လက်ရှိဘဏ္ဍာနှစ်၌ မြန်မာနိုင်ငံသား ရင်းနှီးမြှုပ်နှံသူများအနေဖြင့် ဆောက်လုပ်ရေးကဏ္ဍ၊ စက်မှုကဏ္ဍ၊ အိမ်ရာအဆောက်အအုံကဏ္ဍ၊ ဟိုတယ်နှင့် ခရီးသွားကဏ္ဍနှင့် လယ်ယာကဏ္ဍများတွင် ပိုမိုရင်းနှီးမြှုပ်နှံလာကြကြောင်း မြန်မာနိုင်ငံရင်းနှီးမြှုပ်နှံမှုကော်မရှင်၏ သတင်းထုတ်ပြန်ချက် အမှတ်စဉ် (၉/ ၂၀၂၀) တွင် ဖော်ပြထားသည်။
မြန်မာနိုင်ငံ ရင်းနှီးမြှုပ်နှံမှု ကော်မရှင်အစည်းအဝေးအမှတ်စဉ် (၉/ ၂၀၂၀) အပါအဝင် ရက်သတ္တပတ်အတွင်း မြန်မာနိုင်ငံသား ရင်းနှီးမြှုပ်နှံမှု အဆိုပြုလုပ်ငန်းသုံးခုနှင့် အတည်ပြုလုပ်ငန်း ၁၄ ခု စုစုပေါင်းလုပ်ငန်း ၁၇ ခု ခွင့်ပြုခဲ့သည်။
အဆိုပါလုပ်ငန်းများအား မြန်မာနိုင်ငံရင်းနှီးမြှုပ်နှံမှုကော်မရှင်မှ အဆိုပြုလုပ်ငန်းသုံးခု၊ အတည်ပြုလုပ်ငန်းသုံးခု၊ ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီမှ အတည်ပြုလုပ်ငန်းတစ်ခု၊ ဧရာဝတီတိုင်းဒေသကြီး ရင်းနှီးမြှုပ်နှံမှုကော်မတီမှ အတည်ပြုလုပ်ငန်းသုံးခု၊ တနင်္သာရီတိုင်းဒေသကြီးရင်းနှီး မြှုပ်နှံမှုကော်မတီမှ အတည်ပြုလုပ်ငန်းနှစ်ခု၊ ရှမ်းပြည်နယ် ရင်းနှီးမြှုပ်နှံမှုကော်မတီမှ အတည်ပြုလုပ်ငန်းနှစ်ခု၊ ကချင်ပြည်နယ် ရင်းနှီးမြှုပ်နှံမှုကော်မတီမှ အတည်ပြုလုပ်ငန်းတစ်ခုနှင့် ကယားပြည်နယ်ရင်းနှီးမြှုပ်နှံမှု ကော်မတီမှ အတည်ပြုလုပ်ငန်းနှစ်ခု ခွင့်ပြုပေးခဲ့သည်။ အဆိုပါလုပ်ငန်းများ၏ရင်းနှီးမြှုပ်နှံမှု ပမာဏမှာ ဒေါ်လာ ၁၅ ဒသမ ၁၀၂ သန်းအပါအဝင် ကျပ် ၆၀၆၆၉ ဒသမ ၁၃၅ သန်းဖြစ်ပြီး ပြည်တွင်းလုပ်သားများအတွက် အလုပ်အကိုင် အခွင့်အလမ်းပေါင်း ၄၇၈၃ ခုကို ဖန်တီးပေးမည်ဖြစ်သည်။
ခွင့်ပြု/ အတည်ပြုလုပ်ငန်း ၁၇ ခုမှာ စက်မှုကဏ္ဍမှ ခုနစ်ခု၊ ရေနံနှင့်သဘာဝဓာတ်ငွေ့ကဏ္ဍမှ တစ်ခု၊ အခြားကဏ္ဍမှငါးခု၊ လျှပ်စစ်ကဏ္ဍမှနှစ်ခု၊ ဟိုတယ်ကဏ္ဍမှ တစ်ခုနှင့် လယ်ယာကဏ္ဍမှ တစ်ခုဖြစ်သည်။
