ကြည့်မြင်တိုင် တဖက်ကမ်း ရန်ကုန်မြို့သစ်စီမံကိန်းကို တိုင်းဒေသကြီး အစိုးရအဖွဲ့၏ ကြီးကြပ်မှုဖြင့် အကောင်အထည် ဖော်ဆောင်သွားမည် ဖြစ်ကြောင်း ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ပြောသည်။
ဝန်ကြီးချုပ် ဦးဖြိုးမင်းသိန်းက “မြေတွေကို ဖော်ထုတ်နိုင်ဖို့အတွက် ကြည့်မြင်တိုင် တဖက်ကမ်း မြို့သစ်စီမံကိန်းကြီး အကောင်အထည်ဖော်ဖို့လည်း ပြင်ဆင်နေပါပြီ။ ဆောင်ရွက်ဖို့ အဆင့်တဆင့် ရောက်နေပါပြီ” ဟု ပြောသည်။
ဖေဖော်ဝါရီ ၁ ရက်က ကုန်သည်စက်မှု အသင်းချုပ် (UMFCCI) တွင် ပြုလုပ်သော ဒုသမ္မတ ၁ ဦးမြင့်ဆွေနှင့် မြန်မာ့စီးပွား ရေး လုပ်ငန်းရှင်များ လစဉ်ပုံမှန် တွေ့ဆုံပွဲတွင် ယင်းသို့ ပြောကြားလိုက်ခြင်း ဖြစ်သည်။
အဆိုပါ စီမံကိန်းကို ပြီးခဲ့သည့် ပထမအကြိမ် လွှတ်တော်တွင် လုပ်ခွင့်ပြုခြင်း၊ မပြုခြင်းကို မဲခွဲ ဆုံးဖြတ်ခဲ့ပြီး နောက်ဆုံးတွင် ခွင့်ပြုခဲ့ခြင်းကြောင့် တိုင်းအစိုးရမှ ပြည်ထောင်စု အစိုးရအဖွဲ့သို့ သဘောထားတောင်းခံ၍ ယင်းသဘောတူချက်နှင့် ပြည်ထဲ ရေး ဝန်ကြီးဌာနမှ မြေသိမ်းအမိန့်ထွက်ရှိထားကြောင်း ဝန်ကြီးချုပ်က ပြောကြားသည်။
“မြေသိမ်းမိန့်ဆိုတာက အခု အစိုးရလက်ထက်မှာ မဟုတ်ပါဘူး။ ပြီးခဲ့တဲ့ အစိုးရလက်ထက်ကတည်းက မြေသိမ်းမိန့် ထုတ် ထားပြီးသားပါ။ လျှော်ကြေးငွေ ဆိုတာက ဟိုတလောက လယ်သမားတွေကို ၂၀ ရာခိုင်နှုန်း မြို့မြေအဖြစ် ပြန်ပေးမယ်လို့ ပြောတယ်။ လယ်သမားတွေ သဘောတူ/မတူဆိုတဲ့ဟာမျိုးတော့ သိပ်ပြီးတော့ ဆောင်ရွက်တာ မရှိသေးဘူး။ မြေသိမ်းမိန့် ဆိုတာ ဒီနေရာမှာ မြို့သစ်စီမံကိန်းလုပ်မယ်။ ဒါကို အဲဒီနေရာမှာ ရှိတဲ့ လယ်သမားတွေ အားလုံးလည်း သိတယ်။ စီမံကိန်း ကတော့ ကြည့်မြင်တိုင် တဖက်ကမ်းမှာပါ” ဟု ဆိပ်ကြီးခနောင်တိုမြို့နယ် မဲဆန္ဒနယ် အမှတ် (၁) လွှတ်တော် ကိုယ်စား လှယ် ဒေါ်စန္ဒာမင်းက ပြောသည်။
ဦးသိန်းစိန်အစိုးရလက်ထက်က ရန်ကုန်မြိ့သစ်စီမံကိန်း အကောင်အထည်ဖော်ရန် ရန်ကုန် အနောက်တောင်ဒေသ ဖွံ့ဖြိုး ရေး အများနှင့် သက်ဆိုင်သော ကုမ္ပဏီ၊ Business Capital City Development နှင့် ရွှေသံလွင်ကုမ္ပဏီခွဲ ဖြစ်သည့် ရွှေပုပ္ပား ကုမ္ပဏီတို့အား လုပ်ကိုင်ခွင့်ပြုခဲ့ခြင်းဖြစ်သည်။
