Bill Gates ဟာ ကမ္ဘာ့တန်ဖိုးအမြင့်ဆုံး အိမ်ကြီးကို ပိုင်ဆိုင်ထားတဲ့ နာမည်ကြီးစီးပွားရေးလုပ်ငန်းရှင်တစ်ယောက်ဖြစ်ပါတယ်။ သူ့ရဲ့ " Xanadu 2.0"လို့ခေါ်တဲ့ နည်းပညာမြင့် အိမ်ကြီးကို ဒေါ်လာ သန်း ၁၃၀ နဲ့ တည်ဆောက်ထားတာဖြစ်ပြီး ကမ္ဘာတစ်ဝှမ်းက လူတွေက Gates ရဲ့ ခမ်းနားလှတဲ့ နည်းပညာမြင့်အိမ်ကြီးတည်ဆောက်ထားပုံကို စိတ်ဝင်စားစပ်စုချင်နေကြတာလည်းဖြစ်ပါတယ်။ ဒါကြောင့် Shwe Property စာဖတ်သူတွေအတွက် Bill Gates ရဲ့ ဒီအိမ်ကြီးထဲမှာ ဘယ်လို အံ့မခန်းတီထွင်ဖန်တီးမှုတွေ ရှိနေတယ်ဆိုတာကို ဒီနေ့ sharing လေးလုပ်ပေးသွားချင်ပါတယ်။ 

(၁) Bill Gates ရဲ့ နည်းပညာမြင့် အိမ်ကြီးမှာ ဘယ်လိုတွေတည်ဆောက်ထားတာလဲ?

စတုရန်းပေ ၆၆၀၀၀ အကျယ်အဝန်းရှိတဲ့ အိမ်ခြံဝန်းကြီးထဲမှာ ကိုယ်ပိုင်ပင်လယ်ကမ်းခြေတစ်ခုရှိပြီး ကမ်းခြေက သဲတွေကတော့ ကာရေဘီယန်ကျွန်းကနေ နှစ်စဉ်သယ်ဆောင်လာတဲ့ သဲတွေပဲဖြစ်ပါတယ်။ ၆ မီတာမြင့်တဲ့ trampoline အခန်းကအစ ရှိပြီး အဲ့ဒီအိမ်ကြီးကို ၇ နှစ်ကြာအောင် တည်ဆောက်ခဲ့ရတာဖြစ်ပါတယ်။ အိမ်ကြီးမှာ နာမည်ကျော်အနုပညာရှင်တွေရဲ့ရှားပါးပစ္စည်းတွေလည်းရှိပြီး ဒေါ်လာ ၈ သန်းတန် လီယိုနာဒို ဒါဗင်ချီရဲ့အနုပညာလက်ရာတစ်ခုလည်းရှိကြောင်းသိရပါတယ်။

(၂) Bill Gates ရဲ့ အိမ်ကြီးထဲမှာ အခန်းပေါင်းဘယ်နှစ်ခန်းရှိလဲ?

Bill Gates ရဲ့ နည်းပညာမြင့် အိမ်ကြီးထဲမှာ အိပ်ခန်း ၇ ခန်း ၊ မီးဖိုချောင် ၆ ခန်း ၊ bathtub ပါဝင်တဲ့ရေချိုးခန်း ၁၀ ခန်း အပါ  စုစုပေါင်း ၂၄ ခန်း ရှိပါတယ်။ဒါ့အပြင် ဧည့်သည် ၂၀၀ အထက် ဆန့်တဲ့ ခန်းမကျယ်တစ်ခုလည်းရှိပါတယ်။



(၃) အိမ်ကြီးထဲက အပြင်အဆင်တွေကရော ခမ်းနားရဲ့လား?

Bill Gates ရဲ့အိမ်ကိုသွားလည်ခွင့်ရတဲ့သူကတော့ အိပ်မက်မက်နေသလို ခံစားနေရမှာပါ။ အခန်းတိုင်းရဲ့ အပူအအေးနဲ့ အလင်းအမှောင်ကို အဆင့်မြင့် sensor စနစ်နဲ့ ထိန်းချုပ်ထားတာဖြစ်ပြီး ဧည့်သည်ရောက်လာတဲ့အခါမှာလည်း သူတို့ကိုယ်တိုင် ထိန်းချုပ်နိုင်မှာဖြစ်ပါတယ်။ ဒါ့အပြင် ဒီစနစ်ကို တစ်နေရာကနေတစ်နေရာသွားတဲ့အခါ၊ အိမ်ပတ်ဝန်းကျင်ကိုလျှောက်သွားတဲ့အခါမျိုးမှာလည်း အသုံးပြုနိုင်ပါတယ်။

Bill Gates ဟာ သူ့ရဲ့အိမ်တစ်အိမ်လုံးကို ဒေါ်လာ ၈၀၀၀၀ အကုန်ကျခံပြီး နံရံမှာ ကြိုက်နှစ်သက်ရာ ပန်းချီ၊ဓာတ်ပုံ၊အနုပညာလက်ရာတွေကို ပေါ်လာအောင် ၊ စိတ်ကြိုက်ပြောင်းနိုင်အောင် ဖန်တီးထားပါသေးတယ်။သူအကြိုက်ဆုံးအနုပညာလက်ရာတွေကို ဖန်တီးစုစည်းထားတာနဲ့တင် ဒေါ်လာ ၁၅၀၀၀၀ နီးပါးကုန်ကျတယ်လို့သိရပါတယ်။

(၄) အိမ်ခြံဝန်းထဲမှာရော ဘယ်လိုတွေ ဖန်တီးတည်ဆောက်ထားလဲ? 

