ယနေ့၊ နံနက်(၁၀)နာရီတွင် ကျင်းပသော လွှတ်တော်အစည်းအဝေး၌ သဘာဝဘေးအန္တရာယ် ကြိုတင်ကာကွယ်နိုင်ရေးအတွက် လိုအပ်လျက်ရှိသည့် Cyclone Shelter တစ်လုံး ဆောက်လုပ်ပေးရန် အစီအစဉ်ရှိ၊မရှိကို သိလိုပါကြောင်းကို တပ်မတော်သား လွှတ်တော်ကိုယ်စားလှယ် ဗိုလ်မှူးရဲထွဋ်က မေးမြန်းခဲ့သည်။
မေးခွန်းနှင့်စပ်လျဉ်း၍ လူမှုရေးဝန်ကြီးက “ကွမ်းခြံကုန်းမြို့နယ်တွင် မုန်တိုင်းဒဏ်ခံ ဆိုင်ကလုန်း Shelter (၄)လုံးရှိသော်လည်း သောင်ခုံကျေးရွာမှာ ပင်လယ်ဝဖြစ်၍ အမှန်တကယ် ဆောက်လုပ်သင့်ပါတယ်။
တိုင်းအစိုးရအဖွဲ့အနေဖြင့်လည်း ရန်ကုန်တိုင်းဒေသကြီး ဖွံ့ဖြိုးတိုးတက်မှု အတွက် ပြည်တွင်း၊ ပြည်ပ ရင်းနှီးမြှုပ်နှံလိုသူများအား ဖိတ်ခေါ်ရာတွင် အထောက်အကူပြု အချက်အလက်များ ပေးနိုင်ရေးနှင့် Yangon Project Bank ၏ ဒေသဖွံ့ဖြိုးတိုးတက်ရေး အတွက် ဆောင်ရွက်မည့် လုပ်ငန်းစီမံကိန်းများတွင်လည်း သုံးခွမြို့နယ်၊ ဒဂုံဆပ်ကမ်းမြို့နယ်၊ ကွမ်းခြံကုန်းမြို့နယ်များတွင် မုန်တိုင်းဒဏ်ခံ ဆိုင်ကလုန်း Shelter (၁)လုံးစီ ဆောက်လုပ်နိုင်ရေး ထည့်သွင်း ရေးဆွဲထားပါတယ်။
ထို့အပြင် ဒုတိယသမ္မတ ဦးဆောင်တဲ့ အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှု ကော်မတီသို့လည်း ၂၀၂၀-၂၀၂၁ ခု ဘဏ္ဍာရေးနှစ်မှာ ပါဝင်နိုင်ရန် တင်ပြ၍ လမ်းညွှန်မှု ခံယူဆောင်ရွက်သွားမှာ ဖြစ်ကြောင်း၊ ခွင့်ပြုဘတ်ဂျက်ရရှိပါက ဆောင်ရွက်ပေးသွားမှာ ဖြစ်ပါတယ်။” ဟု ဝန်ကြီးဦးနိုင်ငံလင်းက ပြောသည်။
ဆက်လက်၍ ဆူနာမီဘေး၊ မုန်တိုင်းဘေးအစရှိသော သဘာဝဘေးအန္တရာယ်များ ကျရောက်ချိန်တွင် ပင်လယ်ကမ်းခြေနှင့် ထိစပ်သော ဒေသများမှ ပြည်သူများ ယာယီခိုလှုံနိုင်ရန်အတွက် မုန်တိုင်းဒဏ်ခံ ဆိုင်ကလုန်း Shelterများကို တိုင်းဒေသကြီး၊ ပြည်နယ်အသီးသီးတွင် ၂၀၀၉ ခုနှစ်မှစ၍ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေးဝန်ကြီးဌာနနှင့် အလှူရှင်များ၏ အလှူငွေများဖြင့် တည်ဆောက်ခဲ့ပြီးဖြစ်ရာ ယခုအခါ ဆိုင်ကလုန်း Shelter စုစုပေါင်း (၂၃၂) လုံးအား တည်ဆောက်ပေးခဲ့ပြီးဖြစ်ပါတယ်။
ရန်ကုန်တိုင်းဒေသကြီး တောင်ပိုင်းခရိုင်အတွင်း မြို့နယ်များရှိ ပင်လယ်ကမ်းစပ်နှင့် နီးစပ်သော ကျေးရွာများတွင် မုန်တိုင်းဒဏ်ခံ ဆိုင်ကလုန်း Shelter များ ဆောက်လုပ်ထားလျက်ရှိရာ ခရမ်းမြို့နယ်ရှိ အုန်းပင်ကျေးရွာနှင့် ဘိုကလေးကျေးရွာတို့တွင် (၂) လုံး၊ သုံးခွမြို့နယ်ရှိ ဇောတိကကျေးရွာတွင် (၁) လုံး၊ ကျောက်တန်းမြို့နယ်၊ ကုလားတန်း ကျေးရွာအုပ်စုရှိ သံတဲကျေးရွာတွင် (၁) လုံး၊ ကော့မှူးမြို့နယ်ရှိ သမင်ခြံကျေးရွာတွင် (၁)လုံးနှင့် ကွမ်းခြံကုန်းမြို့နယ်ရှိ လက်ခုပ်ကုန်းကျေးရွာ၊ မယ်ရကုန်းကျေးရွာ၊ မှော်ဘီကျေးရွာနှင့် သုံးခွကျေးရွာများတွင် (၄) လုံး၊ စုစုပေါင်း (၉) လုံးရှိခဲ့ပြီဖြစ်ပါတယ်။
အဆောက်အဦများ ရေရှည်ခိုင်ခံ့ ကောင်းမွန်စေရန် ပညာရေးဝန်ကြီးဌာနနှင့် ကျေးရွာအုပ်ချုပ်ရေးမှူးများ၊ လူမှုကူညီရေးအသင်းများမှ ထိန်းသိမ်းထားရှိပြီး ဆောင်ရွက်လျက်ရှိကြောင်း လူမှုရေးဝန်ကြီးက ပြောကြားခဲ့သည်။
Ref & Photo Credit : Myanmar Builders Guide
Posted By : Sint Sint (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
