ယာဉ်အစီးရေ လေးသိန်းကျော် ရှိလာသော ရန်ကုန်မြို့၏ ယာဉ်ကြောပိတ်ဆို့မှု ပြဿနာမှာ ပိုမိုဆိုးရွားလာသည်။ အဓိက အကြောင်းရင်း အနေဖြင့် ယာဉ်အစီးရေနှင့် လမ်းအကျယ်အဝန်းများ မလုံလောက်ခြင်းအပြင် ယာဉ်ရပ်နားရန် နေရာအလုံအလောက် မရှိခြင်းကလည်း ပြသနာဖြစ်နေသည်။

  မော်တော်ယာဉ်တင်သွင်းမှု စနစ်အပြောင်းအလဲများကြောင့် ရန်ကုန်မြို့တွင် ယာဉ်အစီးရေ တိုးပွားလာခဲ့ကြောင်း၊ ပြီးခဲ့သည့် ၂၀၀၇ ခုနှစ်က ရန်ကုန်မြို့တွင် ယာဉ်အစီးရေ နှစ်သိန်းနီးပါးခန့်မှ ၂၀၁၄ ခုနှစ်တွင် ယာဉ်အစီးရေ လေးသိန်းနီးပါးသို့ တိုးတက်လာခဲ့ရာ ထိုပမာဏနှင့် လျော်ညီသည့် ယာဉ်ရပ်နားသည့်နေရာ မရှိခြင်းကြောင့် ကားပါကင် အခက်အခဲကို ပိုမိုဆိုးရွားစွာ ခံစားနေရသည်။ ကားပါကင် မရှိခြင်းကြောင့် မြို့တွင်း ခြောက်လမ်းသွား လမ်းများတွင် အချို့မှာ လေးလမ်းသာ သွားလို့ရသည်။ ကျန်သည့် နှစ်လမ်းက လမ်းဘေးရပ်ထားသည့် ယာဉ်များကြောင့် သွား၍မရ။ အချို့လမ်းများတွင် လေးလမ်းသွားအထိ လမ်းဘေးရပ်နားသည့် ယာဉ်များဖြင့် ပြည့်နှက်နေသည်ကို တွေ့ရသည်။ ရုံးတက်ရုံးဆင်းချိန်၊ ကျောင်းတက်ကျောင်းဆင်းချိန်များတွင် ယင်းပြသနာများ ပိုမိုဖြစ်ပွားနေသည်။

ထိုပြသနာကို  ဖြေရှင်းရန် ကားပါကင် ပြသနိုင်မှ ကားတင်သွင်းနိုင်သည့် စနစ်ကို အကောင်အထည် ဖော်ခဲ့သည်။ ယေဘုယျအားဖြင့် ကြည့်လျှင်မူ ယင်းသို့ လုပ်ဆောင်ခြင်းအားဖြင့် ကားပါကင် ပြသနာများ လည်သွားနိုင်သည်ဟု ထင်ရသော်လည်း ကားပါကင်နေရာ ပြသ ရောင်းစားသည့် ခွင်တစ်ခု ပေါ်လာသည်။ ကားပါကင် ပြသနိုင်သည့် နေရာများကျပ် ငါးသိန်း၊ လေးသိန်း စသည့်ဖြင့် ပေါက်ဈေးများ ရှိနေပြီး ယင်းသို့ လုပ်ကိုင်နေသူများစွာ ပေါ်ပေါက်လာသည်။

