အခွန်ရှောင်တိမ်းမှုများကို ဖော်ထုတ်မည့် ပြဋ္ဌာန်းချက်များပါဝင်သော ၂၀၁၆ ခုနှစ်၊ ပြည်ထောင်စု၏အခွန်အကောက်ဥပဒေကြမ်း ကို ပြည်ထောင်စုလွှတ်တော်က  ဇန်နဝါရီလ တတိယပတ်တွင် အတည်ပြုခဲ့ပြီးဖြစ်ရာ သမ္မတခွင့်ပြုချက် ရပြီးသည်နှင့်  ရက်အနည်းငယ်အတွင်း အဆိုပါဥပဒေထွက်ရှိလာတော့မည် ဖြစ်သည်။

  ပြည်ထောင်စုအစိုးရအဖွဲ့က ရေးဆွဲ တင်ပြထားသော အဆိုပါဥပဒေကြမ်းကို ပြည်ထောင်စုလွှတ်တော် ဥပဒေကြမ်းပူးပေါင်း ကော်မတီနှင့်အတူ လွှတ်တော် ကိုယ်စားလှယ် များ၏ဆွေးနွေးချက်များအရ ပြင်ဆင်ချက် များ၊ အသစ်ဖြည့်စွက်ချက် များဖြင့်အတည်ပြုနိုင်ခဲ့ခြင်းဖြစ်သည်။

အဆိုပါဥပဒေတွင် "အခွန် မပေးဆောင်ရသေးတဲ့ အထူးကုန်စည်များ ရရှိပိုင်ဆိုင်ထားခြင်း အတွက် အထူးကုန်စည်ခွန်ဥပဒေပုဒ်မ ၂၀၊ ပုဒ်မခွဲ(ဂ)အရ တပ်ရိုက် သည့်ဒဏ်ငွေအဖြစ် ကောက်ခံရရှိငွေ၏ ၁၀ ရာခိုင်နှုန်းအား သတင်းပေးတင်ပြသူကို လည်းကောင်း၊  ၂၀ ရာခိုင်နှုန်းကို ရှာဖွေဖမ်းဆီးပေး သည့် အဖွဲ့ကိုလည်းကောင်း ဆုကြေးအဖြစ် ချီးမြင့်ရ မည်"ဟု ပူးပေါင်းကော်မတီက အသစ်   ဖြည့်စွက်ကာအတည်ပြုခဲ့ခြင်း   ဖြစ်သည်။

သို့သော် သတင်းပေးသူကို အကာအကွယ် ပေးရန်အတွက် "သတင်းပေးသူ မည်သူမည်ဝါ ဖြစ်ကြောင်းကို အစိုးရကိစ္စမှတစ်ပါး   ဖော်ထုတ် ခြင်းမပြုရ" ဟုလည်း ဆက်လက်ပါရှိသည်။  ယင်းပြဋ္ဌာန်းချက်သည် အစိုးရအဖွဲ့က ရေးဆွဲ တင်ပြလာမှုတွင် ပါဝင်လာခဲ့ခြင်းမရှိဘဲ  လွှတ်တော်က ဖြည့်စွက်ကာပြဋ္ဌာန်းခဲ့ခြင်းဖြစ် သည်။ ထိုကဲ့သို့ဖြည့်စွက်ခဲ့ခြင်းသည်  အခွန်ရှောင်တိမ်းမှုများကို တတ်နိုင်သမျှထိန်းကြပ် လိုသောကြောင့်ဖြစ်သည်ဟု မန္တလေးတိုင်း ဒေသကြီး အမရပူရမြို့နယ်မှ ပြည်သူ့လွှတ် တော်ကိုယ်စားလှယ် ဦးသိန်းထွန်းဦးက ပြော ကြားသည်။ ထို့ပြင် ပြည်ထောင်စုအစိုးရအဖွဲ့က လျာထားတင်ပြသော  အခွန်ကောက်ခံရရှိနိုင် မည့်ပမာဏကိုလည်း ပြင်ဆင်တိုးမြှင့်လိုက် သည်။ အစိုးရအဖွဲ့၏  ကျပ်၂,၄၈၅ ဘီလျံကျော် လျာထားတင်ပြချက်ကို လွှတ်တော်က ၂,၄၈၇ ဘီလျံခန့်အထိ ပြင်ဆင်သတ်မှတ်ခဲ့သည်။

