သတ်မှတ်စည်းကမ်းမညီညွတ်တဲ့ အဆောက်အအုံတွေကို ရန်ကုန်မြို့တော်စည်ပင်သာယာရေးကော်မတီက ပြီးခဲ့သည့်လကုန်အထိ မြေပြင်အထိဖြိုဖျက်တဲ့အဆောက်အုံ ၄၅ လုံးရှိပြီး တရားစွဲဆို အရေးယူထားတဲ့ အဆောက်အအုံပေါင်း ၃၀၀၀ ကျော်ရှိပြီလို့ သိရပါတယ်။
"အဆောက်အအုံတွေကို တရားမဝင်တည်ဆောက်တာတွေ လျော့နည်းသွားအောင် ဖြိုတယ်၊ အရေးယူတယ်၊ အခုနောက်ပိုင်းတရားစွဲတာတွေ ရပ်ကွက်အလိုက်အဖွဲ့တွေခွဲပြီး စစ်ဆေးတာတွေ လုပ်ဆောင်နေတယ်"လို့ ရန်ကုန်မြို့တော်စည်ပင်သာယာရေးကော်မတီ အင်ဂျင်နီယာဌာန အဆောက်အအုံ၊ တာဝန်ရှိသူတစ်ဦးက ပြောပါတယ်။
ဖြိုဖျက်အရေးယူမှု
မြေပြင်အထိ ဖြိုဖျက်အရေးယူတဲ့ အဆောက်အအုံပေါင်း ၄၅လုံး ရှိပါတယ်။ တချို့အဆောက်အအုံတွေကို ဖောင်ဒေးရှင်းအထိ ဖြိုဖျက်တာမျိုး မဟုတ်ပဲ ဒုတိယထပ်လောက်အထိ ဖြိုဖျက်တာတွေ ရှိပါတယ်။ တရားစွဲဆို အရေးယူထားတဲ့ အဆောက်အအုံ ၃၇၈၀ လုံးရှိပါတယ်။ တရားမဝင်အဆောက်အအုံ အများဆုံးရှိတဲ့ မြို့နယ်တွေကတော့ သင်္ဃန်းကျွန်း၊ တောင်ဥက္ကလာ၊ မရမ်းကုန်း၊ အင်းစိန်၊ လှိုင်စတဲ့ မြို့နယ်တွေဖြစ်ပါတယ်။
"တချို့အိမ်တွေကိုတော့ ပုံစံဒီဇိုင်းလွဲရင် လွဲနေတဲ့ နေရာတွေပဲ ဖြိုဖျက်ခိုင်းတယ်၊ မြေပြင်အထိ ဖြိုဖျက်တာတွေကတော့ လုံးဝပုံစံမကျတဲ့ တရားမဝင်အဆောက်အအုံ တွေကိုပဲ" လို့ မြို့တော်စည်ပင် အင်ဂျင်နီယာဌာန အဆောက်အအုံ၊ တာဝန်ရှိသူတစ်ဦးက ပြောပါတယ်။
အရေးယူမှုပြောင်းလဲ
တရားစွဲဒဏ်ကြေးနဲ့ ကြိုတင်ဆောက်ဒဏ်ကြေးတွေကို အရင်က ခုနှိမ်ပေးတာတွေရှိပေမယ့် နောက်ပိုင်းမှာတော့ ဒဏ်ကြေး သက်သက်စီ ကောက်ခံပြီး အရေးယူ ဆောင်ရွက်နေပါတယ်။ ဒဏ်ကြေးနှုန်းထားတွေကိုလည်း ကျပ် ၁၀,၀၀၀ ကနေ ကျပ် ၅၀,၀၀၀ အထိ သတ်မှတ်ထားတယ်။ အရေးယူ တရားစွဲဆိုမှုကို ထောင်ဒဏ် တစ်နှစ်ကနေ သုံးနှစ်အထိ သတ်မှတ် အရေးယူထားပါတယ်။
ဒါ့အပြင် သက်ဆိုင်ရာဌာနတွေရဲ့ တာဝန်ခံတွေကလည်း အဖွဲ့သုံးဖွဲ့ ခွဲပြီး လမ်းအလိုက် မှတ်တမ်းကောက်ယူ စစ်ဆေးထားတဲ့ အဆောက်အအုံထပ်တိုးမှု ရှိမရှိကို အဖွဲ့အလိုက် အဆင့်ဆင့် စစ်ဆေးတင်ပြမှာ ဖြစ်တယ်လို့ သိရပါတယ်။
ခွင့်ပြုပေးမှုပုံစံပြောင်း
အဆောက်အအုံဒီဇိုင်း တင်ပြလာမှုအပေါ် စစ်ဆေးမှုအပိုင်းကိုလည်း ပညာရှင်အဖွဲ့တွေနဲ့ စည်ပင်တို့ပူးပေါင်းပြီး မြန်ဆန်အောင်ခွင့်ပြုပေးနေပါတယ်။ အရင်ကတော့ ခွင့်ပြုမှုကို အချိန်တစ်လကျော် သတ်မှတ်ထားပေမယ့် အခုနောက်ပိုင်းမှာ သက်ဆိုင်ရာ AC တွေက စစ်ဆေးခွင့်ပြုပေးတာကြောင့် အရင်ထက် ခွင့်ပြုမိန့်ချပေးမှု မြန်လာတယ်လို့ သိရပါတယ်။
"ဒီဇိုင်းရေးဆွဲမှု အပိုင်းမှာ အတွေ့အကြုံရှိတဲ့ အင်ဂျင်နီယာတွေနဲ့ စုပေါင်းပြီး ပညာရှင်အဖွဲ့တွေထားပြီး ခွင့်ပြုပေးတယ်၊ အရင်ထက် နှစ်ဆလောက်ပိုမြန်လာတယ်"လို့ မြို့တော်စည်ပင် တာဝန်ရှိသူတစ်ဦးက ပြောပါတယ်။
၂၀၁၄ ခုနှစ်ဟာ အထပ်မြင့် အထပ်နိမ့် လာရောက်လျှောက်ထား ခွင့်ပြုပေးမှု အများဆုံး နှစ်တစ်နှစ်ဖြစ်ပြီး အဆောက်အအုံပေါင်း ၇၀၀၀ နီးပါးစိစစ် ခွင့်ပြုပေးခဲ့တယ်လို့ သိရပါတယ်။
Ref : The Kumudra
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
