ကမ္ဘာ့အိမ်ခြံမြေစျေးကွက်ကို စိတ်ဝင်စားသူတွေအတွက် ဒီတစ်ပတ်တော့ အိမ်ခြံမြေနဲ့ပတ်သက်ပြီး ကမ္ဘာပေါ်မှာ အဝယ်လိုက်ဆုံး အိမ်ကြီးတွေနဲ့ သူတို့ရဲ့ ဗိသုကာဒီဇိုင်းတွေအကြောင်း မျှဝေပေးလိုက်ပါတယ်နော်။ 

Cape Cod House Style 



Cape Cod စတိုင်က ၁၉၃၀ ခုနှစ်လောက်က လူကြိုက်များတဲ့ အိမ်တည်ဆောက်ပုံဒီဇိုင်းပဲဖြစ်ပါတယ်။ တစ်ထပ် ဒါမှမဟုတ် တစ်ထပ်ခွဲပုံစံ ဆောက်လုပ်ထားတဲ့ Cape Cod House Style မှာဆိုရင် အိမ်အပြင်ဘက်ထုတ်ထားတဲ့ ခေါင်မိုးသုံးခုတွဲပုံစံ ပြတင်းပေါက်တွေ ပါဝင်မယ်။ အဆောက်အဦးဘေးဘယ်ညာ ကာရံထားတဲ့သစ်သားနံရံတွေ၊မှန်ပြတင်းပေါက်များစွာနဲ့အတူ အဆင့်မြင့် သစ်သားကြမ်းခင်းတွေနဲ့ ဖွဲ့စည်းတည်ဆောက်ထားပါတယ် ။နဂိုမူလ Cape Cod Style အိမ်တွေဟာ ကျစ်ကျစ်လစ်လစ်နဲ့ ဖွဲ့စည်းထားတာဖြစ်ပေမယ့် တစ်ချို့က အလင်းရောင်ရပြီး လေဝင်လေထွက်ကောင်းတဲ့ အိပ်ခန်းပြတင်းပေါက်တွေ ထည့်သွင်းတိုးချဲ့ထားလေ့ရှိပါတယ်။ များသောအားဖြင့် Cape Cod Style အိမ်တွေမှာ လှေကားတွေကို အချောသတ်တပ်ဆင်ထားတာမျိုးမဟုတ်ပဲ အလွယ်တကူ ပြန်လည်ပြုပြင်နိုင်အောင် တည်ဆောက်ထားတဲ့ပုံစံမျိုးပဲ တွေ့ရများတတ်ပါတယ်။

French Country House Style 



French Country House Style အိမ်ဒီဇိုင်းကတော့ ၁၈ ရာစုကတည်းက အမေရိကန်မှာ တွေ့ရများတဲ့ အိမ်ပုံစံတွေဖြစ်ပါတယ်။ ပြင်သစ်စတိုင်လ်အဆောက်အဦးတွေက (၁၈၀၃) ခုနှစ်က သမ္မတ Thomas Jefferson ဝယ်ယူခဲ့တဲ့ အိမ်ကနေ အစပြုလို့ နောက်ပိုင်းမှာ နာမည်ကြီးလာခဲ့တာပါ။ New Orleans နဲ့ တခြားဒေသတွေမှာလည်း French Country House Style အိမ်တွေဟာ ခေတ်စားခဲ့ပါတယ်။ French Country House Style အိမ်တွေဟာ များသောအားဖြင့် တစ်ထပ်တိုက်လေးတွေဖြစ်ပြီး ပြတင်းပေါက်တွေကလည်း shutter ပုံစံအဖွင့်အပိတ်နဲ့ ခပ်ရှည်ရှည် ခပ်ကျဉ်းကျဉ်းလေးတွေပါ။ ခေါင်မိုးတွေကိုလည်း ထိပ်ချွန်ပုံစံခေါင်မိုးတွေအဖြစ် တည်ဆောက်ထားပြီး နံရံတွေဟာလည်း ရေစိုခံ၊အအေးခံ၊အပူခံတဲ့ ဆေးသားမျိုးနဲ့ ပြုလုပ်ထားတာဖြစ်ပါတယ်။ French Country House Style အိမ်တွေမှာ သဘာဝရှုခင်းတွေနဲ့ လှပတင့်တယ်နေတဲ့ဆင်ဝင်လမ်းမျိုးလည်း မကြာခဏ ထည့်သွင်းတည်ဆောက်လေ့ရှိပါတယ်။

Colonial House Style 



အမေရိကန်စတိုင်အိမ်ဒီဇိုင်းမျိုးကတော့ (၁၉) ရာစုနောက်ပိုင်း ခေတ်စားလာတဲ့ ဒီဇိုင်းမျိုးပါ။ များသောအားဖြင့် Colonial House Style အိမ်တွေဟာ နှစ်ထပ် ဒါမှမဟုတ် သုံးထပ်ဆောက်လေ့ရှိပြီး မီးလင်းဖိုတွေပါဝင်တယ်။ အိမ်ရှေ့မျက်နှာစာကိုလည်း အုတ် ဒါမှမဟုတ် သစ်သားတွေနဲ့ အလှဆင်တည်ဆောက်ထားပြီး မြေညီထပ်မှာ မီးဖိုချောင်ခန်း ၊မိသားစုဧည့်ခန်းတွေရှိပြီး ဒုတိယထပ်မှာတော့ အိပ်ခန်းတွေဖွဲ့စည်းထားပါတယ်။ အလင်းရောင်ကောင်းကောင်းရပြီး လေဝင်လေထွက်လည်းကောင်းတဲ့ ပြတင်းပေါက်တွေလည်း များစွာထည့်သွင်းတည်ဆောက်လေ့ ရှိပါတယ်။