ဆက်လက်၍ ဝန်ကြီးချုပ် ဦးဖြိုးမင်းသိန်းက “ဒါပေမယ့် ပုဂ္ဂလိက ကုမ္ပဏီတွေရဲ့ ဆောင်ရွက်မှုမှာ ဘာလို့လဲဆိုတော့ အာဏာစက်မရှိတဲ့ အတွက် ဖွံ့ဖြိုးတိုးတက်အောင် မလုပ်နိုင်ပါဘူး။ ဒါကြောင့်မို့ တိုင်းအစိုးရအဖွဲ့ရဲ့ ကြီးကြပ်မှုနဲ့ စီမံကိန်းကြီးက အကောင် ထည်ဖော်မှာ ဖြစ်ပါတယ်” ဟု ရှင်းလင်း ပြောကြားသည်။
ထိုကဲ့သို့ မြို့သစ်စီမံကိန်း အကောင်အထည်ဖော်ရခြင်းမှာ မြန်မာနိုင်ငံ ရင်းနှီးမြှုပ်နှံမှု ကော်မရှင် (MIC)မှ ဖြစ်စေ၊ ရန်ကုန် တိုင်းဒေသကြီး ရင်းနှီးမြှုုုပ်နှံမှုကော်မတီမှ ဖြစ်စေ မည်သည့် လုပ်ငန်းကဏ္ဍကို မဆို ရန်ကုန်တိုင်းအတွင်း၌ ခွင့်ပြုမိန့်ရရှိပြီး လုပ်ကိုင်မည်ဆိုလျှင် တိုင်းအစိုးရအဖွဲ့မှ ကူညီသွားရန် အတွက် ဖြစ်ကြောင်း သိရသည်။
မြို့သစ်စီမံကိန်း တည်ဆောက်ရာတွင် ကျူးကျော်အိမ်ရာစီမံကိန်းများ၊ တန်ဖိုးနည်းအိမ်ရာ စီမံကိန်းများနှင့် စက်မှုလက်မှု အစရှိသည့် ဖွံ့ဖြိုးတိုးတက်မှု များစွာ ပါဝင်သော လုပ်ငန်းများကို ထည့်သွင်းဆောင်ရွက်သွားမည် ဖြစ်ကြောင်း ဝန်ကြီးချုပ် ဦးဖြိုးမင်းသိန်းက ပြောသည်။
“ဒီအခြေအနေမှာ စက်ရုံ၊ အလုပ်ရုံ ရင်းနှီးမြှုပ်နှံလိုသူများအတွက် ရန်ကုန်တိုင်းဒေသကြီးရင်းနှီးမြှုပ်နှံမှု ကော်မတီဘက် ကနေ စီမံဆောင်ရွက်ပေးနိုင်မယ်ဆိုတာ အသိပေးပါရစေ”ဟု ဝန်ကြီးချုပ်က ပြောသည်။
ယင်းအပြင် စက်မှုဇုန်များ အဆင့်မြှင့်တင်ရာတွင် အချို့နေရာများကို ဖယ်ရှားရမည် ဖြစ်သောကြောင့် ၎င်းတို့အတွက် အခွင့်အလမ်းများ ပိုပေးခြင်း၊ မြေဧကနေရာ ပိုပေးများကိုလည်း ပြုလုပ်ပေးသွားမည်ဟု ရန်ကုန် တိုင်းဒေသကြီး အစိုးရအဖွဲ့မှ သိရသည်။
ကြည့်မြင်တိုင်မြို့နယ်တိုင်းဒေသကြီး လွတ်တော်ကိုယ်စားလှယ် ဦးကျော်နန္ဒအောင်က “အရင်လွှတ်တော်မှာ ဆွေးနွေး သွားတာ မှန်တယ်။ အစိုးရပိုင်းကလည်း လွှတ်တော်တင်ဖို့ လုပ်နေတာ မှန်တယ်။ ဒါပေမယ့် လက်ရှိအချိန်ထိတော့ ဒါနဲ့ ပတ်သက်ပြီး တရားဝင် အကြောင်းကြားတာတွေ အခု လွှတ်တော်မှာ တင်တာတွေတော့ မရှိသေးဘူး” ဟု ဧရာဝတီသို့ ပြောသည်။
ထိုကြောင့် စီမံကိန်းနှင့် ပတ်သက်ပြီး အသေးစိတ် အချက်အလက်များကို မသိရှိရသေးကြောင်း လွှတ်တော်ကိုယ်စားလှယ်များ ထံမှ သိရသည်။
Ref & Photo Credit : Irrawaddy Burma
Posted By : Ra Wai (ShweProperty.com)
Property Sales Event
နောက်ဆုံးရ သတင်းများ
For Sale
For Rent
New Homes
other properties
