Marvel ရဲ့ Iron Man ဆိုတာ ကလေးလူကြီးမရွေးကြိုက်နှစ်သက်ရတဲ့ ဇာတ်ကောင်တစ်ခုပါ။ အဲ့ဒီဇာတ်ကောင်ကို ပိုင်ပိုင်နိုင်နိုင်သရုပ်ဆောင်ထားသူကတော့ နာမည်ကျော်မင်းသားကြီး Robert Downey Jr.ပဲဖြစ်ပါတယ်။

နာမည်ကျော်အနုပညာရှင်တစ်ယောက်ပီပီ သူ့ရဲ့အနုပညာဝင်ငွေဟာ ဒေါ်လာ သန်း ၃၀၀ ကျော်ရှိနေပြီး  Robert Downey Jr. ပိုင်ဆိုင်တဲ့ Malibu က ဇိမ်ခံအိမ်ဟာဆိုရင် ထူးခြားဆန်းသစ်တဲ့ တည်ဆောက်ပုံနဲ့ဆိတ်ငြိမ်အေးချမ်းသာယာတဲ့ ဇိမ်ခံအိမ်ကြီးအဖြစ် နာမည်ကျော်ကြားပါတယ်။

Robert Downey Jr. ရဲ့ Malibu က ဇိမ်ခံအိမ်ကြီးကို အလည်အပတ်သွားလိုက်ရအောင်.. 

Robert Downey Jr. တစ်ခါတစ်လေလာအနားယူလေ့ရှိတဲ့ Malibu က ဇိမ်ခံအိမ်ကြီးဟာ ဒေါ်လာ (၁၃.၄) သန်းတန်ဖိုးရှိပြီး (၂၀၀၉) ခုနှစ်တည်းက ဝယ်ယူခဲ့တာဖြစ်ပါတယ်။ စုစုပေါင်း (၇) ဧကကျယ်ဝန်းတဲ့ အိမ်ခြံဝန်းကျယ်ကြီးမှာ အဓိက အိမ်မကြီးတစ်လုံးပါဝင်ပြီးသားဖြစ်တယ်လို့သိရပြီး Robert Downey Jr. ဟာ ရေကူးကန်ဘေးနားမှာ ရင်သပ်ရှုမောစရာ ခေတ်ရှေ့ပြေးဒီဇိုင်းနဲ့ ထူးခြားတဲ့အိမ်လေးတစ်လုံးကိုပါ ထပ်မံတည်ဆောက်ထားတာပဲဖြစ်ပါတယ်။



အဲဒီ ခေတ်ရှေ့ပြေးဇိမ်ခံအိမ်ကြီးကို ဒီဇိုင်နာ Nicolo Bini က ဒီဇိုင်းဆွဲတည်ဆောက်ခဲ့တာဖြစ်ပြီး Binishell လို့လည်းခေါ်ကြတဲ့ အိမ်ကြီးရဲ့အမိုးဟာ သာမန်အမိုးတွေလိုမဟုတ်ပဲ ဒီဇိုင်နာ Nicolo Bini ရဲ့ ထူးခြားတဲ့လက်ရာတစ်ခုအဖြစ် မြင်တွေ့ရမယ့် လိပ်ခုံးပုံစံအမိုး၊ အမိုးပေါ်မှာမှ blob-shaped ပုံစံပြတင်းပေါက်တွေနဲ့ပေါင်းစပ်ဖန်တီးထားတာပဲဖြစ်ပါတယ်။ 

အိမ်ခန်းတိုင်းဟာလည်း တိကျတဲ့ထောင့်ချိုးတွေမပါပဲ ထူးခြားဆန်းသစ်စွာ မွမ်းမံဖွဲ့စည်းထားတာမြင်တွေ့ရပါတယ်။ အိမ်အဝင်အထွက်တံခါးတွေကိုလည်း နာမည်ကြီးဗိသုကာဒီဇိုင်နာတွေနဲ့ပေါင်းပြီး မှန်တံခါးချပ်တွေနဲ့ ဖွဲ့စည်းတည်ဆောက်ထားတာဖြစ်ပါတယ်။

