အိမ်ရာအရောင်းပြပွဲတွေကနေတစ်ဆင့် အိမ်ခန်းတွေ ကွန်ဒိုတွေ ဝယ်ယူမှုများပြားလာခဲ့ရခြင်းကတော့ အရစ်ကျစနစ်ရဲ့ အဓိကအားသာချက်ကြောင့် ဖြစ်ပါတယ်။ အိမ်တစ်လုံးဝယ်ဖို့ စဉ်းစားပြီဆိုရင် လိုင်စင်ရ အကျိုးဆောင်တွေအပြင်၊ ပါးစပ်ပွဲစားတွေကနေတစ်ဆင့် စုံစမ်းဝယ်ယူခဲ့ရာကနေ အခုနောက်ပိုင်းမှာတော့ အိမ်ခြံမြေပြပွဲတွေကနေတစ်ဆင့် ရောင်းသူ၊ ဝယ်သူ တိုက်ရိုက် ဝယ်ယူခွင့်ရလာတာပါပဲ။
တိုက်ရိုက်ဝယ်ယူခြင်းရဲ့ အကျိုးဆက်က ကောင်းကျိုးတွေပိုများတော့ Customer တွေဘက်ကလည်း ကွန်ဒိုတွေ၊ တိုက်ခန်းတွေကို အပြင်မှာသီးသန့်ရှာဖွေတာမျိုးမလုပ်တော့ဘဲ Online ကနေ Register လုပ်ပြီး ပြပွဲတည်နေရာနဲ့ သတ်မှတ်ထားတဲ့ အချိန်အတိုင်း လာရောက်ဝယ်ယူရုံပါပဲ။ အားသာချက်ကတော့ တိုက်ရိုက် မေးမြန်းခွင့်အပြင်ကို ဘဏ်ချေးငွေတွေနဲ့ အရစ်ကျတွေ နေရာယူလာတာကြောင့် ဝယ်ယူမှုမြင့်တက်လာတာ လည်းဖြစ်ပါတယ်။
“ (၂၀၁၈) ဈေးကွက်အရဆိုရင် လူတွေကို အရစ်ကျစနစ်နဲ့သာ ဆောက်ပေးသွားမယ်ဆိုရင် Construction ဈေးကွက်က ပိုပြီးကောင်းမွန်လာမယ်။ အဓိကက ဆောက်လုပ်တဲ့သူတွေဘက်ကလည်း အရည်အသွေးမှီ ဆောက်လုပ်ပြီး ဝယ်ယူတဲ့သူဘက်ကလည်း ဒီအရစ်ကျကို ဝယ်နိုင်တဲ့အတွက်ကို Payment ကို ပုံမှန်လေး ပေးချေသင့်ပါတယ်။” လို့ တက်သစ်နေဝန်းဆောက်လုပ်ရေးရဲ့ ဒါရိုက်တာဖြစ်သူ ဒေါ်နုထွေးဦးက ဆိုပါတယ်။
(၂၀၁၇)ခုနှစ် တစ်နှစ်ပတ်လုံး အိမ်ခြံမြေပြပွဲကျင်းပရေး ကုမ္ပဏီတွေနဲ့ အဆင့်မြင့်ကွန်ဒိုတွေ တည်ဆောက်တဲ့ ဆောက်လုပ်ရေးလုပ်ငန်းရှင်တွေကိုယ်တိုင်လည်း သူတို့ရဲ့ Private Sales Event တွေ ကျင်းပခဲ့တာဟာလည်း အိမ်ခြံမြေကဏ္ဍ တိုးတက်မှုလမ်းစတစ်ခုလည်း ဖြစ်ခဲ့ပါတယ်။
ပြီးခဲ့တဲ့ (၂၀၁၇)ခုနှစ် နှစ်ကုန်ပိုင်းမှာ ထုတ်ပြန်လိုက်တဲ့ ကွန်ဒိုမီနီယံနည်းဥပဒေဟာလည်း မြန်မာ့အိမ်ခြံမြေ ကဏ္ဍ ဖွံ့ဖြိုးမှုအပိုင်းအတွက် အလွန်အရေးပါတဲ့ ဥပဒေတစ်ခုဖြစ်ပါတယ်။ အဆိုပါ ကွန်ဒိုဥပဒေလို့ ခေါ်တဲ့ စုပေါင်းပိုင်အဆောက်အအုံဆိုင်ရာ နည်းဥပဒေအတည်ပြုဖို့ ဆောက်လုပ်ရေးလုပ်ငန်းရှင်တွေ (၂)နှစ်နီးပါး စောင့်ဆိုင်းခဲ့ရပါတယ်။ လက်ရှိထွက်လာတဲ့ ကွန်ဒိုမီနီယံနည်းဥပဒေမှာလည်း အခက်အခဲတစ်ချို့ရှိနေ ကြောင်း ဆောက်လုပ်ရေး လုပ်ငန်းရှင်တွေ သုံးသပ်ထားပါတယ်။
