ကိုဇော်ဇော် မဟုတ်လား။ ဝင်လာပြီး ထိုင်ကွယ်” ဟု ရုံးခန်းရှေ့တွင် ရောက်နေသော မိတ်ဆွေတစ်ဦး၏ သားကို စာရေးသူက နှုတ်ဆက်ကြို ဆိုလိုက်ခြင်းဖြစ်သည်။

“ဟုတ်ကဲ့ အန်ကယ်။ အန်ကယ် တရားရုံးဘက်ထွက်သွားပြီ ထင်တာ”

“အေးကွယ်။ ရုံးချိန်းက နေ့လယ်ပိုင်းဆိုတော့ စောနေသေးလို့ မသွားဖြစ်သေးဘူး”

“အန်ကယ်နဲ့ တိုင်ပင်ချင်လို့ ဝင်လာတာ”

“အင်းပြောလေ၊ ဘာအခက်အခဲ တွေ့နေလို့လဲ”

“မီနီကွန်ဒို တိုက်ခန်းတစ်ခန်းကို ကြိုပွိုင့်ဝယ်လိုက်တယ် ဆရာ”

“ဘာပြဿနာဖြစ်လို့လဲ အဆောက်အအုံက ပြီးသွားပြီလား”

“မပြီးသေးဘူး ဆရာ။ လေးထပ် အထိပဲ ရုပ်လုံးပေါ်သေးတယ်”

“မီနီကွန်ဒိုဆိုတော့ ဓာတ်လှေ ခါးပါ ရှစ်ထပ်တော့ ရှိမယ်”

“နှစ်ခန်းတွဲ ရှစ်ထပ်ခွဲတိုက်လို့ ပြောပါတယ်”

“ကိုဇော်ဇော် ဝယ်ထားတဲ့ အခန်းက ဘယ်အလွှာလဲ၊ အကြမ်းထည်ရောက်ပြီလား”

“ကျွန်တော် ဝယ်ထားတဲ့ တိုက်ခန်းက သုံးလွှာဆိုတော့ အကြမ်းထည်ရုပ်လုံးတော့ ပေါ်နေပါပြီ”

“အခု ကန်ထရိုက်က ဆက်မဆောက်နိုင်တော့ဘူး၊ ဒီလိုလား”

“ဟုတ်ကဲ့ ဆရာ၊ ကန်ထရိုက်လို့ ပြောပေမယ့် ဆောက်လုပ်ရေး ကုမ္ပဏီပေါ့ ဆရာ”

“ဆောက်လုပ်ရေး ကုမ္ပဏီဆိုတော့ ဆောက်လုပ်ဖို့ လက်ခံထားတာတွေ အဆောက်အအုံ သုံးလေးလုံးတော့ ရှိမှာပေါ့”

“ဟုတ်ကဲ့ ဆရာ။ အခြား အဆောက်အအုံတွေမှာ ဆက်လက်မဆောက်ပဲ ပျက်ကွက်တဲ့အတွက် တရားစွဲ ဆိုခံထားရတယ်လို့ သိရတယ် ဆရာ”

“ဒါက မကြာခဏဖြစ်နေတဲ့ ကိစ္စပဲလေ၊ ကြိုပွိုင့်ဝယ်စဉ်ကတည်းက သေချာစဉ်းစားဝယ်ဖို့လိုတယ်။ အခု ခေတ်က Facebook မှာ တင်ကြပြီး အရောင်းအဝယ် လုပ်နေကြတာက များတယ်။ ဝယ်သူကလည်း ပွဲစားမလို တိုက်ရိုက်ဖြစ်လို့ တန်ဖိုးသင့်တယ်ဆိုပြီး ဝယ်ကြတာတွေ ဖြစ်တယ်”

“ဆောက်လုပ်ရေး ကုမ္ပဏီမှာ ကျွန်တော့်ရဲ့ ငယ်သူငယ်ချင်း သင်္ဘောသားတစ်ယောက်က ရှယ်ယာပါတယ် ပြောလို့ သူ့ကို ယုံကြည်ပြီး ဝယ်လိုက်တာ ဆရာ”

“ရှယ်ယာရှင် သူငယ်ချင်းက ဘယ်ရောက်နေလဲ”

“သူက နိုင်ငံခြားသင်္ဘောပေါ်ရောက်နေတယ်။ သူနဲ့ ဆက်သွယ်တော့ သူကိုယ်တိုင် ရှယ်ယာငွေပြန်မရလို့ အခက်တွေ့နေတယ်လို့ သိရတယ်”

“ဒါဆို တာဝန်ခံသူက ရာဇဝတ်ကြောင်းနဲ့ တရားစွဲခံထားရတာလား”

“ကျွန်တော် စုံစမ်းကြည့်တော့ အချုပ်နဲ့ဖြစ်နေပြီး အာမခံမရဘူးလို့ သိရတယ်။ တရားမကြောင်းနဲ့ တရားစွဲထား တာလည်းရှိတယ် ပြောတယ်။ ဆောက်လက်စတိုက်ခန်းတွေကို ဝရမ်းကပ်ထားတယ်လို့လည်း ကြားသိရ တယ်”