Robert Downey Jr.တို့ဇနီးမောင်နှံဟာ သဘာဝပတ်ဝန်းကျင်ထိန်းသိမ်းရေးကို တစိုက်မတ်မတ် ကြိုးစားဆောင်ရွက်ကြသူတွေဖြစ်ပြီး သူတို့ရဲ့အိမ်ပတ်ဝန်းကျင်မှာဆိုရင်လည်း သစ်ပင်ပန်းမန်တွေနဲ့ဝန်းရံထားတာမြင်တွေ့ရပါတယ်။ ဒါ့အပြင် သဘာဝပတ်ဝန်းကျင်ထိန်းသိမ်းတဲ့အနေနဲ့ သူတို့ရဲ့အိမ်မှာ လေအားကနေတစ်ဆင့် သောက်သုံးရေထုတ်နိုင်မယ့်နည်းပညာတစ်မျိုးကိုလည်း ထည့်သွင်းတည်ဆောက်ထားတယ်လို့ သိရပါတယ်။ 

ဒါ့အပြင် Robert Downey Jr.တို့ဇနီးမောင်နှံဟာ အနုပညာလက်ရာစုဆောင်းသူတွေလည်းဖြစ်ကြပါတယ်။ သူတို့ရဲ့ခြံထဲမှာ ထားရှိတဲ့ အနုပညာလက်ရာတစ်ခုဟာဆိုရင် ဒေါ်လာ (၃၀၀၀၀၀) ကျော် တန်ဖိုးရှိတယ်လို့ သိရပါတယ်။ Robert Downey Jr. တို့မိသားစုမှာ ကိုယ်ပိုင်တိရစ္ဆာန်ရုံအသေးလေးလည်းရှိပြီး မြင်း၊ ဝက်၊ ဆိတ်၊ ကြက်၊ ယုန်စတဲ့တိရစ္ဆာန်များစွာ မွေးမြူထားတာပဲဖြစ်ပါတယ်။



အိမ်မကြီးထဲမှာတော့ ဧည့်သည်တွေအတွက် အိပ်ခန်းနှစ်ခန်းပါဝင်ပြီး အဲဒီ အိပ်ခန်းတွေကို တန်ဖိုးကြီးပြီးရှားပါးတဲ့အသုံးအဆောင်ပစ္စည်းတွေနဲ့ အလှဆင်ထားတဲ့အပြင် လေသာဆောင်ဝရန်တာကိုယ်စီရှိလို့ Iron Man ဆီသွားလည်မယ့် Avengers တွေကတော့ Luxury ဆန်ဆန် နေထိုင်ရမှာအသေအချာပါပဲ။ 

 Robert Downey Jr.ရဲ့ဇနီးအတွက် တည်ဆောက်ထားတဲ့ရုံးခန်းထဲမှာဆိုရင်လည်း ပြန်လည်အသုံးပြုနိုင်တဲ့ပစ္စည်းတွေနဲ့ တည်ဆောက်ထားတဲ့နံရံ၊ လေးထောင့်မကျ အဝိုင်းမကျ ထူးခြားတဲ့ပုံစံနဲ့ပြတင်းပေါက်၊ ခေတ်မီဆန်းသစ်ပြီး တန်ဖိုးကြီးမားတဲ့ အသုံးအဆောင်ပစ္စည်းတွေကိုမြင်တွေ့ရမှာပဲဖြစ်ပါတယ်။

