''ကျွန်တော်က တိုက်ခန်းမှာနေပါတယ်။ ကျွန်တော့်ရဲ့ မျက်နှာချင်းဆိုင်အခန်းက မြေရှင်နေတယ်။ မြေရှင်က သူနေတဲ့ အခန်းနဲ့အတူ မြေပါရောင်းချင်တယ်လို့ ပြောပါတယ်။ ဝယ်မယ်ဆိုရင် ဘယ်လိုဆောင်ရွက်ရမယ်ဆို တာ သိချင်လို့ပါ ဆရာ''ဟု မိတ်ဆွေတစ်ဦး၏ သားဖြစ်သူက စာရေးသူထံ လာရောက်ဆွေးနွေးခြင်း ဖြစ်ပါ သည်။

''အဲဒီအဆောက်အအုံမှာ တိုက်ခန်း ဘယ်နှခန်းရှိပါသလဲ''

''အိမ်ဟောင်းဆိုတော့ အုတ်ညှပ်နှစ်ထပ်တိုက်ဖြစ်ပြီး မြေညီထပ်နှစ်ခန်းနဲ့ အပေါ်ထပ်နှစ်ခန်း စုစုပေါင်းလေးခန်း ရှိပါတယ်''

''အောက်ထပ်က လူတွေက အိမ်ငှားတွေလား၊ အပျောက်နဲ့ဝယ်ထားတဲ့ သူတွေပဲလား''

''ဟုတ်ကဲ့ အောက်ထပ်နှစ်ခန်းကလည်း အပျောက်စနစ်နဲ့ ဝယ်ထားတဲ့ သူတွေဆရာ။ ဒါပေမယ့် မြေရှင် ကိုတော့ အိမ်လခပေးရတယ်''

''မြေကို ဝယ်မယ်ဆိုတော့ မြေက ဘယ်လိုမြေအမျိုးအစားလဲ''

''ဂရန်မြေလို့ ပြောပါတယ်''

''ဂရန်အမည်ပေါက်က ရှိသေးလား၊ သူကိုယ်တိုင်ရောင်းမှာလား''

''အမည်ပေါက် အဘွားကြီးကတော့ ရှိသေးတယ်။ နေမကောင်းတော့ မထနိုင်တော့ဘူး။ အားလုံးရောင်းပြီး အမွေခွဲတဲ့ သဘောပေါ့ ဆရာ''

''သားသမီးတွေက များလား။ အရောင်းအဝယ်လုပ်ရင်းကိုင်ရင်းနဲ့ အဘွားကြီး ကွယ်လွန်သွားရင် အမွေ ခွဲဝေတာ မတည့်ဘဲ ဖြစ်တတ်တယ်''

''တိုက်ခန်းကို ဝယ်လိုက်လို့ လက်ရောက်ယူလိုက်ရင် လွယ်တယ်ဆရာ။ မြေကိစ္စကတော့ ငွေကထပ် လိုက်ရ မလိုဖြစ်နေတယ်''

''ဒါတော့ ဟုတ်တယ်။ လောလောဆယ်မှာတော့ မြေကို ဝယ်လိုက်ရုံနဲ့ အခွင့်အရေးအမြတ်တော့ ချက်ချင်းရမှာ မဟုတ်ဘူး''

''သူငယ်ချင်းတစ်ယောက် ပြောတာကတော့ အခုကာလမှာ ခြောက်ထပ်အထိ တိုက်ခန်းတွေ ဆောက်ခွင့်ရ တယ်။ ၁၂ ခန်းထွက်လာမယ်။ ရှစ်ခန်းပိုရမယ်။ ကန်ထရိုက်နဲ့ညှိပြီး ဆောက်ရင်တော့ အကျိုးအမြတ်ရနိုင် တယ်လို့ ပြောတာပဲ ဆရာ''