“ကိုဇော် ဝယ်လိုက်တဲ့ တိုက်ခန်းက မြေရှင်ခံစားခွင့်ရှိတဲ့ တိုက်ခန်းလား ကန်ထရိုက်တာခံစားခွင့်ရှိတဲ့ တိုက် ခန်းလား”

“မြေရှင်နဲ့ ကန်ထရိုက်တာတို့ ချုပ်ဆိုတဲ့ ကတိစာချုပ်အရတော့ မြေရှင်ခံစားခွင့်ရှိတဲ့ တိုက်ခန်းပါ ဆရာ”

“တိုက်ခန်းအရောင်းအဝယ် ကတိစာချုပ်ကို ဘယ်လိုချုပ်သလဲ။ မြေရှင်ခံစားခွင့်ရှိတဲ့ တိုက်ခန်းမို့ မြေရှင်နဲ့ တိုက်ရိုက်ချုပ်တာလား”

“မြေရှင်နဲ့ တိုက်ရိုက်မဟုတ်ဘူးထင်တယ် ဆရာ။ ကန်ထရိုက် ကုမ္ပဏီနဲ့ ချုပ်ထားတယ်။ ဒါပေမယ့် မြေရှင်က အသိအမှတ်ပြု လက်မှတ်ရေးထိုးပေးထားတယ်”



“အမှန်ကတော့ မြေရှင်ရပိုင်ခွင့်ရှိတဲ့ တိုက်ခန်းဆိုရင် မြေရှင်နဲ့ တိုက်ရိုက်အရောင်းအဝယ် ချုပ်ဆိုရမှာဖြစ်တယ်။ ငွေရေးကြေးရေးနဲ့ သတ်မှတ်ရက်အတွင်း တိုက်ခန်းဝယ်သူထံ အပ်နှံဖို့ ကိစ္စရပ်တွေက ရောင်းသူမြေရှင်က တာဝန်ယူရမှာဖြစ်တယ်။ ကန်ထရိုက်နဲ့ မဆိုင်ဘူး။ ဒါပေမယ့် ကန်ထရိုက်လက်မှတ်တော့ လိုတယ်”

“စာချုပ်မှာ မြေရှင် လက်မှတ်ထိုးထားတဲ့ ကိစ္စက မြေရှင်နဲ့ မသက်ဆိုင်ဘူးလား”

“ဥပဒေအရပြောရရင်တော့ ရောင်းသူက ကန်ထရိုက်တာ ကုမ္ပဏီ ဖြစ်လို့ ရောင်းဖိုးငွေကို ကုမ္ပဏီက ရရှိပြီး သိရှိသူအနေနဲ့ မြေရှင်က အသိအမှတ်ပြု လက်မှတ်ရေးထိုးတာပဲ ဖြစ်တယ်။ ဒီလို အခြေအနေမျိုးက ကန်ထရိုက်ရပိုင်ခွင့်ရှိတဲ့ တိုက်ခန်းကို ရောင်းချတာမျိုးမှာ ချုပ်ဆိုတဲ့ စာချုပ် ဖြစ်တယ်။ ပြဿနာတစ်စုံတစ်ခုရှိ လာရင် ရောင်းချသူ ကန်ထရိုက် ဆောက်လုပ်ရေး ကုမ္ပဏီထံသာ ငွေရေးကြေးရေးနဲ့ တိုက်ခန်းလက် ရောက် အပ်နှံရေးကို တောင်းဆိုခွင့် ရှိမှာဖြစ်တယ်။ မြေရှင်ထံမှ တောင်းဆိုခွင့်ရှိမှာ မဟုတ်ဘူး”

“အသိသက်သေသဘောမျိုး မြေရှင်က ဖြစ်သွားတယ်လို့ ဆိုလိုတာလား ဆရာ”

“ဟုတ်ပါတယ်။ အဆိုပါ ရောင်းချတဲ့ တိုက်ခန်းဝယ်သူများအနက် မိမိလက်မှတ်ရေးထိုးထားတဲ့ သူကိုပဲ တိုက် ခန်းဝယ်အဖြစ် အသိအမှတ် ပြုနေခွင့်ပေးတယ်လို့ ကတိပြုတဲ့ သဘောဖြစ်တယ်”

“တိုက်ခန်းတစ်ခန်းတည်းကို အဝယ်ထပ်နေရင် မြေရှင်လက်မှတ်ရေးထိုး အသိအမှတ်ပြုသူက တရားဝင်နေပိုင် ခွင့်ရှိတဲ့ သဘောလား ဆရာ”