၂၀၁၄ ခုနှစ်မှစတင်၍ ပြဋ္ဌာန်းခဲ့သော ပြည်ထောင်စု အခွန်အကောက်ဥပဒေကြမ်းကို  ဘဏ္ဍာနှစ် တစ်နှစ်ကုန်ခါနီးမှသာ ပြဋ္ဌာန်း လေ့ရှိသည်။ ဘဏ္ဍာရေးဝန်ကြီးဌာန၊ ပြည်တွင်း အခွန်များဦးစီးဌာန၏ ဒုတိယညွှန်ကြားရေးမှူးချုပ် ဦးကျော်ကျော်က ယခုနှစ် ဥပဒေစော ထွက်ရခြင်းသည် လွှတ်တော် အသစ်မစမီ ရှုပ်ထွေးသောအခွန်အကောက်နှင့်  ရသုံးမှန်းခြေစာရင်းကဲ့သို့သော ဥပဒေ များကို အဆင်သင့်ဖြစ်စေရန် ရည်ရွယ်ကြောင်း ပြောသည်။

နိုင်ငံတကာကုမ္ပဏီများ ပိုမိုဝင်ရောက်လာပြီဖြစ်သည့်အတွက် ယခုနှစ်အတွက် ပြင်ဆင်လိုက်သည့်ဥပဒေများတွင် အခွန်ကောက်ခံမှုများကို နိုင်ငံတကာပုံစံအတိုင်း အသေးစိတ်ကောက်ခံသွားရန် ရည်ရွယ်ထားသည်ဟုလည်း ၎င်းက ပြောသည်။ "အခွန်နှုန်းတွေကို နိုင်ငံတကာလိုပဲ တိတိကျကျ ပုံသေနှုန်းနဲ့သွားနိုင်အောင်၊ Transfer Pricing(ကုမ္ပဏီတွေအစုအဖွဲ့တစ်ခုက ၎င်းတို့၏ ကုမ္ပဏီတစ်ခုကို ရောင်းချရာတွင် အခွန်လျှော့ဆောင်ချင်၍ ဈေးလျှော့ပြခြင်း)မျိုးတွေ မဖြစ်အောင်၊ အမှန်တကယ်ဈေးကွက် ပေါက်ဈေးပေါ်မှာပဲ မူတည်ပြီး အခွန်ကောက်ခံ ဖို့ ပြောင်းလဲသတ်မှတ်လိုပါတယ်။ ဒါတွေကို အရင်နှစ်တွေက  ညွှန်ကြားချက်တွေ ထုတ်ပြန်ပြီး ထိန်းချုပ်ခဲ့တာမျိုးတော့ ရှိတယ်"ဟု ၎င်းက ပြောသည်။

ယမန်နှစ်များက ပြည်ထောင်စုအခွန်အကောက်ဥပဒေတွင် စီးကရက်အပေါ်အခွန်ကောက်ခံ မှုနှုန်းကို တစ်မျိုးတည်းထား သော်လည်း ယခုနှစ်တွင်မူ ဈေးကွက်ဈေးနှုန်း အလိုက်ပြင်ဆင် ထားသည်။ ပြည်တွင်းထုတ် အလိပ်၂၀ ပါတစ်ဘူးရောင်းဈေး ကျပ် ၄၀၀ တန်တစ်ဘူးအတွက် တစ်လိပ်အပေါ်တွင် သုံးကျပ်နှုန်း၊ ရောင်းဈေး ၄၀၁ ကျပ်မှ ၆၀၀ အထိကို တစ်လိပ်လျှင် အခွန်ရှစ်ကျပ်နှုန်း၊ ရောင်းဈေး ၆၀၁ ကျပ်မှ ၈၀၀ အထိဖြစ်လျှင် တစ်လိပ်ကို ၁၂ ကျပ်နှုန်း၊ ရောင်းဈေး ၈၀၁ ကျပ်နှင့်အထက်ဖြစ်လျှင်တစ်လိပ်အပေါ်မှ ၁၅ ကျပ်နှုန်းစသည်ဖြင့်  သတ်မှတ်လိုက်သည်။