အိမ်အတွင်းပိုင်းတစ်ခုလုံးကို ဆန်းသစ်တဲ့အသုံးအဆောင်ပစ္စည်းတွေ၊ ပရိဘောဂတွေ၊ အလှဆင်ပစ္စည်းတွေနဲ့ ဖွဲ့စည်းထားပြီး ဧည့်ခန်းမှာထားရှိတဲ့ Bubble ပုံစံ ဆိုဖာဟာဆိုရင် ဒေါ်လာ (၉၀၀၀) ကျော်တန်ဖိုးရှိတယ်လို့သိရပြီး အလှဆင်မီးအိမ်ဟာဆိုရင်တော့ ဒေါ်လာ (၂၆၀၀) ဝန်းကျင်ရှိတယ်လို့သိရပါတယ်။ အခန်းတိုင်းမှာ ပျမ်းမျှဒေါ်လာ (၃၃၀၀) တန်ဖိုးရှိတဲ့ တန်ဖိုးကြီးဆိုဖာထိုင်ခုံတွေရှိပြီး ကလေးတွေအတွက် ကိုယ်ပိုင်ကစားခန်းတစ်ခန်းလည်း ဖွဲ့စည်းထားတာမြင်တွေ့ရပါတယ်။ ကလေးတွေရဲ့အခန်းမှာဆိုရင် နာမည်ကြီးဒီဇိုင်နာဖန်တီးထားတဲ့ လူဝင်ဆန့်နိုင်တဲ့အရွယ် ငှက်သိုက်အိမ်အကြီးကြီးကို မြင်တွေ့နိုင်သလို Gas Mask တပ်ထားတဲ့ Mickey Mouse ရုပ်ထုကိုလည်း မြင်တွေ့နိုင်ပါတယ်။



အိမ်အပြင်ဘက်ခြံဝန်းထဲမှာ‌တော့ ထူးခြားတဲ့ပုံစံနဲ့ ကျောက်စိုင်ကျောက်တုံးတွေ၊ သစ်ပင်ပုလေးတွေနဲ့အလှဆင်ဖွဲ့စည်းထားတာတွေ့ရပြီး ရေကူးကန်ကျယ်ကြီးကနေလည်း သဘာဝအလှရှုခင်းတွေကို လွတ်လပ်ပေါ့ပါးစွာ ခံစားကြည့်ရှုနိုင်ပါသေးတယ်။ 

ခြံကျယ်ကြီးထဲမှာ ဘတ်စ်ကတ်ဘောကစားကွင်း၊ တင်းနစ်ကွင်းတွေလည်းရှိပြီး ကျယ်ပြန့်လှတဲ့ကားပါကင်လည်းပါရှိတဲ့အပြင် ကလေးတွေအတွက် ကလေးစီးကား၊ ဆိုင်ကယ်တွေထားဖို့ သီးသန့်နေရာလည်း သတ်မှတ်ပေးထားပါသေးတယ်။
 


အခုပြောပြခဲ့တာကတော့ Robert Downey Jr. ရဲ့ (၇)ဧကကျယ်ဝန်းတဲ့ခြံဝန်းကြီးမှာ တည်ရှိတဲ့ ထူးခြားဆန်းသစ်ခေတ်ရှေ့ပြေးဒီဇိုင်းနဲ့ ဇိမ်ခံအိမ်ကြီးအကြောင်းပဲဖြစ်ပါတယ်။ စာဖတ်ပရိသတ်တွေထဲမှာရော Iron Man ပရိသတ်တွေရှိကြလား။ Robert ရဲ့ အိမ်ကြီးအကြောင်းကို ခရေစေ့တွင်းကျသိလိုက်ရလို့ ကျေနပ်ကြမယ်ထင်ပါတယ်နော်။ 

နောက်တစ်ပတ်တွေမှာလည်း ကမ္ဘာတစ်ဝှမ်းက ထူးထူးခြားခြားအိမ်ကြီးတွေနဲ့ စိတ်ဝင်စားစရာကောင်းတဲ့ဗဟုသုတွေကို ပြောပြပေးသွားဦးမှာမို့ Shwe Property Website ကို လာရောက်လည်ပတ်ဖတ်ရှု့ပေးကြပါဦးလို့ ဖိတ်ခေါ်လိုက်ပါရစေနော်။

Posted By : Ra Wai (ShweProperty.com)