“ကားတင်သွင်းချင်ရင် ကားပါကင်နေရာရှိမှ တင်သွင်းရမယ်ဆိုတဲ့ စနစ်က ကောင်းပါတယ်။ သို့သော်လည်း ကျွန်တော့်ကို တက္ကစီသမားတစ်ယောက် ပြောဖူးတယ်။ ဦးလေးရေ ကားပါကင် ပြရမယ်ဆိုတော့ ပြဖို့နေရာကို ရောင်းစားတာတွေ ပေါ်လာလိမ့်မယ်ဗျာ ဆိုတဲ့ စကားကို သတိရတယ်။ အခု အဲဒီလို ဖြစ်နေပြီလားလို့လည်း တွေးမိတယ်။ အဲဒီ ကားပါကင် ပြတဲ့နေရာမှာ တကယ်ရော ကားထားမှာလားဆိုတာ မေးခွန်းထုတ်စရာ ဖြစ်လာတယ်” ဟု သင်္ဃန်းကျွန်းမြို့နယ် မဲဆန္ဒနယ်အမှတ် (၁) မှ ရန်ကုန်တိုင်းဒေသကြီး လွှတ်တော်ကိုယ်စားလှယ် ဦးကျော်က သုံးသပ်ပြောကြားသည်။

အလားတူ ရန်ကုန်မြို့တော် စည်ပင်သာယာရေး ကော်မတီက ရန်ကုန်မြို့တွင်း အဆင့်မြင့် ကားပါကင်များ၊ အထပ်မြင့် ကားပါကင်များ ဆောက်လုပ်၍ ကားပါကင်ပြဿ နာကို ဖြေရှင်းမည်ဟု ထုတ်ပြန်ခဲ့ပြီး မင်္ဂလာဈေး အနီးတွင် ယာဉ်အစီးရေ ၄၅၀ ခန့် ရပ်နားနိုင်သော အထပ်မြင့် ကားပါကင်များ၊ တောင်ဥက္ကလာပမြို့နယ် ၁၄၊ ၁၅ လမ်းဆုံရှိ ယခင် ရတနာနှင့် မြသီတာပန်းခြံနှစ်ခုကို ဖျက်သိမ်း၍ အထပ်မြင့် ကားပါကင်များကို ဆောက်လုပ်ခဲ့သည်။

သို့သော်လည်း ယင်းကားပါကင်များမှာ အမှန်တကယ် ထိရောက်မှု နည်းပါးပြီး တောင်ဥက္ကလာပမြို့နယ် ၁၄၊ ၁၅ လမ်းဆုံရှိ အထပ်မြင့် ကားပါကင်များမှာလည်း ယာဉ်အစီးရေ ၃၀၀ နီးပါး ရပ်နားနိုင်သော်လည်း အမှန်တကယ်တွင်မူ တစ်နေ့လျှင် ယာဉ်အစီးရေ ၃၀ ခန့်သာ လာရောက်ရပ်နားမှု ရှိသည်ဟု သိရသည်။

“တောင်ဥက္ကလာပ ၁၄၊ ၁၅ လမ်းဆုံမှာ အထပ်မြင့်ကားပါကင် ဆောက်လိုတယ်။ ဒီနေရာကို ဘယ်သူလာမှာလဲ။ ဒီနေရာမှာ ရှော့ပင်းစင်တာတွေ ရှိသလား။ စီးပွားရေးဇုန်ကြီး ဖြစ်သလား။ စဉ်းစားရမယ်။ ပြီးတော့ ညအိပ်ယာဉ်တွေကလည်း ဒီနေရာက တော်ရုံတန်ရုံ ရပ်ကြတာလည်း မဟုတ်ဘူး။ လုပ်တဲ့ နေရာတွေက လွဲနေတယ်လို့ ပြောရမှာပေါ့” ဟု တောင်ဥက္ကလာပမြို့နယ်တွင် နေထိုင်သူ ဦးကျော်ဝင်းက ပြောကြားသည်။

ယင်းအထပ်မြင့် ကားပါကင်နှစ်ခုကို တည်ဆောက်သည့် ကုန်ကျစရိတ် ကျပ်သိန်း ထောင်ဂဏန်းအထိ ရှိသည်ဟု သိရသည်။

