှာ ဖြစ်ပါတယ်။ 

မှန် (သို့) အလင်းပြန်စေတဲ့အရာတွေ တပ်ဆင်ပါ။

စွမ်းအင်ဆိုးတွေကို လာရာအရပ် ပြန်ကန်ထွက်စေဖို့ ရောင်ပြန်ပစ္စည်းတွေသုံးနိုင်ပါတယ်။ ဖုန်းရွှေမှာ မှန်တွေကို စွမ်းအင်ဆိုးတွေ တန်ပြန်တိုက်ထုတ်ဖို့နဲ့ နေအိမ်ကို မကောင်းတဲ့သက်ရောက်မှုတွေ မကျစေဖို့ ကာကွယ်ရာမှာ သုံးပါတယ်။ အခုပြင်ပက မကောင်းတဲ့ အငွေ့အသက်ဆိုးတွေကို တန်ပြန်ဖို့ ဆိုရင်တော့ မှန်လုံးလေးတွေ ဖြစ်စေ၊ ရောင်ပြန်စတေကာလေးတွေနဲ့ အလှဆင်ပစ္စည်းလေးတွေဖြစ်စေ၊ မှန်သေးသေးလေးဖြစ်စေကို အိမ်ဘေးပတ်ဝန်းကျင်မှာ ချိတ်ဆွဲအလှဆင်နိုင်ပါတယ်။ ဒါဆိုရင်မကောင်းတဲ့ စွမ်းအင်တွေ ပြန်ကန်ထွက်သွားနိုင်ပါတယ်။



ပင်လယ်ဆား

ပင်လယ်ဆားကို ဂမ္ဘီရ လောကမှာ သန့်စင်တဲ့ ပစ္စည်းအဖြစ် ရည်ညွှန်းကြပါတယ်။ ဖုန်းရွှေမှာလည်း ပင်လယ်ဆားဟာ စွမ်းအားပြင်း သန့်စင်ပစ္စည်းဖြစ်ပါတယ်။ ပင်လယ်ဆားကို တံခါးဝမှာ သန့်စင်တဲ့ခွက်တစ်ခုနဲ့ ထည့်ထားမယ်ဆိုရင် အိမ်ထဲဝင်လာတဲ့ စွမ်းအင်ဆိုးတွေကို စစ်ထုတ်ပေးနိုင်ပါတယ်။ 

အိမ်မှာ အပျက်သဘောဆောင်သော စကားတွေ မပြောပါနဲ့။ 

အိမ်မှာ အိမ်သားတွေက မိုးလင်းတာနဲ့ ဆဲဆို၊ ရန်ဖြစ်နေမယ်၊ အပျက်သဘောဆောင်တဲ့ စကားတွေတတွတ်တွတ် ပြောနေမယ်ဆိုရင်တော့ အိမ်မှာ မင်္ဂလာရှိနေနိုင်မှာ မဟုတ်ပါဘူး။ ဒါက လက်တွေ့ဆန်တဲ့အချက်တစ်ခု ဖြစ်ပါတယ်။ အိမ်မှာ အိမ်သားတွေ ကိုယ်တိုင်က အပျက်သဘောဆောင်တဲ့အရာတွေ ဖန်တီး လေလေ မကောင်းဓာတ်တွေ ပိုစုဝေးလေပါပဲ။

ဒီအချက်လေးတွေကို သတိထား လုပ်ဆောင်ရင်း အိမ်နီးချင်းတွေကိုလည်း ကောင်းကွက်လေးတွေရှာ၊ မေတ္တာထားနိုင်အောင် ကြိုးစားပါ။ သင့်အိမ်လေးနဲ့ သင့်ပတ်ဝန်းကျင်မှာ ပျော်ရွှင်ချမ်းမြေ့ငြိမ်းချမ်းမှုတွေ ပိုမိုရရှိစံစားနိုင်လာပါစေလို့ ဆုတောင်း မေတ္တာပို့သ လိုက်ရပါတယ်ရှင်။

Written By : Lily (ShweProperty.com)