''စိတ်ကူးနဲ့ တွက်ချက်လိုက်ရင်တော့လည်း ၁၂ ခန်းကို ကန်ထရိုက်တစ်ဝက်၊ ကိုယ်ကတစ်ဝက်စီယူမယ် ဆိုရင် ခြောက်ခန်းစီရမယ်။ လက်ရှိလေးခန်း နှုတ်လိုက်ရင် နှစ်ခန်းကျန်မယ်။ ကန်ထရိုက်က ခြောက်ခန်းထဲမှ လျှော့ယူရင် တစ်ခန်းနှစ်ခန်းပိုထွက်လာမယ်။ ဒါဆိုရင် သုံးခန်းအနည်းဆုံးရပြီး ပြန်ရောင်းနိုင်တယ်။ ဒီလို တွက်ရင်တော့ ဟုတ်ပါတယ်။ ဒါပေမယ့် ရင်းနှီးရမှာနဲ့ ပြန်ရမယ့် ငွေကိုတော့ သေချာချင့်ချိန်ဖို့ လိုတယ်''

''ဟုတ်ကဲ့ ဆရာ။ အဲဒါကြောင့် ဘယ်လို အဆင့်ဆင့်ဆောင်ရွက်ရမှာကို သိချင်လို့ပါ။ အဲဒီလိုမြေသက်သက်ပဲ ဝယ်တာမျိုးရှိသလား''

''မောင်ရင်က တိုက်ခန်းလက်ဝယ်ရှိသေးတယ်။ ပြီးတော့ ဝယ်လိုက်ရင် တိုက်ခန်းတစ်ခန်းထပ်ပြီး လက် ရှိဖြစ်လာမယ်ဆိုတော့ ပစ္စည်းလက်ဝယ်ရရှိထားတယ်။ အချို့က အိမ်ငှား တွေနေတဲ့ တိုက်ခန်းကို ဖြိုပြီးဆောက် မယ်ဆိုတဲ့ ရည်ရွယ်ချက်နဲ့ မြေကိုပဲ သက်သက်ဝယ်တာမျိုးရှိတတ်တယ်။ အချို့လည်း အိမ်ငှားရှိတဲ့ အိမ်နဲ့မြေ ကို ဝယ်တယ်။ နောက်မှ အိမ်ငှားကို တရားစွဲ နှင်ချတာမျိုးလည်း ရှိကြတယ်။ စီးပွားရေးသမားတွေကတော့ တွက်ခြေကိုက်မယ်ထင်ရင် စွန့်စားဆောင်ရွက်တတ်ကြတယ်''

''တိုက်ခန်းဝယ်တာတော့ အခွန်မဆောင်ပဲနေရင်ဖြစ်တယ် မဟုတ်လား၊ ကျွန်တော်သိတာတော့ တိုက်ခန်းဝယ် တာ ဘယ်သူမှ အခွန်ဆောင်တာတော့ မတွေ့ဘူး ဆရာ''

''မြေကတော့ တရားဝင်ဆောင်ရွက်မယ်ဆိုရင် စာချုပ်စာတမ်းမှတ်ပုံတင်ရုံးမှာ အရောင်းအဝယ်မှတ်ပုံတင်စာ ချုပ် ချုပ်ဆိုဖို့လိုတယ်။ ဒါမှ ကိုယ်က တရားဝင်မြေပိုင်ဆိုင်ခွင့်ရှိလာပြီး ကျန်တဲ့ အောက်ထပ်က အိမ်ငှားတွေအ ပေါ်မှာ အိမ်ရှင် မြေရှင်အဖြစ် ပြန်လည်ဆက်စပ်မှုရှိကာ အိမ် လခကောက်ခံလို့ ရမှာဖြစ်တယ်''

''မြေကွက်ကို ဝယ်မယ်ဆိုရင်တော့ ဝယ်ခွန်ဆောင်ရမှာပေါ့''

''ဟုတ်ပါတယ်။ သက်ဆိုင်ရာ အခွန်အရာရှိကို မြေချည်းသက်သက် ဝယ်တယ်ဆိုတာကို ရှင်းပြဖို့လိုတယ်''