“ရန်ကုန်မြို့မှာ အဓိကပြသနာ ကားနဲ့လမ်းနဲ့ မမျှတာပဲ။ ကားပါကင်မှာ ရပ်လို့ရတဲ့ ပမာဏထက် ကားအစီးရေက ပိုများနေတယ်။ ကားပါကင် လုံလောက်မှု မရှိတာပေါ့။ ကားပါကင်တွေ လုပ်မယ်ဆိုလည်း ထိထိရောက်ရောက် လုပ်သင့်တယ်။ အခုဆိုရင် ကားပါကင်တွေ ဆောက်ပေမယ့်လည်း ထိရောက်မှု မရှိဘူး။ ဒါ ဘာကြောင့်လဲဆိုတာ ရှင်းပါတယ်။ မလိုအပ်တဲ့နေရာမှာ ဆောက်တဲ့အတွက်ကြောင့်” ဟု စီးပွားရေးလုပ်ငန်းရှင် ဦးဇင်အောင်က သူ၏ အမြင်ကို ပြောကြားသည်။

သို့ဖြစ်ရာ အထပ်မြင့်ကားပါကင်များ အမှန်တကယ် လိုအပ်သည့် ရန်ကုန်မြို့တွင်း Down Town ဧရိယာများတွင် ပိုမို အကောင်အထည် ဖော်သင့်ပေသည်။ သို့သော်လည်း မြို့တွင်း Down Town ဧရိယာများတွင် မြေနေရာများ မရှိခြင်းကြောင့် ကားပါကင်များ လုပ်ဆောင်ရန် အခက်အခဲ ရှိနေသည်ဟု ရန်ကုန်မြို့တော် စည်ပင်သာယာရေး ကော်မတီဆိုပြီး မြေနေရာလွတ် ရှိပါကလည်း စည်ပင်သာယာ၏ စီမံခန့်ခွဲပိုင်ခွင့်ရှိသည့် မြေဖြစ်မှသာ ဖော်ဆောင်နိုင်မည်ဟုလည်း ဆိုသည်။

ထို့အတူ ရန်ကုန်မြို့တွင် အဆင့်မြင့် ကားပါကင်များ ထပ်မံဖော်ဆောင်ရန် တင်ဒါအချို့ ခေါ်ယူထားသော်လည်း ကြန့်ကြာမှုအချို့ ရှိနေပြီး မူလက ရန်ကုန်မြို့လယ် ဆိပ်ကမ်းသာလမ်းတွင် ၁၅ ထပ်အမြင့်ရှိ ကားပါကင်များ ဆောက်လုပ်ရန် စီစဉ်ခဲ့သော်လည်း မြေနေရာအား ကန့်ကွက်မှုအချို့ ရှိနေ၍ ဆောက်လုပ်မည့် အစီအစဉ် ရပ်ဆိုင်းထားရမှုများလည်း ရှိခဲ့သည်။

“တိုက်ခန်းနဲ့နေတဲ့ သူတွေအတွက် ကားပါကင်က တော်တော်ကို တိုင်ပတ်တယ်။ ကားပါကင် နေရာရှိမှာ ကားတင်သွင်းခွင့် ရတယ် ဆိုပေမယ့် လုပ်စားတာတွေ အများကြီးပဲ။ ပြောရမယ်ဆိုရင် ခွင်ဖန်လို့ ရလာတာပေါ့။ ကားပါကင် ပြဿနာကို ဖြေရှင်းနိုင်ရင်တော့ တော်တော် အခြေအနေ ကောင်းနိုင်ပါတယ်။ နောက်ပြီး စနစ်တကျ လုပ်နိုင်မယ်ဆိုရင် နိုင်ငံတော်ရဲ့ ဘဏ္ဍာငွေတောင် တိုးလာနိုင်တဲ့ အခြေအနေ အများကြီး ရှိတယ်” ဟု လသာမြို့နယ်တွင် နေထိုင်သူ ဦးမြင့်ဇော်က ပြောကြားသည်။