ပြည်ပကတင်သွင်းသောစီးကရက်များ မှာမူ ယမန်နှစ်ကအတိုင်းပင် ကုန်းပေါ်ရောက် တန်ဖိုး၏ ၁၂၀ ရာခိုင်နှုန်းကို အခွန် ကောက်ခံ မည်ဖြစ်သည်။ အဖျော်ယမကာများအတွက် အခွန် ကောက်ခံရာတွင်လည်း အရက်တစ်လီတာလျှင် ကျပ် ၅၀၀ အတွက် ၅၆ ကျပ်နှုန်း၊  ၅၀၁ ကျပ်မှ ၁,၀၀၀ အထိကို ၁၆၉ ကျပ်နှုန်း၊ ၁,၀၀၁ ကျပ်မှ ကျပ် ၁,၅၀၀ အထိဖြစ်လျှင် ၂၈၁ ကျပ် နှုန်း၊ ၁,၅၀၁ ကျပ်မှ၂၀၀၀ အထိအတွက် ၃၉၄ ကျပ်နှုန်း၊ ၂,၀၀၁ ကျပ်မှ ၂,၅၀၀ အထိဖြစ်လျှင် ၅၀၆ ကျပ်နှုန်း၊ ၂,၅၀၁ ကျပ်မှ ၃,၀၀၀ အထိ ဖြစ်လျှင် ၆၁၉ ကျပ်နှုန်း၊ ၃,၀၀၁ ကျပ်မှ ၃,၅၀၀ အထိဖြစ်လျှင် ၇၃၀ ကျပ်နှုန်း၊ ၃,၅၀၁ ကျပ် မှ ၄,၀၀၀ အထိဖြစ်လျှင် ၈၄၄ ကျပ်နှုန်း၊ ၄,၀၀၁ ကျပ်မှ ၅,၀၀၀ အထိဖြစ်လျှင် ၁,၀၁၃ ကျပ်နှုန်း၊ ၅,၀၀၁ ကျပ်မှ ၆,၀၀၀ အထိဖြစ်လျှင် ၁,၂၃၈ ကျပ်နှုန်း၊ ၆,၀၀၁ ကျပ်မှ ၇၀၀၀ အထိဖြစ်လျှင် ၁,၄၆၃ ကျပ်နှုန်း၊ ၇,၀၀၁ ကျပ်မှ ၈,၀၀၀ အထိ ဖြစ်လျှင် ၁,၆၈၈ ကျပ်နှုန်း၊ ၈,၀၀၁ ကျပ်မှ ၉,၀၀၀ အထိဖြစ်လျှင် ၁,၉၁၃ ကျပ်နှုန်း၊ ၁၀,၀၀၁ ကျပ်မှ ၂၀,၀၀၀ အထိဖြစ်လျှင် ၃,၃၇၅ ကျပ်နှုန်း၊ ၂၀,၀၀၁ ကျပ်နှင့်အထက် ဆိုလျှင် ပြည်ပမှ တင်သွင်းသည့်အရက်များနည်းတူ ၆၀ ရာခိုင်နှုန်း အထိ သတ်မှတ်လိုက်သည်။