Victorian House Style



Victorian House Style အိမ်ဒီဇိုင်းတွေကတော့ (၁၈၃၇) ခုနှစ်ကနေ (၁၉၀၁) ခုနှစ်ထိ ခေတ်စားထင်ရှားတဲ့ ဒီဇိုင်းမျိုးတွေဖြစ်ပါတယ်။ Victorian House Style အိမ်အတွင်းဘက်က အသုံးအဆောင်တွေ၊ ပစ္စည်းတွေဟာ နူးညံ့လှပတဲ့အသွင်ဆောင်တယ်။ ဒီဇိုင်းအမျိုးအစား စုံလင်တယ်။ ချည်ထည်ပစ္စည်းတွေ သုံးတဲ့အခါမှာလည်း အဆင်ဒီဇိုင်းတွေ၊ အရောင်တွေ၊ အရည်အသွေးတွေကို  အသေးစိတ်ခြယ်မှုန်းပြင်ဆင် အသုံးပြုထားတာဖြစ်ပါတယ်။ အိမ်ရဲ့ဒီဇိုင်းနဲ့အပြင်အဆင်ဟာ ခေတ်ဟောင်းပုံစံ အသွင်အပြင်ပေါက်ပေမယ့် ခေတ်မီဆန်းသစ်တဲ့ချည်ထည်နဲ့ အရောင်ဆန်းတွေကို ထည့်သွင်းပြင်ဆင်ထားတာကို မြင်ရမှာပါ။ ဒီလိုမျိုး  Victorian House Style အိမ်တွေမှာ ရှေးမူမပျက်တဲ့ပုံစံနဲ့ ခေတ်မီဆန်းသစ်တဲ့ပုံစံကို တွဲဖက်မြင်တွေ့ရလေ့ရှိပါတယ်။ Victorian House Style အိမ်တွေရဲ့ အရှေ့မျက်နှာစာဒီဇိုင်းတွေဟာလည်း မျက်စိကိုဖမ်းစားနိုင်တဲ့လှပခန့်ငြားတဲ့ဒီဇိုင်းတွေဖြစ်ပြီး ပြတင်းပေါက်ဒီဇိုင်းတွေဟာလည်း ပတ်ပတ်လည်ပုံစံတပ်ဆင်ထားတာပဲဖြစ်ပါတယ်။

Tudor House Styles



Tudor House Style အိမ်ဒီဇိုင်းတွေဟာ (၁၆) ရာစုခေတ်တုန်းက လူသိများထင်ရှားတဲ့ ဒီဇိုင်းမျိုးဖြစ်ပြီး ဒီနေ့ခေတ်မှာ မြင်တွေ့ရတဲ့ Tudor House Style အိမ်တွေကတော့ အရင်ခေတ်ပုံစံကို အခြေခံပြီး ပြန်လည်ပြုပြင်ထားတာ များပါတယ်။Tudor House Style အိမ်တွေမှာဆိုရင်လည်း ထိပ်ချွန်ခေါင်မိုးပုံစံအဆောက်များပြီး ထူးခြားတာကတော့ အိမ်ခေါင်မိုးတွေကို ဆက်ထားတဲ့ပုံစံမျိုးတွေပါပဲ။ အိမ်ရှေ့မျက်နှာစာကိုလည်း ဒီဇိုင်းဆန်းတွေနဲ့ ပုံဖော်အလှဆင်လေ့ရှိပြီး ပြတင်းပေါက်ငယ်လေးတွေပါဝင်တဲ့ ရှည်ရှည်မြောမြောပြတင်းပေါက်တွေနဲ့ ဖွဲ့စည်းတည်ဆောက်လေ့ရှိပါတယ်။

စစ်တမ်းကောက်ယူချက်တွေအရ ဒီအထင်ရှားကျော်ကြားတဲ့အိမ်ကြီးတွေဟာ ကမ္ဘာပေါ်မှာ အဝယ်များပြီး နေထိုင်မှုများတဲ့ အိမ်ကြီးအိမ်ကောင်းတွေပဲဖြစ်ပါတယ် ။မိတ်ဆွေတို့ရော ဘယ်လိုအိမ်မျိုးကို နှစ်သက်လဲ။ အခုဖော်ပြသွားတဲ့ အိမ်တွေထဲက ဘယ်လိုအိမ်မျိုးကို ပိုင်ဆိုင်ချင်မလဲ။ 

နောက်တစ်ပတ်တွေမှာလည်း ကမ္ဘာတစ်ဝှမ်းက ထူးထူးခြားခြားအိမ်ကြီးတွေနဲ့ စိတ်ဝင်စားစရာကောင်းတဲ့ဗဟုသုတွေကို ပြောပြပေးသွားဦးမှာမို့ Shwe Property Website ထဲကိုလာရောက်လည်ပတ်ဖတ်ရှု့ပေးကြပါဦးလို့ ဖိတ်ခေါ်လိုက်ပါရစေနော်။

ဖတ်ရှုမှုအများအဆုံး အိမ်ခြံမြေဆောင်းပါးများ

အလွန်ခေါင်းမာတဲ့ အိမ်ပိုင်ရှင်များ

JOHNNY DEPP နဲ့ AMBER HEARD ရဲ့ အခင်းဖြစ်ပွားစဉ်က အိမ်ကြီးအကြောင်း

BILL GATES ရဲ့ နည်းပညာမြင့် အိမ်ကြီးအကြောင်း

ဖုန်းရွှေပညာအရ အိမ်ဆောက်သင့်တဲ့ မြေကွက်နှင့် အိမ်မဆောက်သင့်တဲ့ မြေကွက် အနေအထားအကြောင်း

Posted By : Ra Wai (ShweProperty.com)