ထို့ကြောင့် ရန်ကုန်မြို့တွင် ကားပါကင်များ ဦးစားပေး ဖြေရှင်းရန် အရေးတကြီး လိုအပ်နေပြီး ယခင် ဗိုလ်ချုပ်ဈေး လဟာပြင်ကဲ့သို့ နေရာများအား ဖျက်သိမ်းကာ စီမံကိန်းများ ဆောက်လုပ်ခဲ့ခြင်းကြောင့် ယင်းနေရာများတွင် ကားပါကင်များစွာ မဖြစ်မနေ ပြန်လည်ထည့်သွင်းပေးရန် လိုအပ်ကြောင်း သင်္ဃန်းကျွန်းမြို့နယ် မဲဆန္ဒနယ်အမှတ် (၁) မှ ရန်ကုန်တိုင်းဒေသကြီး လွှတ်တော်ကိုယ်စားလှယ် ဦးကျော်က သုံးသပ်သည်။

ထို့ပြင် ရန်ကုန်မြို့တွင် ဆောက်လုပ်သော အဆောက်အအုံများ၌ ကားပါကင်နေရာများ မဖြစ်မနေ ထည့်သွင်းဆောက်လုပ်ရန်၊ အခန်းတစ်ခန်းလျှင် ကားတစ်စီးနှုန်းဖြင့် ထည့်သွင်းဆောက်လုပ်ရန် အဆောက်အအုံ နယ်နိမိတ် ခြံဝင်းအတွင်း ထည့်သွင်းဆောက်လုပ်နိုင်ခြင်း မရှိပါက အဆောက်အအုံ မြေညီထပ်တွင် ထည့်သွင်းရန် ရန်ကုန်မြို့တော် စည်ပင်သာယာရေး ကော်မတီက ညွှန်ကြားချက်များ ထုတ်ပြန်ခဲ့သော်လည်း အမှန်တကယ် လက်တွေ့တွင် ပြုလုပ်နိုင်မှု မရှိချေ။ အထူးသဖြင့် မြို့တွင်းနေရာများတွင် မြေကွက်ကျဉ်း၌ ဆောက်လုပ်သော အဆောက်အအုံများတွင် ယင်းစည်းမျဉ်းများကို လိုက်နာနိုင်ရန် ခက်ခဲသည်ဟု ဆောက်လုပ်ရေးလုပ်ငန်း လုပ်ကိုင်သူ အချို့က ဆိုကြသည်။

သို့ဖြစ်ရာ လက်ရှိဝန်ကြီးဌာန အချို့က ပိုင်ဆိုင်သော၊ စီမံကိန်းများ အကောင်အထည် ဖော်နိုင်ခြင်း မရှိသေးသည့် မြို့တွင်းရှိ နေရာလွတ်များတွင် ယာဉ်အစီးရေ အများအပြား ရပ်နားနိုင်သည့် အဆင့်မြင့် ကားပါကင်များ တည်ဆောက်နိုင်မှသာ မြို့တွင်းရှိ ယာဉ်ကြောပိတ်ဆို့မှုကို အတိုင်းအတာ တစ်ခုအထိ လျှော့ချနိုင်မည်ဟု ရန်ကုန်မြို့ပြရေးရာ ကျွမ်းကျင်သူ အချို့က သုံးသပ်ကြသည်။

“တကယ်ဆို မြို့တွင်းမှာ အထပ်မြင့် ကားပါကင်တွေ ရှိသင့်တယ်။ ကားနဲ့ ရုံးတက်တဲ့သူတွေ၊ အချိန်ကြာမြင့်စွာ ရပ်ချင်တဲ့သူတွေ အဲဒီမှာ သွားရပ်။ နာရီနဲ့ ပိုက်ဆံကောက်။ သူက အဲဒီကနေ သွားချင်တဲ့နေရာကို နည်းနည်း လမ်းလျှောက်ပြီး ထပ်သွား။ ဒါဆိုရင် တော်တော်ကို အဆင်ပြေနိုင်တယ်။ ဒါပေမဲ့ အဲဒီလို အပ်ချက်ကို မဖြည့်ဆည်းနိုင်သေးဘူး။ သူတို့ဘက်က မြေနေရာ အခက်အခဲရှိတယ်လို့ ပြောမှပဲ။ ဘာဖြစ်လို့လဲဆိုတော့ ဒီအချိန်မှာ မြေဈေးက ကောင်းနေတာပဲ။ ဒါပေမဲ့ အချို့ဝန်ကြီးဌာနပိုင် မြေတွေရှိတယ်။ ဥပမာ-စိန်ဂျွန်းနားက ကျန်းမာရေးဝန်ကြီးဌာနပိုင်မြေ ဘာမှလည်း လုပ်တာ မတွေ့သေးဘူး။ ဘာမှမလုပ်သေးမယ့် အတူတူ ကားပါကင်တွေ လုပ်ပေးသင့်တယ်” ဟု ကျောက်တံတားမြို့နယ်တွင် နေထိုင်သူ ဦးကျော်အောင်က သုံးသပ်သည်။

