အိုးပိုင်အိမ်ပိုင်မရှိသူများအတွက် တည်ဆောက်လျက်ရှိသည့် မဟာဗန္ဓုလ အငှားအိမ်ရာတွင် နေထိုင်နိုင်ရန် လျှောက်ထားခွင့်ကို ယနေ့နံနက်ပိုင်းက စတင်လက်ခံခဲ့ရာ လာရောက်စုံစမ်းသူများနှင့် လျှောက်ထားသူ များပြားခဲ့ကြောင်း ရန်ကုန်တိုင်းဒေသကြီး အစိုးရအဖွဲ့ရုံးမှ သိရသည်။
''လျှောက်လွှာတွေ စတင်လက်ခံတဲ့နေ့မှာ လာလျှောက်တဲ့သူ အတော်များပါတယ်။ အားလုံးပေါင်းရင် လူဦးရေ ၁ဝဝဝ လောက်ရှိတယ်။ အဲဒီထဲမှာ လာရောက်စုံစမ်းတဲ့ သူတွေရှိသလို အချက်အလက်မစုံလို့ ပြန်သွားကြသူ တွေလည်းရှိပါတယ်''ဟု ရန်ကုန်တိုင်းဒေသကြီး အစိုးရအဖွဲ့ရုံးမှ တာဝန်ရှိသူတစ်ဦးက ပြောသည်။
ထိုသို့လာရောက်လျှောက်ထားမှုနှင့် ပတ်သက်၍ ရန်ကင်းမြို့နယ် စည်ပင်တိုက်ခန်းနေ (အငြိမ်းစားဝန်ထမ်း) ဦးထွန်းရွှေက ''သတင်းစာထဲကနေသိပြီး လာလျှောက် ခဲ့တာပါ။ လက်ရေးမူနဲ့ လျှောက်လို့ရတယ်ဆိုပေမယ့် မြို့နယ်အထွေထွေအုပ်ချုပ်ရေးရုံးက နမူနာပုံစံအတိုင်း စာစီပြီးလျှောက်ခဲ့တယ်။ အခက်အခဲအနေနဲ့တော့ မရှိပါဘူး။ လူများတော့ တိုးနေရတာလောက်ပဲရှိပါတယ်။ အရင်တုန်းက မြေကွက်တို့၊ တိုက်ခန်းတို့ ပေးတုန်းကလည်း လျှောက်ခဲ့ဖူးတယ်။ မရခဲ့ပါဘူး။ အခုလည်း မျှော်လင့်ချက်နဲ့ ထပ်လျှောက်တာပါ။ အစိုးရအနေနဲ့ အခုလိုစီစဉ်ပေးတော့ အိုးပိုင်အိမ်ပိုင်မရှိတဲ့သူတွေအတွက် အပြောင်းအလဲ ဖြစ်သွားနိုင်တယ်။ မဲစနစ်နဲဆိုတော့ ရ၊ မရ ဘယ်သူမှ အတိအကျမပြောနိုင်ဘူး။ ကံတရားပေါ်မူတည်ပါတယ်။ ကိုယ်မပေါက်လည်း တခြားသူပေါက်သွားရင် ဝမ်းသာပေးရမှာပါပဲ''ဟု ပြောသည်။
ထိုသို့လျှောက်ထားရာတွင် ရန်ကုန်တိုင်းဒေသကြီးအတွင်းအိမ်ထောင်စုလူဦးရေ သန်းခေါင်စာရင်း ပုံစံ ၆၆/၆ ရှိပြီး မြေကွက်၊ နေအိမ်ခန်း အိုးပိုင်အိမ်ပိုင်မရှိသူများသာ လျှောက်ထားခွင့်ရှိသည့်အတွက် လျှောက်ထားလိုသူများသည် မြေကွက်၊ နေအိမ်ခန်းပိုင်ဆိုင်မှုမရှိကြောင်း ကိုယ်တိုင်ဝန်ခံချက်၊ နိုင်ငံသားစိစစ်ရေးကတ်ပြားမိတ္တူ၊ အိမ်ထောင်စုလူဦးရေ သန်းခေါင်စာရင်းမိတ္တူ၊ မြေကွက်၊ နေအိမ်ခန်းပိုင်ဆိုင်မှုမရှိကြောင်း သက်ဆိုင်ရာ ရပ်ကွက်/ ကျေးရွာအုပ်ချုပ်ရေးမှူး၏ ထောက်ခံချက်များ ပူးတွဲ ထည့်သွင်းလျှောက်ထားရမည်ဖြစ်ပြီး နိုင်ငံ့ဝန်ထမ်းဖြစ်ပါက မြေကွက် ၊နေအိမ်ခန်းပိုင်ဆိုင်မှုမရှိကြောင်း ဌာနဆိုင်ရာ အကြီးအကဲ၏ထောက်ခံချက် ပါဝင်ရမည်ဖြစ်သည်။ အဆိုပါအချက်အလက်နှင့်ပြည့်စုံသည့် လျှောက်လွှာများကို ရန်ကုန်တိုင်းဒေသကြီး အစိုးရအဖွဲ့ရုံးတွင် ဖေဖော်ဝါရီ ၁ ရက်မှ ၁၅ ရက်အတွင်း လက်ခံလျက်ရှိကြောင်း သိရသည်။
အဆိုပါ မဟာဗန္ဓုလအငှားအိမ်ရာသည် ရန်ကုန်အရှေ့ပိုင်းခရိုင် ဒဂုံမြို့သစ်(တောင်ပိုင်း) မြို့နယ် အမှတ်(၂) လမ်းမကြီးနှင့် မဟာဗန္ဓုလလမ်းထောင့်တွင်တည်ရှိပြီး တစ်ခန်းလျှင် ၅၆၉ ဒသမ ၅ စတုရန်းပေရှိ အခန်းပေါင်း ၁၂ဝဝ ပါဝင်သည်။
ယင်းအိမ်ရာကို လာမည့်ဘတ်ဂျက်ကာလအတွင်း အပြီးတည်ဆောက်သွားရန်စီစဉ်လျက်ရှိပြီး အခန်းတစ်ခန်းလျှင် တစ်လ ကျပ် ၃ဝဝဝဝ နှုန်းဖြင့် ငှားရမ်းသွားမည်ဖြစ်သည့်အပြင် နေထိုင်နိုင်ရန် လျှောက်ထားသူ ၁၂ဝဝ ထက် ကျော်လွန်ပါက မဲစနစ်ဖြင့် စီစဉ်ဆောင်ရွက်ပေးသွား မည်ဖြစ်ကြောင်း သိရသည်။
Ref : MOI Webportal Myanmar
Photo Credit : MOI Webportal Myanmar
Posted By : Htet Mhuu
Property Sales Event
နောက်ဆုံးရ သတင်းများ
For Sale
For Rent
New Homes
other properties
