မြန်မာနိုင်ငံတွင် ပထမဆုံး ပင်လယ်ဘက်သို့ မျက်နှာမူထားပြီး လမ်းလျှောက်ဈေး၊ ကမ်းနားပန်းခြံတို့ဖြင့် ပေါင်းစပ်ထားသည့် Sea Viwe Condo အထပ်မြင့်အိမ်ရာ စီမံကိန်းကို မြိတ်မြို့တွင် ယခုလအတွင်း စတင်အကောင်ထည်ဖော်နိုင်မည်ဖြစ်ကြောင်း သိရသည်။
မြိတ်မြို့ ရေပုန်းရပ်ကွက် ကမ်းနားလမ်းတွင် အကောင်ထည် ဖော်ဆောင်ရွက်နေသည့် Sea Viwe Condo စီမံကိန်းမှာ အဆင့်မီလူနေ အိမ်ခန်းများ ပါဝင်မည်ဖြစ်သလို မြိတ်မြို့၏ ပထမဆုံး မိုးမျှော်အဆောက်အအုံများဖြစ်လာမည်ဖြစ်ကြောင်း သိရသည်။ အဆိုပါစီမံကိန်းနှင့်ပတ်သက်၍ EIA ၊ SIA (ပတ်ဝန်းကျင်ထိခိုက်မှု ဆန်းစစ်ခြင်းဆိုင်ရာ အသိပေးခြင်း) ကို ပြီးခဲ့သည့်ရက်ပိုင်းက ပြုလုပ်ခဲ့ပြီး မကြာမီလုပ်ငန်း စတင်တော့မည်ဖြစ်ကြောင်း သိရသည်။
“လုပ်ငန်းဘယ်တော့စနိုင်မလဲ ဆိုတာကတော့ အရှေ့က Commercial ကို မြို့နယ်စည်ပင်သာယာ ရေးကော်မတီရဲ့ခွင့်ပြုမိန့်နဲ့ ဆောက်လုပ်နေတာ ဖြစ်ပါတယ်။ ဒီစီမံကိန်းကိုတော့ တစ်နှစ်အတွင်း အပြီးသတ်မှာပါ။ ကွန်ဒိုအဆောက်အအုံကိုတော့ ခွင့်ပြုချက်ရပြီဆိုတာနဲ့ Face One ဖြစ်တဲ့အဆောက်အအုံ လေးလုံး ၂၂ ထပ်၊ ၂၈ ထပ်ပါတဲ့ လေးလုံးကိုတော့ နှစ်နှစ်အချိန်အတွင်း အပြီးသတ် တည်ဆောက်သွားမှာ ဖြစ်ပါတယ်” ဟု Sea Viwe Condo စီမံကိန်းဒါရိုက်တာ ဦးဟန်ထူးအောင်က ပြောကြားသည်။
အမြင့်ဆုံး ၃၂ ထပ်အထိ ပါဝင်မည့် အဆိုပါ အဆင့်မီအိမ်ရာစီမံကိန်းကို ယန်စီမြစ်အင်တာနေရှင်နယ်ကုမ္ပဏီက တာဝန်ယူတည်ဆောက်နေပြီး ၂၂ ထပ်မှ ၃၂ အထိ ပါဝင်မည့် အဆောက်အအုံပေါင်း ၁၂ လုံးရှိမည်ဖြစ်ကြောင်း သိရသည်။
“ကျွန်တော်တို့ကလည်း အစီအစဉ်တွေကို ရေးဆွဲတင်ပြရသလို တိုင်းဒေသကြီး စီမံခန့်ခွဲမှုကော်မတီကလည်း ဝန်ကြီးရဲ့လမ်းညွှန်ချက်နဲ့ ပေးအပ်တဲ့အတိုင်း၊ သတ်မှတ်ထားတဲ့ အချိန်ကာလအတွင်းပြီးစီးဖို့ ဆက်လက်ဆောင်ရွက်သွားမှာ ဖြစ်ပါတယ်။ ကွန်ဒိုဆောက်မယ့်နေရာကို စုပေါင်းမြေအဖြစ် ပြောင်းရပါမယ်။ စုပေါင်းမြေအဖြစ်ပြောင်းမှ ကွန်ဒိုဆိုတာ ဆောက်လုပ်ခွင့်ရှိပါတယ်။ ကျွန်တော်တို့ရဲ့ ဂရန်ဆိုတာကလည်း စုပေါင်းမြေအဖြစ်ပြောင်းဖို့ ရက်ပိုင်းပဲကြာပါတယ်။ ကျွန်တော်တို့ဘက်ကလည်း စာရွက်စာတမ်း စုံလင်နေပြီဖြစ်တဲ့အတွက် တိုင်းဒေသကြီး စီမံခန့်ခွဲမှုကော်မတီကို အချိန်နဲ့တစ်ပြေးညီ ဆက်လက်တင်ပြမှာပါ။ ကျွန်တော်ထင်ပါတယ်။ ဒီလထဲမှာပဲ ခွင့်ပြုမယ်လို့ ယူဆပါတယ်” ဟု ဦးဟန်ထူးအောင်က ပြောကြားသည်။
အဆိုပါစီမံကိန်းကို MIC က ရင်းနှီးမြုပ်နှံခွင့် ဒေါ်လာ ၁၇၃ သန်း ခွင့်ပြုထားပြီး ၂၇ ဧကကျယ်ဝန်းသည့် မြေပေါ်တွင် တည်ဆောက်သွားမည်ဖြစ်ကြောင်း သိရသည်။ လက်ရှိအနေအထားတွင် Shop House များတည်ဆောက်နေပြီး အနောက်ဘက်ရှိ လူနေအိမ်ရာများကို တိုင်းဒေသကြီးစီမံခန့်ခွဲမှု ကော်မတီမှ ခွင့်ပြုချက်ရသည်နှင့် စတင်တည်ဆောက်တော့မည်ဖြစ်ကြောင်း သိရသည်။
ခေတ်မီဆန်းသစ်သည့် နည်းပညာများ၊ ရေကူးကန်၊ ကစားကွင်းနှင့် လုံခြုံရေးစနစ်များကြောင့် မြို့နေလူထုများကြားတွင် စိတ်ဝင်စားမှုရှိနေသည့် စီမံကိန်းဖြစ်ပြီး တာဝန်ရှိသူများက စတင်ဆောက်လုပ်သည့် ယခုလမှ နှစ်နှစ်အတွင်း အဆောက်အအုံလေးလုံးကို အပြီးသတ်တည်ဆောက်မည်ဟု ပြောကြားခဲ့ကြောင်း သိရသည်။
Ref & Photo Credit : Eleven Media
Posted By : Ra Wai (ShweProperty.com)
Property Sales Event
နောက်ဆုံးရ သတင်းများ
For Sale
For Rent
New Homes
other properties