“ နည်းဥပဒေက ဒီတိုင်းထွက်လာတာ၊ သိပ်တော့ အလုပ်မဖြစ်သေးဘူးလို့ ပြောရမယ်။ ဆောက်လုပ်ရေး လုပ်ငန်းရှင်တွေဘက်က စတင်လုပ်မယ့် လုပ်ငန်းဆိုရင် (၂၀)ရာခိုင်နှုန်း အရင်ဆုံး Deposit တင်ရမယ်။ ဥပမာ ဒီပရောဂျက်အတွက် ဘီလီယံ (၁၀၀)ကုန် မယ်ဆိုရင် ဘီလီယံ(၂၀)ကို နိုင်ငံတော်ကို Deposit အနေနဲ့ တင်ရမယ်။ နောက်တစ်ချက်က လုပ်ငန်းရဲ့ (၃၀)ရာခိုင်နှုန်းလောက် တည်ဆောက်မှုပြီးမှ စတင်ရောင်းချ ခွင့် ပြုရမယ်ဆိုတော့ တော်တော်လေးကို အခက်အခဲဖြစ်ပါတယ်။ အခွန်းနှုန်းထားအနေနဲ့ အခက်အခဲရှိသလို၊ နိုင်ငံခြားသားနဲ့ မြန်မာနိုင်ငံသားနဲ့ အခွန်နှုန်ထားလည်း မတူပြန်ဘူး။ နိုင်ငံခြားသားက ဝယ်မယ်ဆိုရင် တောင် Cash Down မြန်မာပြည်မှာ ဝယ်လို့မရဘူး။ နိုင်ငံခြားဘဏ်တစ်ခုကနေ တရားဝင်စာရင်းဖွင့်ပြီး အဲ့ဒီစာရင်းနဲ့ လွှဲမှ ဝယ်လို့ရမယ်။ ဒါကြောင့်ဒီနိုင်ငံမှာနေရင်းနဲ့ အလုပ်လုပ်တဲ့နိုင်ငံခြားသားတွေ လက်ထဲမှာ ပိုက်ဆံ ရှိနေတယ်ဆိုရင်တောင် ဝယ်လို့မရဘူး သူ့နိုင်ငံကနေတစ်ဆင့်ပြန်လွှဲပြီးမှ ဝယ်လို့ရမယ်။ တစ်ခြား အခက်အခဲ တွေလည်း ရှိပါတယ်။” လို့ မြန်မာနိုင်ငံ ဆောက်လုပ်ရေးလုပ်ငန်းရှင်များအသင်းရဲ့ ဗဟိုကော်မတီဝင် ဦးမျိုးမြင့်က ရှင်းပြပါတယ်။
“သို့သော်လည်းဒီနည်းဥပဒေထွက်လာတဲ့ အတွက် ရောင်နီလေးသန်းလာပြီပေါ့၊ အလုပ်ဖြစ်ပြီးလားဆို တော့ လုပ်ဖြစ်ဖို့ တော်တော်ခက်ခဲတဲ့ အခြေအနေရှိနေတယ်လို့ သုံးသပ်ပါတယ်။ ဒါကလည်း လုပ်ငန်းရှင်အများစု သုံးသပ်တဲ့ အချက်အလက်ဖြစ်ပါတယ်။ ဒီအခက်အခဲတွေရှိတဲ့အတွက် နည်းဥပဒေမှာ ပြင်ဆင်မှုလေးလုပ် ပေးဖို့ မြို့ပြနဲ့အိုးအိမ်ဖွံ့ဖြိုးရေးဦးစီးဌာနနဲ့ တွေ့တဲ့အခါမှာ ဆောက်လုပ်ရေးလုပ်ငန်းရှင်တွေ တောင်းဆိုထားတာ ရှိပါတယ်။ ဥပဒေတစ်ခုဖြစ်တဲ့အတွက် ပြင်နိုင်မပြင်နိုင်တော့မသိသေးပါဘူး။” လို့ ဆက်ပြောပါတယ်။
အိမ်ခြံမြေပြပွဲတွေမှာယုံကြည်မှုရှိရှိနဲ့ အိမ်ရာပရောဂျက်တွေ ဝယ်ယူမှု များပြားနေသလို ကွန်ဒိုတွေဆောက်လုပ် တဲ့ လုပ်ငန်းရှင်တွေအနေနဲ့ ကွန်ဒိုမီနီယံနည်းဥပဒေရဲ့ အခက်အခဲတစ်ချို့ရှိနေပါသေးတယ်။ ဥပဒေဆိုတဲ့ အတိုင်း ပြင်ဆင်ဖို့ကိုလည်း အချိန်ယူဖို့ လိုအပ်သေးပေမယ့် ဒီဥပဒေထွက်လာတာဟာ ဆောက်လုပ်ရေး အုတ်မြစ်ချဖို့ အားအင်သစ်တစ်ခု မွေးဖွားပေးလိုက်သလိုပါပဲ….
Ref : ShweProperty Buy & Rent Journal
Posted By : Ra Wai (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