''ဒါမှမဟုတ်ရင် အဆောက်အအုံတစ်ခုလုံးဝယ်ဆိုတာမျိုးဖြစ်လာနိုင်တာပေါ့နော်''

''မှန်ပါတယ်။ အဲဒီအချက်ကို သေချာအောင်အမြတ်ခွန်အရာရှိနဲ့ ဆွေးနွေးဖို့လိုပါတယ်''

''ဟုတ်ကဲ့ ဆရာ။ မြေတန်ဖိုး သတ်မှတ်ချက်ကတော့ သက်ဆိုင်ရာ တန်ဖိုးဖြတ်အခွန်အရာရှိတွေကပဲ သတ်မှတ် ပေးတာလား''

''ဟုတ်တယ်။ သက်ဆိုင်ရာ အခွန်အရာရှိတွေက ကွင်းဆင်းစစ်ဆေးပြီး လမ်းအခြေအနေမြေကွက် နေရာပေါ် မူတည်ပြီး သက်ဆိုင်ရာက သတ်မှတ်ကြေညာထားတဲ့ မြေကွက်စံနှုန်းပေါ် မှာ မူတည်ဆုံးဖြတ်မှာ ဖြစ်ပါတယ်''

''မြေကွက်စံနှုန်းဆိုတာက ဘယ်လိုလဲ ဆရာ''

''ဘဏ္ဍာရေးဝန်ကြီးဌာနကနေပြီး ရန်ကုန်တိုင်းဒေသကြီး အစိုးရအဖွဲ့နဲ့ ညှိနှိုင်းသတ်မှတ်ထားတဲ့ အိမ်မြေစံနှုန်း တွေကို နှစ်အလိုက်ကြေညာထားတာရှိတယ်။ သက်ဆိုင်ရာအခွန် ဦးစီးဌာနရုံးတွေမှာကပ်ထားတယ်။ အဲဒီနှုန်း ထားတွေနဲ့ တန်ဖိုးဖြတ်အဖွဲ့က သတ်မှတ်တန်ဖိုးဖြတ်တာ ဖြစ်တယ်''

''အဲဒီမြေတန်ဖိုးဖြတ်အပေါ် မှာ အခွန်ဆောင်ရမှာပေါ့နော်''

ဟုတ်ပါတယ်။ မြေအိမ်တန်ဖိုး သိန်းတစ်ထောင်ထက်ကျော်ရင်တော့  ဝယ်ခွန်အနေနဲ့ ဝင်ငွေရလမ်း မဖော် ပြနိုင်ရင် ၃ဝ ရာခိုင်နှုန်းထိ ချမှတ် ကောက်ခံနိုင်ပါတယ်။

''ကျွန်တော်က နိုင်ငံခြားသင်္ဘောလိုက်နေတော့ အခွန်ပြနိုင်တာတော့ရှိတယ် ဆရာ''

''ဝင်ငွေခွန်ဆောင်ထားတာရှိရင်တော့ နုတ်ပေးနိုင်တာပေါ့။ သက်သာတာပေါ့လေ''

''အဲဒါပြီးရင် စာချုပ်စာတမ်း မှတ်ပုံတင်ရုံံးမှာ အရောင်းအဝယ် စာချုပ်ချုပ်ဆိုရမှာ ဖြစ်ပါတယ်။ စာချုပ် စာတမ်း မှတ်ပုံတင်ရုံးမှာ အရောင်းအဝယ်စာချုပ် ချုပ်ဆိုမယ်ဆိုရင် ပထမဦးဆုံး သက်ဆိုင်ရာ မြို့တော်စည်ပင်သာယာ ရေး ကော်မတီမြေယာဌာနမှာ မြေကွက်ရောင်းရန်ဆိုပြီး မြေပုံမြေရာဇဝင်ကူးယူရပါတယ်။ အဲဒါရယ် အခွန် ဆောင်ထားတဲ့ ပြေစာရယ်ပူးတွဲတင်ပြပြီး အရောင်းအဝယ်စာချုပ်ကို မှတ်ပုံတင်ပြုလုပ်ချုပ်ဆိုရမှာ ဖြစ်ပါတယ်''