ဝိုင်အမျိုးမျိုးအပေါ်မှ ကောက်ခံမည့်အခွန်နှုန်းထားများကိုလည်း အစိုးရအဖွဲ့က ယမန်နှစ်ကအတိုင်း ဈေးကွက်ပေါက်ဈေး၏ ၅၀ ရာခိုင်နှုန်းဟူ၍ တစ်မျိုးတည်းသာ ကောက်ခံ ရန် တင်ပြထားခဲ့သော်လည်း လွှတ်တော်ကမူ တစ်လီတာတန်ဖိုး ကျပ် ၅၀၀ အထိဖြစ်လျှင် ၅၀ ကျပ်နှုန်း၊ ၅၀၁ ကျပ်မှ ၁,၀၀၀ အထိဖြစ် လျှင် ၁၅၀ ကျပ်၊ ၁,၀၀၁ ကျပ်မှ ၁,၅၀၀ အတွက် ၂၅၀ ကျပ်၊ ၁,၅၀၁ ကျပ်မှ ၂,၀၀၀ အထိကို ၃၅၀ ကျပ်၊ ၂,၀၀၁ ကျပ်မှ ၂,၅၀၀ တန်ဖိုးအတွက် ၄၅၀ ကျပ်၊ ၂,၅၀၁ ကျပ်မှ ၃,၀၀၀ အထိဖြစ် လျှင် ၅၅၀ ကျပ်၊ ၃,၀၀၁ ကျပ်မှ ၃,၅၀၀ အထိ မှာ ၆၅၀ကျပ်၊ ၃,၅၀၁ ကျပ်မှ  ၄,၀၀၀ အထိဖြစ် လျှင် ၇၅၀ ကျပ်၊ ၄,၀၀၁ ကျပ်မှ ၅,၀၀၀ အထိ ဖြစ်လျှင် ၉၀၀ ကျပ်၊ ၅,၀၀၁ မှ ၆,၀၀၀ အထိ ဖြစ်လျှင် ကျပ် ၁,၁၀၀ ၊ ၆,၀၀၁ မှ ၇,၀၀၀ အထိ ဖြစ်လျှင် ကျပ် ၁,၃၀၀၊ ၇,၀၀၁ မှ ၈,၀၀၀ အထိ ဖြစ်လျှင် ကျပ် ၁,၅၀၀၊ ၈,၀၀၁ မှ ၉,၀၀၀ အထိဖြစ်လျှင် ကျပ် ၁,၇၀၀၊ ၉,၀၀၁  ကျပ်မှ ကျပ် ၁၀,၀၀၀ အထိကို ၁,၉၀၀၊ ၁၀,၀၀၁ ကျပ် မှ၂၀,၀၀၀အတွက် ၃,၀၀၀၊ ၂၀,၀၀၁  ကျပ်နှင့် အထက်ရှိသော ဝိုင်များအတွက်မူ ပြည်ပမှ တင်သွင်းသည့်ဝိုင်များကဲ့သို့ တစ်လီတာ တန်ဖိုး၏ ၅၀ ရာခိုင်နှုန်းဖြင့် အတည်ပြု လိုက်သည်။ မြန်မာနိုင်ငံလက်လီလုပ်ငန်းရှင်များအသင်း ၏ တာဝန်ရှိသူ ဦးမျိုးမင်းအောင်က ယစ်မျိုး ကုန်စည်များအပေါ် အခွန်ကောက်ခံမှုစနစ် များပြင်ဆင်နေသော်လည်း   ယစ်မျိုးကုန်စည် အားလုံးကို အမှန်တကယ်ဖွင့်မပေးသေးကြောင်း ပြောသည်။

"အခွန်ကောက်ခံတဲ့စနစ်ကို နိုင်ငံတကာ ပုံစံအတိုင်း သွားနေတာမှန်ပေမယ့် ဖွင့်ပေး စရာရှိရင် အဆင်သင့်မဖြစ်သေးလို့ပါဆိုပြီး ပြောတယ်။ ဆိုင်ပေါ်ရောက်ပြီးသားကိုပဲ အလွယ်တကူဖမ်းပြီး   liquor house တွေပေါ်တော့ မဖမ်းတာ တွေ့ရတယ်။ အခွန်တွေ တင်းကြပ်လာရင်   ဈေးကွက်ကိုလှန့်လိုက်သလိုဖြစ်ပြီး မှောင်ခိုတင်သွင်းမှုက မပပျောက် တာမျိုးလည်း ဖြစ်နိုင်တယ်။ တစ်ဖက် ကကြည့်ရင်လည်း ဆိုင်သမားက ဈေးနှုန်းတွေ လိုက်မြှင့်တော့ နောက်ဆုံးစားသုံးသူဘက်သွားထိခိုက်မယ်"ဟု ၎င်းကပြောသည်။

