Crash Landing On You ဆိုတဲ့ ဇာတ်လမ်းတွဲလေးနဲ့ ဗိုလ်ကြီးတို့စုံတွဲဆိုပြီး ပရိသတ်နှုတ်ဖျားမှာစွဲမြဲနေခဲ့တဲ့ အနုပညာရှင်စုံတွဲကတော့ Hyun Bin နဲ့ Son Ye Jin တို့ပဲဖြစ်ပါတယ်။

သူတို့နှစ်ယောက်က ဇာတ်လမ်းတွဲထဲမှာတင် လက်ထပ်ခဲ့ကြတာမဟုတ်ပဲ လက်တွေ့အပြင်လောကမှာလည်း ဘဝတစ်ခုကို အတူထူထောင်နေကြတဲ့ ဒိတ်ဒိတ်ကြဲအနုပညာရှင် ဇနီးမောင်နှံလေးပါ။ ဒီတစ်ခေါက်တော့ သူတို့နှစ်ယောက် လက်ထပ်ပြီး အတူနေကြတဲ့အိမ်လို့ ပရိသတ်တွေသိထားကြတဲ့ တန်ဖိုးကြီးဇိမ်ခံအိမ်လေးဆီ အလည်သွားလိုက်ရအောင်..

Hyun Bin နဲ့ Son Ye Jin ရဲ့ US$4.3 သန်းတန် ဇိမ်ခံအိမ်ကြီး



Gyeonggi  ပြည်နယ် Walkerhill Podoville အိမ်ရာထဲမှာ တည်ရှိတဲ့ US$4.3 သန်းတန် ဇိမ်ခံအိမ်ကြီးကို မင်းသား Hyun Bin က ၂၀၂၀ ခုနှစ်ကမှ ဝယ်ယူခဲ့တာဖြစ်ပြီး အိမ်ကြီးရဲ့အကျယ်အဝန်းဟာ ၂၆၀၀ စတုရန်းပေအကျယ်အဝန်းရှိပါတယ်။

Hyun Bin နဲ့ Son Ye Jin  တို့ရဲ့ တန်ဖိုးကြီးမားတဲ့ ဇိမ်ခံအိမ်ကြီးဟာ လေးထပ် luxury villa ရဲ့ အပေါ်ဆုံးထပ်ဖြစ်ပြီး တစ်အိမ်လုံးကို ကွန်ကရစ်နဲ့ကျောက်သားတွေ ရောစပ်တည်ဆောက်ပုံဖော်ထားတဲ့ဒီဇိုင်းမျိုးဖြစ်ပါတယ်။

အခန်းတွင်းဖွဲ့စည်းပုံ



အိမ်ကြီးထဲမှာဆိုရင် တန်ဖိုးကြီး ခေတ်မီဆန်းသစ်တဲ့ အသုံးအဆောင်ပစ္စည်းတွေ၊ခမ်းနားလှပပြီး အနုပညာဆန်ဆန်ဖွဲ့စည်းထားတဲ့မီးဖိုချောင်နဲ့ ထမင်းစားခန်း ၊ ကျယ်ဝန်းလှပခမ်းနားတဲ့ ရေချိုးခန်း ၊ အဝတ်အစားနဲ့ လက်ဝတ်လက်စားပစ္စည်းတွေ ထားရှိဖို့ ကြီးမားတဲ့ဗီရိုခန်း ပါဝင်ပြီးသားဖြစ်တဲ့ အိပ်ခန်းကျယ်ကြီးအပြင် ဧည့်သည်တွေလာရင် အနားယူနိုင်ဖို့ အိမ်ခေါင်မိုးပေါ်မှာ ကိုယ်ပိုင်ဥယျာဉ်ငယ်လေးလည်း တည်ဆောက်ထားပါသေးတယ်။

