ရန်ကုန်တိုင်းဒေသကြီးမြို့နယ် ၆ ခုအတွင်းရှိ နေထိုင်ရေးအခက်အခဲရှိသူများအတွက် တန်ဖိုးနည်း၊ တန်ဖိုးသင့် အစုအဖွဲ့ပိုင်အိမ်ရာများကို လာမည့် စက်တင်ဘာလအတွင်း စတင်အကောင်အထည်ဖော်မည်ဖြစ်ကြောင်း Women for the world (ပျိုမေ့အိမ်လူမှုဖွံ့ဖြိုးတိုးတက်ရေးအသင်း - အင်းစိန်)မှ သိရသည်။
''စနစ်ကတော့ စနေပြီပေါ့။ ၉ လပိုင်းလောက်ဆိုရင် မြေမြင်လုပ်ငန်းတွေ လုပ်အောင်ပေါ့။ အခုက လူထုတွေ့ဆုံမှုတွေ၊ သဘောတရားပြောပြတာတွေစနစ်တွေကို ပြောပြနေတာပေါ့။ အကုန်လုံး ပြင်ဆင်ပြီးပြီဆိုရင် ဒီဇိုင်းကလည်း ရပ်ရွာလူထုတွေနဲ့တွေ့ဆုံပြီး ဆွဲနေကြပြီ။ မြေနေရာကိုလည်း အစိုးရကနေ ရပြီဆိုရင် မြေနေရာခြံစည်းရိုးခတ်တာတွေ၊ မြေကွက်ပုံဖော်တာတွေ အကွက်ရိုက်တာတွေ လုပ်ရမယ်ပေါ့။ လုပ်ပြီးရင် ၉ လပိုင်းဆိုရင် စတင်နိုင်မယ်လို့ ခန့်မှန်းထားတယ်''ဟု ပျိုမေ့အိမ်လူမှုဖွံ့ဖြိုးတိုးတက်ရေးအသင်း (အင်းစိန်)တည်ထောင်သူ ဒေါ်ဗန်လီဇာအောင်က News Watch သို့ ပြောသည်။
အစုအဖွဲ့ပိုင်အိမ်ရာများ ဖော်ဆောင်မည့် မြို့နယ်များမှာ လှိုင်သာယာ၊ ရွှေပြည်သာ၊ ဒဂုံတောင်၊ ဒဂုံမြောက်၊ ဒဂုံအရှေ့၊ ဒဂုံဆိပ်ကမ်းမြို့နယ်များဖြစ်ပြီး တမြို့နယ်လျှင် အိမ်ရာအခန်း တသောင်းနှုန်းစီလျာထားကာ မြို့နယ်အားလုံး တပြိုင်နက်တည်းဖော်ဆောင်မည်ဟုသိရသည်။ အိမ်ရာဖော်ဆောင်ရာတွင် ရန်ကုန်တိုင်း ဒေသကြီးအစိုးရက မြေနေရာပေးခြင်း၊ ရေ၊ မီး၊ လမ်း စသည့် အခြေခံအဆောက်အအုံများ တည်ဆောက်ပေးခြင်းများ ပံ့ပိုးပေးမည်ဖြစ်ပြီး ပျိုမေ့အိမ်လူမှုဖွံ့ဖြိုးတိုးတက်ရေးအသင်းမှ ရပ်ရွာလူထုအား စာရင်းဇယားပြုလုပ်ခြင်း၊ အချက်အလက်ကောက်ခံခြင်း၊ ငွေစုငွေချေးဖွဲ့စည်းခြင်း စသည့် နည်းပညာများ သင်ကြားပေးခြင်း၊ ပြည်သူလူထုနှင့် ဗိသုကာပညာရှင်များ၊ နည်းပညာရှင်များ ချိတ်ဆက်ပေး၍ အိမ်ပုံစံ ဒီဇိုင်းများကို အတူတကွပူးပေါင်းရေးဆွဲခြင်းတို့ ဆောင်ရွက်ပေးမည်ဖြစ်ပြီး အကယ်၍ ရပ်ရွာလူထုမှ စုပေါင်းငွေမလုံလောက်၍ ချေးငွေလိုအပ်ပါက မြန်မာနိုင်ငံ အသေးစားချေးငွေလုပ်ငန်း (MSI) နှင့် ချိတ်ဆက်ပေးခြင်းတို့ပြုလုပ်ကာ ပံ့ပိုးကူညီသွားမည်ဖြစ်ကြောင်း သိရသည်။