ယစ်မျိုးကုန်စည်များတွင် ဝိုင်တစ်မျိုး တည်းသာတရားဝင် ဖွင့်ပေးထားပြီး အရက်မှာလည်းအခွန်ညှိနှိုင်းဆဲအဆင့်ဖြစ်နေသေးကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ တာဝန်ရှိသူတစ်ဦးက ပြောသည်။ လစာဝင်ငွေမှ ကောက်ခံမည့်အခွန်နှုန်း ထားများကိုလည်း လွှတ်တော်ကပြင်ဆင်လိုက်သည်။ တစ်နှစ်လျှင် လစာဝင်ငွေကျပ် ၄၈ သိန်းအထိရရှိသူများကို ဝင်ငွေခွန်စည်းကြပ် ခြင်းမှ ကင်းလွတ်ခွင့်ပြုခဲ့သည်။

ကျပ် ၄၈ သိန်း အထက်ရရှိသူဖြစ်လျှင် သို့မဟုတ် အခြား အသက်မွေးလုပ်ငန်းများနှင့် ရလမ်းများမှ ဝင်ငွေဖြစ်လျှင် မည်သူ့ကိုမဆို စုစုပေါင်းဝင်ငွေမှ ဝင်ငွေခွန်ဥပဒေအရ  သက်သာခွင့် များခုနှိမ်ပြီး နောက်ကျန်ဝင်ငွေအပေါ် ဝင်ငွေအလွှာအလိုက် ကောက်ခံရန် သတ်မှတ် လိုက်သည်။ ယင်းသတ်မှတ်ချက်အရ ကျပ်သိန်း ၅၀ အထိ ဝင်ငွေဖြစ်လျှင် ၅ ရာခိုင်နှုန်း၊ ယင်းမှကျပ်သိန်းတစ်ရာအထိဖြစ်လျှင် ၁၀ ရာခိုင်နှုန်း၊ ယင်းမှကျပ်သိန်းနှစ်ရာ အထိ ဖြစ် လျှင် ၁၅ ရာခိုင်နှုန်း၊ ယင်းမှကျပ်သိန်း ၃၀၀ အထိဖြစ်လျှင် ၂၀ ရာခိုင်နှုန်းနှင့် ယင်းအထက် ရရှိသူများအား ၂၅ ရာခိုင်နှုန်းအဖြစ် သတ်မှတ် ခဲ့သည်။ သို့သော်လည်း နိုင်ငံသားတစ်ယောက်ယောက်အနေဖြင့် အခြေပစ္စည်းတစ်ရပ်ရပ် ကို ဝယ်ယူခြင်း၊  တည်ဆောက်ခြင်း၊ ရယူခြင်း နှင့် လုပ်ငန်းအသစ်တည်ထောင်ခြင်း၊ ထပ်မံ တိုးချဲ့ခြင်း တို့အတွက် အသုံးပြုသည့်ဝင်ငွေမှ ဝင်ငွေရလမ်းတင်ပြ နိုင်လျှင်ယင်းတင်ပြနိုင်သည့်ငွေကို နှုတ်ပယ်ပြီးကျန်သည့် ဝင်ငွေအပေါ်တွင်လည်းကောင်း၊ ဝင်ငွေရလမ်းမတင်ပြနိုင်ပါက အသုံးပြုသည့်ဝင်ငွေအပေါ် ကောက်ခံမည့်နှုန်းထားများကိုပြင်ဆင်သတ်မှတ်အတည်ပြုခဲ့ သည်။ ယင်းနှုန်းထား များအရ ကျပ်သိန်း ၃၀၀ အထိဖြစ်လျှင် ၁၅ ရာခိုင်နှုန်း၊ ယင်းပမာဏမှ ကျပ်သိန်း တစ်ထောင် အထိဖြစ်လျှင် ၂၀ ရာခိုင်နှုန်း၊ ကျပ်သိန်း ၁,၀၀၁ နှင့်အထက်ဖြစ်လျှင်
၃၀ ရာခိုင်နှုန်းတို့ ဖြစ်ကြသည်။

