အိမ်နေရာ အရွေးမမှားစေဖို့ ရှောင်ရန် ဆောင်ရန်များ

Property Titles

By Sint Sint, Shweproperty.com

Updated at 5 October 2020

အိမ်၀ယ်ယူရာမှာ နေရာအရွေးမှားရင်လည်း အိမ်ရဲ့ လာဘ်လာဘ နဲ့ ကျက်သရေမင်္ဂလာ ဆုတ်ယုတ်တတ်တာမို့ အောက်ပါအနေအထားတွေကိုလည်း သတိပြုရပါမယ်။

လမ်းဦးတိုက်အိမ်

လမ်းနဲ့ ထိပ်တိုက်တည့်တည့်ကျရောက်တဲ့ အနေအထားကို လမ်းဦးတိုက်အိမ်လို့ ခေါ်ပါတယ်။

(မိမိအိမ်နေရာသည် လမ်းဦးတိုက် ပုံစံဖြစ်နေပါက ယတြာအနေနဲ့ - ကျားရုပ်လုပ်ပြီး ဦးတိုက်တဲ့ လမ်းဘက်သို့ လှည့်ထားပါ၊ မိမိအိမ်ရှေ့ သောက်ရေအိုးစင် တည်ပါ)

လှည်းဦးတိုက်အိမ်

လှည်းများ(ယနေ့ခေတ် ကားနှင့် ယဉ်အမျိုးမျိုး) သွားလာသည့်လမ်းကြောင်း နဲ့ မလွတ်တဲ့ အနေအထားကို လှည်းဦးတိုက်အိမ်လို့ ခေါ်ပါတယ်။

(မိမိအိမ်နေရာသည် လှည်းဦးတိုက် ပုံစံဖြစ်နေပါက - ကျားရုပ်ပြုလုပ်ပြီး ဆောင်ထားပါ)

လှေဦးတိုက်အိမ်

ရေလမ်းမှာ သွားလာနေတဲ့ သင်္ဘော၊ မောတော်ဘုတ်၊ လှေ အစရှိတဲ့ ရေယာဥ်များ ထိပ်တိုက်သွားလာတဲ့ အနေအထားမှာရှိတဲ့အိမ်ကို လှည်းဦးတိုက်အိမ်လို့ခေါ်ပါတယ်။

(မိမိအိမ်နေရာသည် လှေဦးတိုက် ပုံစံဖြစ်နေပါက - ကျားရုပ်ပြုလုပ်ပြီး ဆောင်ထားပါ)

ရေဦးတိုက်အိမ်

ရေကြောင်းနဲ့ မိမိအိမ် ထိပ်တိုက်တွေ့ပြီး ရေစတင်စီးဆင်းတဲ့နေရာ၊ ရေစီးဆုံတဲ့နေရာအနေအထားတွေမှာ ရှိတဲ့အိမ်ကို ရေဦးတိုက်အိမ် လို့ခေါ်ပါတယ်။

(မိမိအိမ်နေရာသည် ရေဦးတိုက် ပုံစံဖြစ်နေပါက - ကျားရုပ်ပြုလုပ်ပြီး ဆောင်ထားပါ)

စေတီဦးတိုက်အိမ်

ဘုရားကျောင်းကန်နဲ့ စေတီပုထိုးတွေက မိမိနေအိမ်ထက် နိမ့်ကျပြီး ကပ်လျက် အနေအထားမျိုးမှာ တည်ရှိတဲ့အိမ်ကို စေတီဦးတိုက်အိမ်လို့ခေါ်ပါတယ်။

(မိမိအိမ်နေရာသည် စေတီဦးတိုက် ပုံစံဖြစ်နေပါက - နီးစပ်ရာ စေတီပုထိုးနဲ့ သာသနိက အဆောက်အအုံတွေမှာ ကောဇောခင်းခြင်း၊ ကျောက်ပြားကပ်လှူခြင်း၊ တံမြက်စည်းလှည်းခြင်း၊ န၀ကမ္မကပ်လှူခြင်း စတဲ့ ကုသိုလ်ဒါန ပြုပေးရပါမယ်။ )

ကြမ်းဦးတိုက်အိမ်

အဆင့်ပေါ်ဖြစ်စေ ၊ အထပ်ပေါ်ဖြစ်စေ တက်ရာမှာ ခြေဖဝါးချရင် ကြမ်းအလျားလိုက်အတိုင်း မိမိခြေချောင်းမှာတည်နေခြင်းအနေအထားရှိတဲ့အိမ်ကို ကြမ်းဦးတိုက်အိမ်လို့ခေါ်ပါတယ်။

(မိမိအိမ်နေရာသည် ကြမ်းဦးတိုက် ပုံစံဖြစ်နေပါက - ကော်ဇော၊ ဖယောင်းပုဆိုး ခင်းထားရပါမယ်။)

နို့ညှပ်

မိမိအိမ်တည်နေရာက ညီအစ်ကိုကြား (သို့မဟုတ်)သားအဖကြား ညပ်နေတဲ့ အနေအထားကို နို့ညှပ် လို့ခေါ်ပါတယ်။

(မိမိအိမ်နေရာသည် နို့ညှပ်အနေအထားဖြစ်နေပါက - အိမ်တစ်ဖက်တစ်ချက်တွင် ထညပ် ( ငါးကင်ရာတွင် သုံးသောဝါးညှပ်) ဆောင်ထားရပါမယ်။)

အိမ်တံစို့

မိမိအိမ်ကို တခြားတစ်အိမ်က အလည်တည့်တည့်ကနေ ကန့်လန့်ဆောက်ထားတဲ့ အနေအထားရှိတဲ့ အိမ်ကို အိမ်တံစို့လို့ခေါ်ပါတယ်။

(မိမိအိမ်နေရာသည် အိမ်တံစို့ ပုံစံဖြစ်နေပါက - တံစို့အနေအထားဖြစ်နေသော အိမ်ဘက်သို့ မှန်တစ်ချပ်ထောင်ထားပါ။)

မိမိအိမ် ကျက်သရေမင်္ဂလာ တိုးတက်စေဖို့ ဆောင်ရန်ရှောင်ရန်လေးတွေ တင်ဆက်ပေးလိုက်ရပါ။ မိတ်ဆွေများ စီးပွာလာဘ်လာဘတွေ တိုးတက်စေကြောင်း ဆုမွန်ကောင်းတောင်းပေးလိုက်ပါတယ်နော်။

ဖတ်ရှုမှုအများအဆုံး အိမ်ခြံမြေဗဟုသုတများ