ရန်ကုန်မြို့တွင်းတိုက်ခန်းဈေးနှုန်းတွေဟာ ၅ နှစ်အတွင်း ၃၀ ရာခိုင်နှုန်းနဲ့အထက် ပြန်ကျဆင်းသွားတာကြောင့် ၂၀၁၇ ခုနှစ်အတွင်း ဈေးနှုန်းအများဆုံး ကျဆင်းမှုဖြစ်တယ်လို့ အိမ်ခြံမြေအကျိုးဆောင်တွေဆီက သိရပါတယ်။
၂၀၁၁ ခုနှစ်ကစပြီးတော့ ဈေးကွက်မှာ အပြိုင်အဆိုင်ဆောက်လုပ်တဲ့ ကန်ထရိုက်တိုက်ခန်းတွေ များလာပြီး ဝယ်ယူသူတွေ နည်းပါးလာတဲ့ အတွက်ကြောင့် ဈေးလျှော့ရောင်းချခြင်းဖြစ်တယ်လို့ သိရပါတယ်။ တကယ်ဝယ်မယ့် သူတွေအချိန်ရောက်ပြီ၊ အခန်းတွေအများကြီး ကိုင်ထားတဲ့သူတွေ ဈေးလျှော့ရောင်းရင်ရောင်း၊ မရောင်းရင် အငှားဘက်ကိုပဲ လှည့်နေကြတာဖြစ်တယ်လို့ ရွှေရည်အိမ်ခြံမြေ အကျိုးဆောင်လုပ်ငန်းက မန်နေးဂျင်းဒါရိုက်တာ ဦးအေးဆောင်က ပြောပါတယ်။
၂၀ဝ၃ ခုနှစ်က အိမ်ခြံမြေဈေးကွက်ဟာ အကောင်းဆုံးဖြစ်ခဲ့ပြီး အခု ၂၀၁၇ နဲ့ နှိုင်းယှဉ်ရင် တိုက်ခန်းတစ်ခန်းကို ကျပ်သိန်း ၁၅၀ ကနေ ၁၀ဝ အထိ ဈေးနှုန်းကျဆင်းလာပြီး အရောင်းအဝယ်လည်း ထင်သလောက် မရှိကြောင်း သိရပါတယ်။
ဈေးကျတယ်ဆိုတာ လူတိုင်း သိပါတယ်။ အရောင်းအဝယ်က မရှိသလောက်ကို ဖြစ်လာတာ။ ၂၀၁၅ ကနေ ခုချိန်အထိ ကြည့်မယ်ဆိုရင် ၃၀ ရာခိုင်နှုန်းလောက်အထိ ကျသွားတာ။ သည်ထက်လည်း ဈေးကျနိုင်သေးတယ်လို့ ရန်ကုန်တိုင်း အိမ်ခြံမြေဝန်ဆောင်မှုအသင်း ဥက္ကဋ္ဌ ဦးစိုင်းခွန်းနောင်က ပြောပါတယ်။
၂၀၁၅ ခုနှစ်က သင်္ဃန်းကျွန်းမြို့နယ်မှာ ကန်ထရိုက်တိုက်တွေ အများဆုံး ဆောက်လုပ်ခဲ့ပြီး ၁၂ ပေခွဲ × ပေ ၅၀ တိုက်ခန်းတစ်ခန်းကို ကျပ်သိန်း ၂၅၀ ဝန်းကျင်နဲ့ အရောင်းအဝယ်ဖြစ်ခဲ့ပေမယ့် အခုလက်ရှိမှာ ကျပ်သိန်း ၁၆၀ လောက်အထိ ဈေးလျှော့ရောင်းရတယ်လို့ သိရပါတယ်။ ပေ ၂၀ × ပေ ၃၀ အကျယ် အဆင့်မြင့်တိုက်ခန်းရှိတဲ့ ကြည့်မြင်တိုင်မြို့နယ်က ပန်းလှိုင်အိမ်ရာ သုံးလွှာကိုလည်း ၂၀၁၅ ခုနှစ်က ကျပ်သိန်း ၈၀ဝ ဝန်းကျင်နဲ့ ရောင်းချခဲ့ပေမယ့် ဝယ်ယူသူမရှိဘဲ လက်ရှိသိန်း ၆၅၀ ဝန်းကျင်နဲ့ အရောင်းအဝယ်ဖြစ်ခဲ့တယ်လို့ ထွန်းဆောက်လုပ်ရေးကုမ္ပဏီက သိရပါတယ်။
၂၀၁၃ ခုနှစ်က စမ်းချောင်းမြို့နယ် မင်းလမ်း ၅ လွှာ ၁၃ ပေ × ပေ ၅၀ အကျယ် တိုက်ခန်းကို ကျပ်သိန်း ၈၅၀ အထိ ဈေးကောင်းရခဲ့ပြီး လက်ရှိမှာ သိန်း ၆၀ဝ ဝန်းကျင်နဲ့ ရောင်းချနေတာကိုတောင် ဝယ်ယူသူမရှိဖြစ်နေတယ်လို့ စမ်းချောင်းမြို့နယ် အိမ်ခြံမြေ အကျိုးဆောင် တစ်ဦးက ပြောပါတယ်။
Ref : The Kumudra
Photo Credit : Social
Posted By : Moe Thae'
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