Bill Gates ရဲ့ အိမ်ခြံဝန်းထဲမှာ ပေ ၆၀ နီးပါးရှည်လျားတဲ့ ရေကူးကန်ကျယ်ကြီးရှိပြီး ရေအောက်ထဲမှာ အကြိုက်ဆုံးသီချင်းတွေနားထောင်နိုင်ဖို့ underwater sound system ပါ ထည့်သွင်းထားပါတယ်။

ကားပါကင်တွေလည်း များစွာရှိပြီး အမိုက်ဆုံးကတော့  ကွန်ကရစ်၊ သံချေးမတက်နိုင်တဲ့စတီးတွေနဲ့ တည်ဆောက်ထားတဲ့ မြေအောက် ကားပါကင်ပဲဖြစ်ပါတယ်။ ကား ၁၀ စီးအထက် ဆန့်ပြီး မြင်ဖူးတဲ့လူလည်းသိပ်မရှိဘူးလို့ သိရပါတယ်။

ခြံဝန်းကျယ်ကြီးထဲမှာ ကိုယ်တိုင်ဖန်တီးထားတဲ့ ရေကန်ငယ်ရှိပြီး အဲ့ဒီကန်ထဲမှာ ဆဲလ်မွန်ငါးတွေနဲ့ Trout လို့ခေါ်တဲ့ ငါးတွေ များစွာကူးခတ်နေတာကိုတွေ့ရမှာပါ။ 

အဆုံးသတ်အနေနဲ့ နိဂုံးချုပ်ရမယ်ဆိုရင်တော့ Bill Gates ရဲ့အိမ်ကြီးဟာ နေချင်စရာသဘာဝအငွေ့အသက်တွေနဲ့ပြည့်နှက်နေတဲ့အိမ်ကြီးလို့ဆိုရမှာပါပဲ။ သူ့ရဲ့ အိမ်ကြီးကို အခန်းတွင်းအပူချိန်ညီညွတ်မျှတမှုရှိစေဖို့နဲ့ အပူချိန်လွန်ကဲမှုကို ခံနိုင်ရည်ရှိစေဖို့ သဘာဝသစ်ပင်ပန်းပင်တွေနဲ့ အပေါ်က အုပ်မိုးထားသလို တည်ဆောက်ထားပြီး အိမ်ကြီးရဲ့ပတ်ပတ်လည်မှာလည်း ရာသီဥတုပူတဲ့ဒဏ်ကိုကာကွယ်နိုင်အောင် သစ်ပင်ရှည်ကြီးတွေ စိုက်ပျိုးထားပါသေးတယ်လို့သိရပါတယ်။

ဒီအချက်တွေကတော့ စီးပွားရေးလုပ်ငန်းရှင်ကြီး Bill Gates ရဲ့ နည်းပညာမြင့် အိမ်ကြီး၊ ကမ္ဘာ့တန်ဖိုးအမြင့်ဆုံးအိမ်ကြီးထဲမှာ ပါဝင်ဖန်တီးထားတဲ့ ဖွဲ့စည်းမှုပုံစံတွေပါ။ ပရိသတ်တွေရော Bill Gates ရဲ့ အိမ်ကြီးကို တစ်ခါတစ်ခေါက်အလည်ရောက်ဖူးချင်ကြလား။ ငွေရေးကြေးရေး စိတ်ပူစရာမလိုဘူးဆိုရင် ကိုယ်ပိုင်အိမ်လေးကို ဘယ်လို စိတ်ကြိုက်အလှဆင်မယ်လို့ တွေးထားလဲ။ Comment ထဲမှာ ပြောပြခဲ့ပါဦးနော်။ 
 
ဖတ်ရှုမှုအများအဆုံး အိမ်ခြံမြေဗဟုသုတများ

အိမ်တစ်အိမ်မှာ လူသိနည်းတဲ့ မရှိမဖြစ်တဲ့ လှေကားအကြောင်း

နာမည်ကျော်အနုပညာရှင်တွေပိုင်ဆိုင်ထားကြတဲ့ ကမ္ဘာ့တန်ဖိုးအကြီးဆုံးဇိမ်ခံအိမ်များ

တစ်ခေါက်လောက် အလည်ရောက်သင့်တဲ့ UNESCO ကမ္ဘာ့ အမွေအနှစ် နေရာ ၅ ခု

အလွန်ခေါင်းမာတဲ့ အိမ်ပိုင်ရှင်များ

Posted By : Ra Wai (ShweProperty.com)