“မှန်ပါတယ်။ တချို့ ကန်ထရိုက်တွေက တိုက်ခန်းတစ်ခန်းတည်းကိုပဲ ပေါင်နှံထားတယ်။ ရောင်းထားတယ် ဆိုတာမျိုးရှိတတ်တယ်။ အဲဒီလို ကိစ္စရပ်တွေမှာ ပေါင်နှံထားခြင်းကို အရောင်းစာချုပ်အဖြစ် ချုပ်ဆိုထားတာမျိုး ပြုလုပ်လေ့ရှိတယ်။ အဲဒီလိုဖြစ် လာရင်မြေရှင် အသိအမှတ်ပြု လက်မှတ်ရေးထိုးထားတဲ့ တိုက်ခန်းအရောင်း အဝယ် ကတိစာချုပ်က အသာရရှိမှာ ဖြစ်တယ်။ ဒါကြောင့် ကန်ထရိုက်တာ ရပိုင်ခွင့်ရှိတဲ့ တိုက်ခန်းကို ဝယ်မယ်ဆိုရင် မြေရှင်ရဲ့ အသိအမှတ်ပြု လက်မှတ်က အရေးကြီးပါတယ်။

“တကယ်လို့ ဆရာ။ ကန်ထရိုက်တာ ကုမ္ပဏီက ဆက်လက်မဆောက်ရင် ဘယ်လိုဖြစ်နိုင်သလဲ ဆရာ။ ကန်ထရိုက်တာနဲ့ မြေရှင်တို့ရဲ့ သဘောတူကတိစာချုပ်အရ သက်တမ်းကုန်သွားလို့ လုပ်ငန်းဖြတ်တောက် ကြောင်း သတင်းစာထဲမှာ ကြေညာတာတွေဖတ်နေရတယ် ဆရာ။ အဲဒါမျိုးဆိုရင်ဘယ်လိုဆက်လက် ဆောင်ရွက်ရပါသလဲ”

“ဒါကတော့ မြေရှင်နဲ့ တိုက်ခန်းကြိုပွိုင့်ဝယ်သူတွေညှိနှိုင်းပြီး အဆောက်အအုံပြီးဆုံးအောင် ဆောက်ကြတာ တွေရှိပါတယ်။ မြေရှင်နဲ့ တိုက်ခန်းရှင်များ ပေါင်းစည်းပြီး လုပ်ငန်းကော်မတီတစ်ခုဖွဲ့ကာ ဆက်လက် ဆောက်လုပ်ကြတယ်”

“ထည့်ဝင်ငွေက ဘယ်လိုရှိနိုင်သလဲ ဆရာ”

“မြေရှင်ကိုယ်တိုင် အကျိုးအမြတ် ရောင်းဖိုးငွေရယူထားတဲ့ တိုက်ခန်းတွေကိုတော့ ဝယ်သူပေးချေရန် ကျန်ရှိတဲ့ ငွေကြေးကို ရယူပြီး ဝယ်သူရဲ့ တိုက်ခန်းကို ပြီးစီးအောင် တာဝန်ယူဆောက်လုပ်ပေးရမှာ ဖြစ်တယ်”

“ကန်ထရိုက်ရတဲ့ တိုက်ခန်းကို ဝယ်သူက ဘယ်လိုဖြစ်နိုင်ပါသလဲ”

“ဒါကတော့ ပေးသွင်းထားငွေကိစ္စကို ကန်ထရိုက်တာထံမှသာရခွင့် ရှိတဲ့အတွက် မြေရှင်က တာဝန်ယူမှာ မဟုတ်ဘူး။ ကုန်ကျစရိတ်ကို ထပ်မံထည့်ဝင်ပြီး ဆောက်ရမှာ ဖြစ်ပါတယ်”

“ဒါဆိုရင် မြေရှင်ရပိုင်ခွင့်ရှိတဲ့ တိုက်ခန်းကို ဝယ်သူက ပိုပြီး အာမခံရှိတဲ့ သဘောမဟုတ်လား ဆရာ”

“မှန်ပါတယ်။ ဒါကြောင့် ကြိုပွိုင့်ဝယ်မယ်ဆိုရင် မြေရှင်ရပိုင်ခွင့်ရှိတဲ့ တိုက်ခန်းကို တိုက်ရိုက်ချုပ်ဆိုဝယ်ပါ။ ဒါမှမဟုတ် ကန်ထရိုက်တာရပိုင်ခွင့်ရှိတဲ့ တိုက်ခန်းကို ဝယ်ရင် မြေရှင် အသိအမှတ်ပြု လက်မှတ်ရေးထိုးပါ။ ဒါမှ ဥပဒေနဲ့အညီ နစ်နာဆုံးရှုံးမှု မရှိနိုင်မှာဖြစ်တယ်” လို့ ရှင်းပြလိုက်ပါသည်။

ဖတ်ရှုမှုအများအဆုံး အိမ်ခြံမြေဗဟုသုတများ

အိမ်ခြံမြေ၀ယ်တော့မယ်ဆိုရင် သိထားသင့်သော အရေးကြီးအချက်များ

မြေအမျိုးအစား တစ်ခုချင်းစီ၏ အသုံးဝင်ပုံများ

အိမ်ရှင်၏ ခွင့်ပြုချက်မရဘဲ အိမ်ပြင်မည်ဆိုလျှင်

သင့်ဇာတာမှာ ဘယ်လိုအိမ်မျိုးနဲ့နေရမလဲ


Credit By :ထီယု (ဥပဒေ အတိုင်ပင်ခံ)
Posted By :Chan Myae (ShweProperty.com)