၂၀၁၉ -၂၀၂၀ ဘဏ္ဍာနှစ် အောက်တိုဘာ ၁ ရက်မှ ဇူလိုင် ၁၀ ရက်အထိ မြန်မာနိုင်ငံသား ရင်းနှီးမြှုပ်နှံမှု ခွင့်ပြု/ အတည်ပြုမှုမှာ ရင်းနှီးမြှုပ်နှံမှုလုပ်ငန်း ၁၀၄ ခု၊ ဒေါ်လာ ၂၀၄ ဒသမ ၅၁၀ သန်းအပါအဝင် ကျပ် ၁၁၆၂၂၇၂ ဒသမ ၂၈၀ သန်းဖြစ်သည်။ ရင်းနှီးမြှုပ်နှံမှု တိုးမြှင့်ခြင်း အပါအဝင် ရင်းနှီးမြှုပ်နှံမှုပမာဏမှာ ဒေါ်လာ ၃၀၈ ဒသမ ၃၉၄ သန်းအပါအဝင် ကျပ် ၁၄၅၄၄၄၅ ဒသမ ၃၇၀ သန်းဖြစ်သည်။
COVID-19 ကြောင့် မြန်မာနိုင်ငံ၏ စီးပွားရေးအပေါ် အကျိုးသက်ရောက်မှုများ ရှိနေသော်လည်း ပြည်ပရင်းနှီးမြှုပ်နှံမှုများ သာမက ပြည်တွင်းရင်းနှီးမြှုပ်နှံမှုများလည်း တိုးတက်လျက်ရှိပြီး လက်ရှိလုပ်ကိုင်နေသည့် ရင်းနှီးမြှုပ်နှံမှုလုပ်ငန်းများမှ ရင်းနှီးမြှုပ်နှံမှုပမာဏတိုးမြှင့်ခြင်း၊ လုပ်သားအင်အား တိုးမြှင့်ခြင်းများရှိနေကြောင်း သိရသည်။
၂၀၁၉ -၂၀၂၀ ဘဏ္ဍာနှစ် အောက်တိုဘာ ၁ ရက်မှဇူလိုင် ၁၀ ရက်အထိ ၁၀ လနီးပါးအတွင်း နိုင်ငံခြားတိုက်ရိုက်ရင်းနှီးမြှုပ်နှံမှုပမာဏ ဒေါ်လာ ၄ ဒသမ ၆ ဘီလျံကျော် ဝင်ရောက်ထားကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင်၏ သတင်းထုတ်ပြန်ချက် အမှတ်စဉ် (၉/၂၀၂၀) အရ သိရသည်။
၂၀၁၉ -၂၀၂၀ ဘဏ္ဍာနှစ်တွင် နိုင်ငံခြားရင်းနှီးမြှုပ်နှံမှုပမာဏ ဒေါ်လာ ၅ ဒသမ ၈ ဘီလျံ ဝင်ရောက်ရန်လျာထားသဖြင့် လက်ရှိဘဏ္ဍာနှစ် လျာထားချက်ပြည့်မီရန် ဒေါ်လာ ၁ ဒသမ ၂ ဘီလျံကျော်သာ လိုတော့ကြောင်း သိရသည်။
COVID-19 အလွန်တွင် ရင်းနှီးမြှုပ်နှံမှုများ အဆက်မပြတ်စီးဝင်လာမည်ဟု မျှော်လင့်ရကြောင်းနှင့် ယခုနှစ်အတွက် ရင်းနှီးမြှုပ်နှံမှု လျာထားချက်ဖြစ်သည့် ဒေါ်လာ ၅ ဒသမ ၈ ဘီလျံ သတ်မှတ်ကာလအတွင်း ပြည့်မီနိုင်ကြောင်း ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသောင်းထွန်းက ပြောကြားသည်။
Ref & Photo Credit: Eleven Media Group
Posted By: Ra Wai (ShweProperty.com)
Property Sales Event
နောက်ဆုံးရ သတင်းများ
For Sale
For Rent
New Homes
other properties