ထို့ပြင် ယခင် ရန်ကုန်မြို့တွင်း လမ်းများပေါ်တွင် ယာဉ်ရပ်နားခကို တစ်နာရီလျှင် မည်မျှဟူ၍ အချိန်ကာလတစ်ခု သတ်မှတ်၍ ယာဉ်ရပ်နားခ ကောက်ခံသည့် စနစ်ကို ကျင့်သုံးခဲ့ရာမှာ ၂၀၁၃ ခုနှစ် ဧပြီလမှ စတင်၍ ယင်းသို့ ငွေကြေး မကောက်ခံတော့ကြောင်း၊ ငွေကြေး မကောက်ခံတော့သဖြင့် ယာဉ်များ အချိန်ကြာမြင့်စွာ ရပ်နားထားပြီး စည်းကမ်းမဲ့မှု အချို့ကြောင့် ယာဉ်ကြောပိတ်ဆို့မှု ပိုဖြစ်လာ၍ ၂၀၁၄ ခုနှစ် ဧပြီလမှစတင်၍ ယာဉ်ရပ်နားခမှုများ ပြန်လည်ကောက်ခံခဲ့သည်။

ထို့သို့ ယာဉ်ရပ်နားခ ပြန်လည်ကောက်ခံမှု သိပ်မကြာမီ၌ ၂၀၁၄ နှစ်ကုန်ပိုင်း၍ ယာဉ်ရပ်နားခ ကောက်ခံသည့်စနစ်ကို ပြန်လည်ဖျက်သိမ်းခဲ့ခြင်းကြောင့် မူဝါဒပိုင်း အမျိုးမျိုး ပြောင်းလဲမှုက ယာဉ်ရပ်နားသူများအတွက် အခက်အခဲများ ဖြစ်နေသည်ဟု ဆိုကြသည်။ ယာဉ်ရပ်နားခ ကောက်ခံမည် ဆိုပါကလည်း တိကျခိုင်မာသည့် မူဝါဒ အစီအစဉ်များ ချမှတ်ကာ မလိုအပ်ဘဲ အချိန်ကြာမြင့်စွာ ရပ်တန့်ထားသည့် ယာဉ်များအတွက် ထိရောက်သည့် ရပ်နားခများ ကောက်ခံနိုင်မှသာ မလိုအပ်ဘဲ အချိန်ကြာမြင့်စွာ ရပ်တန့်ထားခြင်းများ လျော့ပါးသွားနိုင်မည်ဟု သုံးသပ်ကြသည်။