''အခုဆိုရင် အဲဒီနေရာတွေကို စာရင်းကောက်နေတာတို့၊ ငွေစုငွေချေး ဖွဲ့နေတာတွေတော့လုပ်နေပြီ။ စီမံကိန်း အရ တမြို့နယ် တသောင်းစီလုပ်ဖို့ လျာထားတယ်ပေါ့။ သို့သော်လည်း မြို့နယ်တမြို့နယ်မှာ ရပ်ကွက်တွေက အရမ်းများတော့ တချို့ရပ်ကွက်တွေမှာ ကျူးရှိတယ်။ တချို့ရပ်ကွက်တွေမှာ ကျူးမရှိဘူး။ အဲဒီတော့ ကျွန်မတို့က မြို့နယ်တခုဆိုရင် ရပ်ကွက် သုံး၊ လေးခု လောက်စဆင်းတာပေါ့။ လုပ်ပြီးတော့မှ ဒီစီမံကိန်းအကြောင်း လေး ဟောပြောပွဲလုပ်တာပေါ့။ အဓိက လူထုက ဒီစီမံကိန်းကို နားလည်ဖို့လိုတယ်လေ။ ပြီးတော့ ဖော်ဆောင်မယ့်အိမ်ရာစီမံကိန်းအကြောင်းကို ပြောပြတယ်။ ဒါက အစိုးရမြေပေါ့။ အိုးအိမ်ဆောက်တဲ့အခါကျရင် ကိုယ်က ပိုက်ဆံရှိရင် ကိုယ့်ပိုက်ဆံနဲ့ ကိုယ်ဆောက်ရမယ်။ ပိုက်ဆံမရှိဘူးဆိုရင် ချေးရမယ်ဆိုတာကို ပြောပြတော့ တချို့အိမ်ရာတကယ်အခက်အခဲရှိတဲ့သူတွေက တော်တော်စိတ်ဝင်စား ကြတယ်''ဟု ဒေါ်ဗန်လီဇာအောင်က ပြောသည်။
လက်ရှိအချိန်တွင် အစုအဖွဲ့ပိုင် တန်ဖိုးနည်းအိမ်ရာဖော်ဆောင်ပေးရေးအတွက် လူဦးရေစာရင်းများ ကောက်ယူထားမှုများရှိနေပြီး ယင်းစာရင်းများ ကောက်ယူရာတွင်လည်း ကျူးကျော်နေထိုင်သူများသာမကဘဲ အဆောင်ငှားနေသူများ၊ နေထိုင်ရေးခက်ခဲနေသူများကိုလည်း ကောက်ယူခြင်းဖြစ်ကြောင်း၊ ကောက်ယူထားသည့် စာရင်းများအရ လှိုင်သာယာတွင် ၂၆ဝဝ ကျော်အနက် အိမ်ရာလိုချင်သူ ၇ဝဝ ဝန်း ကျင်၊ ရွှေပြည်သာ၊ ဒဂုံဆိပ်ကမ်းတို့တွင် စာရင်းကောက်ယူထားမှုများအရ တမြို့နယ်လျှင် အိမ်ရာလို အပ်ချက်ရှိသူ ၁ဝဝဝ ဝန်းကျင် အိမ်ရာလိုအပ်ချက်ရှိနေကြောင်း ကျန်သည့်မြို့နယ်များသို့လည်း မြေပြင်ကွင်းဆင်း၍ လူထု တွေ့ဆုံဆွေးနွေးမှုများ ပြုလုပ်နေကြောင်း ပျိုမေ့အိမ်လူမှုဖွံ့ဖြိုးတိုးတက်ရေးအသင်းမှ သိရသည်။
ထို့အပြင် ဝန်ကြီးချုပ်ဦးဖြိုးမင်းသိန်းကလည်း ရန်ကုန်တိုင်းဒေသကြီးအတွင်းရှိ နေထိုင်စရာ အခက်အခဲဖြစ်နေသည့် ကျုးကျော်များကို လာမည့် ၆ လအတွင်း နေထိုင်စရာတိုက်ခန်း စီစဉ်ပေးနေနိုင်ရေး အတွက် ပျိုမေ့အိမ်လူမှုဖွံ့ဖြိုးတိုးတက်ရေးအသင်းနှင့် ဆက်သွယ်ကာ ပြင်ဆင်နေပြီဖြစ်ကြောင်း ဇွန် ၃ ရက်က ပြုလုပ်သော ရန်ကုန်မြို့၏ အနာဂတ် ဖွံ့ဖြိုးတိုးတက်မှုကို ဦးတည်သွားမည့် Yangon Project Bank အကြောင်းကို ရှင်းလင်းခြင်းအခမ်းအနားတွင် ပြောကြားထားသည်။ ထို့အပြင် မြေနေရာများကို ဆောက်လုပ်ရေးဝန်ကြီးဌာနနှင့် ရန်ကုန်စည်ပင်သာယာတို့နှင့် ပေါင်းစပ်ဆောင်ရွက်သွားမည်ဖြစ်ပြီး ကျူးကျော်နေထိုင်သူများအတွက် ချေးငွေတခုရယူကာ အိမ်ရာများ တည်ဆောက်ဆောက်သွားမည်ဖြစ် ကြောင်း ဝန်ကြီးချုပ်က ပြောကြားခဲ့သည်။
Ref & Photo Credit : News Watch
Posted By : Sint Sint (ShweProperty.com)
Property Sales Event
နောက်ဆုံးရ သတင်းများ
For Sale
For Rent
New Homes
other properties
