မြရည်နန္ဒာတန်ဖိုးနည်းအိမ်ရာ စီမံကိန်း ပုံမှန်အတိုင်းဆက်လုပ်မည်

Property Titles

By The Modern Weekly, Shweproperty.com

Updated at 16 June 2013

ကျူးကျော်သူလို့ စွပ်စွဲခံရသူတွေ ဝိုင်းဝန်းကန့်ကွက်နေတဲ့ ချမ်းမြေသာစည်မြို့နယ် အတွင်းက မြနန္ဒာ တန်ဖိုးနည်းအိမ်ရာစီမံကိန်းကို ဒေါ်အောင်ဆန်းစုကြည်ရဲ့ တရားဥပဒေ စိုးမိုးရေးနှင့် တည်ငြိမ်အေးချမ်းမှုကော်မတီက ကြားဝင်ဆွေးနွေးပေးမယ်ဆိုပေမဲ့ အိမ်ရာစီမံကိန်း ကို ပုံမှန်အတိုင်းဆက်လုပ်သွားမယ်လို့ မန္တလေးမြို့တော်စည်ပင်သာယာရေးကော်မတီ MCDC ရဲ့တွဲဖက်အတွင်းရေးမှူး ဦးသက်နိုင်ထွန်းက ပြောပါတယ်။

စီမံကိန်းတည်ဆောက်မယ့် အစိုးရပိုင် မြေနေရာတွေမှာ ဝင်ရောက်သူတွေကို ကျူးကျော်သူတွေလို့သတ်မှတ်ပြီး မန္တလေးမြို့တော်စည်ပင်က ၂၀၁၂ ခုနှစ်၊ စက်တင်ဘာလ ၁၇ ရက်နေ့မှာ စက်ယန္တရားတွေအသုံးပြုပြီး နေအိမ်တွေကို ဖယ်ရှားခဲ့ပါတယ်။

ယခုလ ၉ ရက်နေ့က ဒေါ်အောင်ဆန်းစုကြည်ရဲ့ပြင်ဦးလွင် လူထုတွေ့ဆုံပွဲမှာ မြရည်နန္ဒာမြို့သစ်မှ နေအိမ်ဖျက်ဆီးခံထားရသူတစ်ဦးက သူနေထိုင်ရာမြို့သစ်မှာ မြေယာတွေမတရားသိမ်းတာမျိုးတွေ ရှိနေတာကြောင့် ဒေါ်အောင်ဆန်းစုကြည်အနေနဲ့ ကူညီပေးဖို့ တောင်းဆိုခဲ့ပါတယ်။ ဒေါ်အောင်ဆန်းစုကြည်ကလဲ သူမရဲ့တရားဥပဒေစိုးမိုးရေးနှင့် တည်ငြိမ်အေးချမ်းရေးကော်မတီအနေနဲ့ သက်ဆိုင်ရာဌာနကို မေးမြန်းစုံစမ်းပေးမယ်လို့ ဖြေကြားခဲ့ပါတယ်။

တွဲဖက်အတွင်းရေးမှူးဦးသက်နိုင်ထွန်းက ‘သူတို့ဘက်က ဆက်သွယ်လာရင်လဲ အစိုးရအဖွဲ့က စီမံခန့်ခွဲတဲ့အတိုင်း ဆက်လုပ်သွားမယ်၊ တစ်ဦးတစ်ယောက်အတွက်လုပ်တာမဟုတ်ဘဲ အများ ကောင်းဖို့လုပ်တာမို့ ဆက်လုပ်သွားမယ်၊ ရောင်းမှားဝယ်မှားဖြစ်သူတွေကို အကျိုးအကြောင်း ခိုင်လုံရင် ဦးစားပေးရောင်းဖို့ စီစဉ်ထားတယ်’လို့ ပြောပါတယ်။

Ref: The Modern Weekly

Follow Us On