ထို့ပြင် ရန်ကုန်မြို့၏ ကားပါကင် ပြသနာတွင် သက်ဆိုင်ရာ ဆိုင်ခန်း၊ ရုံးခန်း၊ ကုမ္ပဏီ စသည်တို့က မိမိသက်ဆိုင်ရာ ရှေ့နေရာများ၌ ယာဉ်မရပ်ရဟူသည့် ဆိုင်းဘုတ်များ၊ ဌာနဆိုင်ရာ ယာဉ်များသာဆိုသည့် ဆိုင်းဘုတ်များဖြင့် ယာဉ်ရပ်နားမှု ကန့်သတ်ခြင်းကတည်း ပါဝင်နေသည်။ ယခင် ရန်ကုန်မြို့၌ ကိုယ်ပိုင်ပုဂ္ဂလိက ကားပါကင်နေရာများကို ရန်ကုန်မြို့တော် စည်ပင်သာယာရေး ကော်မတီက ခွင့်ပြုခဲ့ပြီး ၂၀၁၃ ခုနှစ် ဧပြီ ၁ ရက်မှ စတင်၍ ပုဂ္ဂလိက ကိုယ်ပိုင်ကားပါကင် လျှောက်ထားမှုများကို လက်မခံတော့ကြောင်း၊ ထိုသို့ ပုဂ္ဂလိက ကားပါကင်များကို ခွင့်မပြုတော့ခြင်းကြောင့် မည်သည့် ကားပါကင်နေရာ၌မဆို ယာဉ်ရပ်နားခွင့်ပြုပြီး ယခင်ကဲ့သို့ မိမိဆိုင်ရှေ့၊ ရုံးရှေ့များတွင် ယာဉ်မရပ်ရဟူ၍ ဆိုင်းဘုတ်များရေးသား၍ ယာဉ်ရပ်နားမှု ကန့်သတ်ခြင်းများ ပြုလုပ်၍ မရတော့ကြောင်း ရန်ကုန်မြို့တော် စည်ပင်သာယာရေး ကော်မတီက ဆိုသည်။

သို့သော်လည်း ယခုအချိန်အထိ ယင်းသို့ ယာဉ်မရပ်ရ၊ ဌာနဆိုင်ရာ ယာဉ်များသာ ဟူသည့် ဆိုင်းဘုတ်များ ရှိနေဆဲပင်ဖြစ်ပြီး ယာဉ်ရပ်နားရန် အခက်အခဲများစွာ ရှိနေကြောင်း ရန်ကုန်မြို့တွင်း သွားလာနေသော ယာဉ်ပိုင်ရှင်များက ဆိုသည်။

“အစိုးရုံး အနီးပတ်ဝန်းကျင်မှာ ဌာနဆိုင်ရာ ယာဉ်များသာဆိုတဲ့ ဆိုင်းဘုတ်က ဥပဒေနဲ့ မညီဘူး။ ဒါကိုလည်း အရေးမယူဘူး။ ပြီးတော့ ဘဏ်ယာဉ်များသာဆိုပြီး ရေးထားတယ်။ အဲဒီလို မဟုတ်ဘူး။ ဘဏ်တွေက သူတို့ ဧရိယာထဲမှာ ယာဉ်ရပ်နေရာ ဖန်တီးပေး။ မဖန်တီးနိုင်ရင် လမ်းပေါ်တော့ ဒီလိုလုပ်လို့ မရဘူး။ ဒါ အများပိုင်လမ်း။ ကုမ္ပဏီကလည်း မရပ်ရဘူး။ ပြည်သူပိုင်လမ်းဖြစ်တဲ့ အခါမှာ ဌာနဆိုင်ရာဆိုပြီး အခွင့်ထူးခံ ဆိုတာတော့ လုံး၀ ဒီမိုကရေစီကျင့်စဉ်နဲ့ မညီပါဘူး” ဟု သင်္ဃန်းကျွန်းမြို့နယ် မဲဆန္ဒနယ် အမှတ် (၁)မှ ရန်ကုန်တိုင်းဒေသကြီး လွှတ်တော်ကိုယ်စားလှယ် ဦးကျော်က ဆက်လက် သုံးသပ်သည်။

“ရွေတိဂုံဘုရားလမ်း သိမ်ကြီးဈေးရှေ့မှာ အရင်တစ်လမ်းမောင်းစနစ် ကျင့်သုံးတုန်းက လမ်းဘေးမှာ ကားခဏရပ်လို့တောင် မရဘူး။ ဘာဖြစ်လို့လဲဆိုတော့ လမ်းပေါ်က ဆိုင်တွေ့က ယာဉ်မရပ်ရဆိုပြီး အသီးသီး ဆိုင်းဘုတ်တွေ ချထားတာ။ တော်တော်ကို အခက်အခဲ ဖြစ်ရတယ်” ဟု ရန်ကုန်မြို့တွင်း နေ့စဉ် ကားဖြင့် သွားလာနေသည် ဗဟန်းမြို့နယ်နေ ကိုအောင်ကိုက ဆိုသည်။