ဥပဒေတွင်ပါရှိချက်အရ ကျပ် သိန်းထောင်ဂဏန်းရှိသော ပစ္စည်း၊ အိုးအိမ်၊ တိုက်ခန်းစသည်ဖြင့် ဝယ်ယူသူ များသည် ဝင်ငွေရလမ်းမတင်ပြနိုင်ပါက  အခွန် ၃၀ ရာခိုင်နှုန်းပေးဆောင်ရမည် ဖြစ်သည်။ သို့သော်လည်း အသုံးပြုသည့်ငွေ အားလုံးအပေါ် ဝင်ငွေရလမ်းတင်ပြနိုင်ပါက အခွန်ထမ်းဆောင်ရန် မလိုကြောင်းလည်း ဆက်လက်အတည်ပြုလိုက်သည်။ အဆိုပါ အချက်ကို မြန်မာနိုင်ငံစက်သုံးဆီ လုပ်ငန်းရှင်များအသင်းအတွင်းရေးမှူးလည်း ဖြစ်သူ၊ လှိုင်မြို့နယ်မှ ပြည်သူ့လွှတ်တော် ကိုယ်စားလှယ်ဒေါက်တာဝင်းမြင့်က တင်ပြခဲ့ခြင်းဖြစ်သည်။

ကုန်ပစ္စည်းထုတ်လုပ်သည့်ကုမ္ပဏီ၏ မန်နေဂျာတစ်ဦးကမူ "တစ်နှစ်လစာသိန်း ၅၀ နဲ့အထက် ဝင်ငွေရသူတွေအတွက်က အခွန်ဆောင်ရတာပိုမြင့်လာနိုင်တယ်။ ဒါပေမဲ့ ဝမ်းသာစရာ အချက်တော့ အိမ်ခြံမြေဝယ်ယူတာမျိုးမှာ ကိုယ်အခွန်ဆောင်ထားကြောင်းကို တရားဝင် ပြခွင့်ရသွားတာပေါ့"ဟု ၎င်းက ပြောသည်။

သို့သော်လည်း အခွန်လျာထားချက်တွင် တစ်နေ့တည်းအတည်ပြုလိုက်သော ကွန်ဒိုမီနီယံ ဥပဒေအရ နိုင်ငံခြားသားများကိုကွန်ဒို အိမ်ခန်းများရောင်းချခြင်းမှ ရရှိနိုင်မည့်ကုန် သွယ်လုပ်ငန်းခွန် ငါးရာခိုင်နှုန်းပါဝင်ခြင်း မရှိ သေးပေ။ နာမည်ကျော် စီးပွားရေးလုပ်ငန်းရှင်  တစ်ဦးလည်းဖြစ်သူ ရန်ကုန်တိုင်းဒေသကြီးမှ အမျိုးသားလွှတ်တော်ကိုယ်စားလှယ် ဒေါက်တာ ခင်ရွှေကမူ ကွန်ဒိုတိုက်ခန်းများနိုင်ငံခြား သားကိုရောင်းချခြင်းမှ ဝင်ငွေ အမေရိ ကန်ဒေါ်လာ  တစ်ဘီလျံခန့်ရရှိနိုင်မည်ဖြစ် လျှင် ကုန်သွယ်လုပ်ငန်းခွန် ငါးရာခိုင်နှုန်း (ကန်ဒေါ်လာသန်း ၅၀) ရရှိနိုင်မည်ဖြစ် ကြောင်း ပြောကြားထားသည်။

Ref : Myanmar Times

Photo Credit : Social

Posted By : Wai Phyoe