ဖုန်းရွှေပညာအရပြောရင် တြိဂံပုံမြေကွက်ပေါ်မှာ ဘယ်လိုအိမ်ပုံစံမျိုးနဲ့ပဲဖြစ်ဖြစ် အိမ်ဆောက်နေမယ်ဆိုရင် အိမ်သူအိမ်သားတွေဟာ စိတ်ဖိစီးမှုကိုခံရမယ်။ အိမ်သူ အိမ်သားတွေစည်းလုံးမှုမရှိဘဲ မသင့်မြတ်မှုတွေသာဖြစ်မယ်။ စီးပွားရေးလုပ်ငန်းကြီးတွေလုပ်ရင်ဆုံးရှုံးမယ်။ အိမ်ထောင်ရှင်တွေရှိရင်လည်း အိမ်ထောင်ဘက် တစ်ဦးဦးသစ္စာဖောက်လိမ့်မယ်။
တြိဂံမြေကွက်ပေါ်မှာ အိမ်ဆောက်ရင် အိမ်ရှေ့ဘက်ကျတဲ့ ထောင့်စွန်းမှာဓာတ်မီးတိုင်ထားရမယ်။ ဒါမှမဟုတ်ရင် အလံတိုင်တစ်ခုထားရမယ်။ အလံတိုင်ကိုအလံလွှင့်ထားရင်ပိုကောင်းမယ်။
တြိဂံပုံမြေကွက်ထဲမှာပဲ ကြက်လျှာစွန်းလို မြေကွက်မျိုးမှာ ချွန်မြတဲ့ထောင့်စွန်းတစ်ခုပါစမြဲပဲ။ အဲသည်ထောင့်စွန်းကို စည်းရိုးပင်တွေထူထူစိုက်ပြီး ဖြတ်ပစ်လိုက်ပါ။ မြန်မာပြည်မှာ အများဆုံးအစိုက်များတာက ပုဏ္ဏရိပ်ပင်တွေများတယ်။ ပုဏ္ဏရိပ်ပင်ဟာ အကောင်းဆုံးခြံစည်းရိုးပင်ပါ။ ထောင့်ချိုး မညီတဲ့မြေကွက်တွေ၊ တြာပီဇီယံပုံ မြေကွက်တွေ၊ ဇလားပုံမြေ ကွက်တွေကို အထူးရှောင်ရမယ်။ ဖုန်းရွှေ ကောင်းလာအောင်ယင်၊ ယန်ညှိ ပေးဖို့သိပ်ခက်ပါတယ်။
ထောင့်မှန်မကျတဲ့ဘက်မှာ ပုဏ္ဏရိပ်ပင်တွေစိုက်ပြီး ယင်၊ ယန်ကိုညှိပေးရတယ်။ အုတ်တံတိုင်း ကာထားရင်လည်း အုတ်တံတိုင်းတစ်လျှောက်မှာ ပန်းအိုးလေးတွေစီပြီး အလှစိုက်ထားပါ။ အနားမညီ၊ ပုံစံမမှန်တဲ့ မြေကွက်တွေကတော့ မြို့ပြအိမ်ရာကွက်တွေမှာတွေ့ခဲပါတယ်။
အနားမညီ၊ ထောင့်မညီ၊ ပုံစံမမှန်တဲ့ မြေကွက်တွေထဲမှာဆိုရင် ရှေ့ကားပြီးနောက်ရှူးသွားတဲ့ မြေကွက်ရယ်၊ ရှေ့ရှူးပြီး နောက်ကိုကားသွားတဲ့ ဇလားပုံလို့ခေါ်တဲ့တြာပီဇီယံပုံစံမြေ ကွက်တွေအတွေ့များတတ်ပါတယ်။ အထူးသဖြင့် အဲသည်မြေကွက်မျိုးတွေက လမ်းထောင့်တွေမှာရှိတာများတယ်။ အဲသည်လို ဇလားပုံအမှောက်မြေကွက်၊ ဇလားပုံအလှန်မြေကွက် တွေမှာ လမ်းကျဉ်ထောင့်လို့ခေါ်တဲ့ အနံသေးသွားတဲ့ဘက်မှာ မီးတိုင်စိုက်ပေးရတယ်။
လျှပ်စစ်ဓာတ်တိုင်တွေစိုက်ပေးရတယ်။ အုန်းပင်၊ ကွမ်းသီးပင်တွေစိုက်ရင်လည်းရပါတယ်။ အလံတိုင်စိုက်ရင်လည်းရပါတယ်။ ဒါပေမဲ့ လျှပ်စစ်မီးတိုင်ကတော့ အကောင်းဆုံးပါပဲ။
Ref : Kumudra
Photo Credit : Srilankafoundation
Posted By : Sint Sint (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