သို့ဖြစ်ရာ ရန်ကုန်မြို့တွင်း ကားပါကင် အလုံအလောက် မရှိခြင်း ကားရပ်နားစရာနေရာ မရှိခြင်းကြောင့် ရပ်ကွက်များ၊ လမ်းများ အတွင်း၌ပင် နေ့စဉ်ပြဿနာများ ဖြစ်ပွားနေကြောင်း ၂၀၁၄ ခုနှစ် ဒီဇင်ဘာလတွင် ပြုလုပ်ခဲ့သည့် Save Yangon ဖိုရမ်တွင်လည်း ပညာရှင်အချို့က ထောက်ပြထားကြသည်။

ရပ်ကွက်များ၊ လမ်းများအတွင်း ကားရပ်နားရန်နေရာ အလုံအလောက် မရှိခြင်းကြောင့် အခြားအိမ်ရှေ့တွင် ခေတ္တရပ်နားခြင်းကြောင့် ပြသနာဖြစ်ပွားမှုများလည်း မကြာခဏ မြင်တွေ့နေရသည်။

ထို့ကြောင့် ရန်ကုန်မြို့၏ ကားပါကင် ပြဿနာအတွက် မည်သို့ဖြေရှင်းမည် ဆိုသည်ကို တိကျခိုင်မာသော မူဝါများ၊ အစီအစဉ်များ ချမှတ်ရန်မှာ မရေးတကြီး လိုအပ်နေသည်။ အစိုးရသက်တမ်းမှာ ခြောက်လခန့်ပင် မကျန်တော့သည့် အချိန်တွင် ရန်ကုန်မြို့၏ ယာဉ်ကြောပိတ်ဆို့မှုအား ဖြေရှင်းရန် များစွာ ကြိုးစားရမည်ဖြစ်သည်။

“ယခု ယာဉ်ကြောပိတ်ဆို့မှု ပြသနာ ကို မဖြေရှင်းနိုင်ရင် နောက်တက်လာမည့် အစိုးရအတွက် အမွေဆိုးကြီး ချန်ထားခဲ့သလို ဖြစ်လာနိုင်ပါတယ်။ ကားမှတ်တိုင် မဟုတ်တဲ့နေရာမှာ ရပ်တဲ့ယာဉ်တွေကို အရေးယူမှာလားမေးတော့ လွှတ်တော်ထဲမှာသာ ဟုတ်ကဲ့ ဟုတ်ကဲ့ ပြောတယ်။ ဘာမှ မလုပ်ကြဘူး” ဟု သင်္ဃန်းကျွန်းမြို့နယ် မဲဆန္ဒနယ်အမှတ် (၁) မှ ရန်ကုန်တိုင်းဒေသကြီး လွှတ်တော်ကိုယ်စားလှယ် ဦးကျော်က ထပ်မံသုံးသပ်သည်။

အလားတူ ယာဉ်ကြောပိတ်ဆို့မှုများကြောင့် ရန်ကုန်မြို့၏ တစ်နေရာမှ တစ်နေရာသို့ သွားလာရသော အရှိန်နှုန်းထားများလည်း လျော့နည်းလာခဲ့ကြောင်း၊ ဥပမာ-ယခင် တစ်နာရီလျှင် တစ်မိုင်နှုန်းမှ ယခု တစ်နာရီလျှင် တစ်မိုင်၏ သုံးပုံ တစ်ပုံခန့် အထိသာ သွားလာနိုင်တော့ကြောင်း မြို့ပြပညာရှင် အချို့က ထောက်ပြထားသည်။

Ref : Eleven Media Group

Posted By : Wai Phyoe Aung