''မှတ်ပုံတင်ခပေးရသေးတယ်လို့ ပြောသံကြားဖူးတယ် ဟုတ်ပါသလား''

''ဟုတ်ပါတယ်။ စာချုပ်စာတမ်းရုံးမှာ မှတ်ပုံတင်ခအဖြစ် တန်ဖိုး၏ ဝ.၅ ရာခိုင်နှုန်း ပေးသွင်းရပါတယ်။ ပြီးရင် ရက်နှစ်ပတ်ခန့်အကြာမှာ စာချုပ် မူရင်းထုတ်ပေးပါတယ်''

''မြေကွက်အမည်ပြောင်းဖို့ ရှိမှာပေါ့နော်''

''မှန်ပါတယ်။ အရောင်းအဝယ် မှတ်ပုံတင်စာချုပ်ရရင်တော့ မြို့တော်စည်ပင်သာယာရေး ကော်မတီ မြေယာ ဌာနမှာ မြေကွက်ပိုင်ရှင် အမည်ပေါက်လျှောက်ထားရပါတယ်''

''အဆင့်တွေအတော်များတယ် ဆရာ။ လောလောဆယ်တိုက်ခန်းပဲ ဝယ်ထားပြီး လက်ရောက်ယူထားရင် ဖြစ်တယ် မဟုတ်လား''

''ဖြစ်ပါတယ်။ ဒါပေမယ့် မြေပါ ဝယ်မယ် စိတ်ကူးရင်တော့ မြေကွက်အမည်ပေါက် အဘွားကြီးသက်ရှိ ထင်ရှား ရှိချိန်မှာ လုပ်တာအဆင်ပြေတယ်။ ငွေလည်း လိုအပ်နေတယ်ဆိုတော့ ဈေးသက်သာနိုင်တာပေါ့။ သူကွယ်လွန် သွားမှ သားသမီးတွေ အမွေဆက်ခံခွင့်လျှောက်တာနဲ့ အမွေခွဲဝေ ငွေမညီညွတ်လို့ အဆင်မပြေဖြစ်တတ်တယ်။ ဒါကြောင့် မြေကိုပါ မြေကွက်အမည်ပေါက် ဝယ်မယ်လု့ိ စိတ်ကူးရင်တော့ သက်ရှိထင်ရှားရှိနေစဉ်မှာ ဝယ်ပါလို့ တိုက်တွန်းချင်တယ်'' ဟု အကြံပြုဆွေးနွေးလိုက်ပါသည်။

ဖတ်ရှုမှုအများအဆုံး အိမ်ခြံမြေဗဟုသုတများ

ပါမစ်မြေနဲ့ ဂရန်မြေ ဝယ်မယ်ဆိုရင် အလိမ်မခံရဖို့ သတိပြုစရာ

အကွက်ရိုက်ရောင်းတဲ့မြေကို ဝယ်လိုသူများ အထူးသတိထားပါ (ပြောင်းလဲလိုက်ပြီဖြစ်တဲ့ လယ်ယာမြေဥပဒေ ပြဌာန်းချက်)

မြေအကြောင်းသိကောင်းစရာ

အိမ်ခြံမြေ ဝယ်ယူလိုသူများ သတိပြုစရာ မြို့သစ်စီမံကိန်းဟုဆိုကာ အကွက်ရိုက်ရောင်းချနေသော လယ်ယာမြေကို ဝယ်မည်ဆိုလျှင်

Credit : Zaygwet Journal ထီယု (ဥပဒေအတိုင်ပင်ခံ)

Photo Credit : Myanmar Times

Posted By : Sint Sint (ShweProperty.com)