အိမ်တစ်အိမ်လုံးမှာထားရှိတဲ့ အသုံးအဆောင်ပစ္စည်းတွေ ၊ ဆိုဖာတွေကအစ မျက်စိအေးစေတဲ့ အဖြူရောင်အများဆုံးသုံးထားပြီး ရိုးရှင်းပေမယ့် မြင်လိုက်တာနဲ့ တန်ဖိုးကြီးမားမှန်းသိသာစေတဲ့ ဇိမ်ခံပစ္စည်းတွေနဲ့ ဖွဲ့စည်းထားတာဖြစ်ပါတယ်။ သီးသန့်မြေအောက်ကားပါကင်လည်းပါရှိပြီး တိတ်ဆိတ်ငြိမ်သက်အေးချမ်းတဲ့ ပတ်ဝန်းကျင်လည်းဖြစ်ပါတယ်။ ဒါ့အပြင် ပြတင်းပေါက်တွေလည်းများစွာပါဝင်လို့ သဘာဝအလင်းရောင်နဲ့ လေထုကို များများ ထိတွေ့ခံစားနိုင်ပါတယ်။

Hyun Bin နဲ့ Son Ye Jin တို့ရဲ့ ဇိမ်ခံအိမ်ကြီးဟာ နာမည်ကြီးအနုပညာရှင်တွေ၊စီးပွားရေးအသိုင်းအဝိုင်းက နာမည်ကြီးပုဂ္ဂိုလ်တွေ နေထိုင်ရာအိမ်ဝင်းတစ်ဝိုက်လည်းဖြစ်လို့ လုံခြုံရေးများစွာနဲ့စောင့်ကြပ်ထားရတဲ့ အိမ်ရာဝန်းလည်းဖြစ်ပါတယ်။ 



Hyun Bin ရဲ့ အိမ်အောက်ထပ် အိမ်နီးချင်းဟာဆိုရင် နာမည်ကြီးမင်းသမီး Oh Yeon-seo ဖြစ်ပြီး JYP Entertainment ရဲ့ စီအီးအို Park Jin-young လည်း ထို Villa မှာပဲ နေထိုင်တာဖြစ်တယ်လို့ သိရပါတယ်။

အခုပြောပြခဲ့တာကတော့ ပရိသတ်တွေချစ်တဲ့ Hyun Bin နဲ့ Son Ye Jin  တို့နေထိုင်ကြတဲ့အိမ်လို့ ပရိသတ်တွေသိထားကြတဲ့ US$4.3 သန်းတန် ဇိမ်ခံအိမ်ကြီးအကြောင်းပဲဖြစ်ပါတယ်။ Hyun Bin တို့ စုံတွဲရဲ့ မင်္ဂလာအိမ်ကြီးအကြောင်းကို ဖော်ပြရင်း မကြာခင်မှာ Bin Shi Family ထဲကိုရောက်လာမယ့် ရင်သွေးလေးကိုလည်း အကောင်းဆုံး မွေးဖွားနိုင်ပါစေလို့ ပရိသတ်တွေနဲ့အတူတူ ဆုတောင်းပေးလိုက်ပါတယ်နော်။ 

နောက်တစ်ပတ်တွေမှာလည်း ကမ္ဘာတစ်ဝှမ်းက ထူးထူးခြားခြားအိမ်ကြီးတွေနဲ့ စိတ်ဝင်စားစရာကောင်းတဲ့ဗဟုသုတွေကို ပြောပြပေးသွားဦးမှာမို့ Shwe Property Website ထဲကိုလာရောက်လည်ပတ်ဖတ်ရှု့ပေးကြပါဦးလို့ ဖိတ်ခေါ်လိုက်ပါရစေနော်။

ဖတ်ရှုမှုအများအဆုံး အိမ်ခြံမြေဆောင်းပါးများ

မင်းသမီးတစ်ပါးလို နေထိုင်နေတဲ့ JENNIE (BLACK PINK) ရဲ့ ကိုယ်ပိုင်အိမ်ကြီးအကြောင်း

လီမင်ဟိုပိုင်ဆိုင်တဲ့ US $4 သန်းကျော်တန်အိမ်ကြီးကို အလည်တစ်ခေါက်

ဘာကြီးလဲဟလို့ ရေရွတ်မိစေမယ့် ဆန်းဆန်းပြားပြား အိမ်များ

ကစားသမားဘဝမှအနားယူချိန်တွင် နေထိုင်ရန် ရည်ရွယ်တည်ဆောက်နေတဲ့ ရော်နယ်ဒိုရဲ့နေအိမ် တည်ဆောက်စရိတ် ပေါင် ၁၇ သန်းအထိကုန်ကျနေ

Posted By : Ra Wai (ShweProperty.com)