မြန်မာနိုင်ငံအတွင်းရှိ ရောင်းရန်နှင့် ငှားရန်ရှိသော အိမ်ခြံမြေများ

Property Titles

အိမ်ခြံတွင်းစိုက်ထားပါက ခိုက်တတ်တယ်ဆိုတဲ့ အပင်များ

By Chan Myae, Shweproperty.com

Updated at 5 May 2022

ကိုယ့်ရဲ့အိမ်ခြံအတွင်းမှာ အလှစိုက်အပင်များ သစ်ပင်ကြီးများစိုက်ခြင်းက လူတို့အတွက် စိတ်ကိုလန်းဆန်းစေကာ အလှတရားများနဲ့ ကြည့်လို့ကောင်းနေမှာပါပဲ။ အခုအချိန်မှာဆိုရင် လူတွေဟာ ကိုယ့်ပတ်ဝန်းကျင်မှာသစ်ပင်စိုက်ခြင်း အိမ်တွင်းအလှစိုက်အပင်လေးများစိုက်ခြင်းကို ပိုပြီးအာရုံရလာကြပါပြီ။ကိုယ့်ပတ်ဝန်းကျင်ကိုပိုလှစေပြီး ကံကောင်းစေတဲ့အပင်လေးများလည်းရှိသလို အိမ်ခြံတွင်းမစိုက်သင့်တဲ့ အပင်များဆိုပြီးလည်း ရှေးလူကြီးတွေရဲ့ စကားအရ ရှိခဲ့ပါတယ်။တိုးတက်လာတာနဲ့အညီ လူကြီးတွေက အကြောင်းတစ်စုံတစ်ခုကြောင့်ပြောခဲ့ကြတာ ရှေးအယူအဆတွေပဲလို့ပြောပြော "ရှေးထုံးလည်းမပယ်နဲ့ ဈေးသုံးလည်းမကြွယ်နဲ့" ဆိုတဲ့စကားပုံရှိတာပဲပြောပြော အစိမ်းရောင်လမ်းဦးကြီးတို့ ဗဟုသုတရရှိစေဖို့ အိမ်မှာစိုက်ထားရင် ခိုက်တတ်တယ်ဆိုတဲ့အပင်တွေကို ဝေမျှပေးလိုက်ပါတယ်။
ဂမုန်းမျိုးစိတ်အများကြီးရှိတဲ့ထဲမှာမှ မစိုက်သင့်ဘူးဆိုတဲ့ ဂမုန်းပင်တွေက

ဆင်စွယ်ဂမုန်း

ဂမုန်းတော်တော်များက စိုက်ပျိုးထားရင် စီးပွားတက်စေတယ်လို့ တော်တော်များများကြားဖူးကြမှာပါ။ ဒါပေမဲ့ ဒီဆင်စွယ်ဂမုန်းကတော့ စီးပွားလာဘ်လာဘ တက်စေတာမျိုးမရှိပဲ အမျိုးသားများအပင်ကိုကျော်ခွမိရင်လည်း အူကျစေတယ်လို့ပြောကြပြီး ငါးရဲ့နဲ့ ဆင်စွယ်ရောချက်ရင်လည်း ဒူလာသွေးဝမ်းပျက်စေတတ်တယ်လို့ ပြောကြပါတယ်။ ဆင်စွယ်ဂမုန်းစိုက်ထားသော်လည်း စီးပွားတက်နေတဲ့အခြေအနေမျိုးမှာဆိုရင်လည်း မိသားစုတွေ အချင်းချင်းရန်လိုခြင်း ခိုက်ရန်ဖြစ်ပွားခြင်းတို့ မကြာခဏဖြစ်တတ်တယ်လို့ ဆိုပါတယ်။

ဆင်ဂမုန်း
ဆင်ဂမုန်းပင်ကတော့ ကျန်းမာရေးကို ထိခိုက်စေတာပါတဲ့။ စီးပွားရေးကောင်းတယ် အဆင်ပြေတယ်ဆိုသော်လည်း ကျန်းမာရေးမှာ ချို့ယွင်းမှုတွေဖြစ်တတ်တယ်လို့ လေ့လာသူတွေအရပြောထားချက်များကို တွေ့ရပါတယ်။

ကုမုဒ်ကြာဂမုန်း

အဖြူရောင်ပန်းပွင့်လေးတွေပွင့်တတ်ပြီး အရွက်ရှည်ကာ ဘေးအနားလှိုင်းတွန့်ပုံစံရှိတဲ့ အရွက်မျိုးတွေပဲဖြစ်ပါတယ်။ ကုမုဒ်ကြာဂမုန်းစိုက်ထားမယ်ဆိုပါက အိမ်တွင်းပြဿာနာများ များစေပါတယ်တဲ့။ အိမ်တွင်းအပင်တွေမှမဟုတ်ဘူး အိမ်ခြံတွင်းထဲမှာအပင်တွေစိုက်တဲ့ပုံစံပေါ်မူတည်ပြီးလည်း အိမ်ကိုလာဘ်တိတ်စေတယ်ဆိုတဲ့ အယူအဆတွေကိုလည်းတစ်ချက်လေ့လာကြည့်ရအောင်။

- အိမ်ရဲ့ အရှေ့ဘက်အရပ်တွင် ညောင်ပင်၊ သပြေပင်များ
- အနောက်ဘက်တွင် လက်ပံပင်၊ ထိန်ပင်
- တောင်ဘက်တွင် သျှစ်သျှားပင်၊ ဖီးကြမ်းငှက်ပျော၊ သင်္ဘောပင် မစိုက်ရ။ ဗူးပင်များမစိုက်ကောင်း အသီးသီးဖို့ခက်သလို သီးလာရင်လည်း လူသေတတ်တယ်လို့ ကြားဖူးကြမှာပါ။
- မြောက်ဘက်တွင် ထန်းပင်၊ ဆန်းပင်၊ သဖန်းပင်နှင့် သျှစ်သျှားပင်
- အိမ်၏ရှေ့မျက်နှာစာတွင် မန်ကျည်းပင်များမစိုက်သင့်။ ကျန်းမာရေးညံ့တတ်သည် ဟူပြီး အဆိုများရှိပါတယ်။
ထိုအပင်များကို ဖော်ပြပါ အရပ်မျက်နှာများမှာစိုက်ပျိုးမယ်ဆိုရင် စီးပွားရေးကျခြင်း၊ ကျန်းမာရေးညံ့ခြင်း၊ အိမ်တွင်းအိမ်ပြင် ဆူပူမှုမကြာခဏဖြစ်ပွားခြင်းတို့ဖြစ်တတ်သည်ဟု ပြောကြပါတယ်။

ရှေးလူကြီးတို့ရဲ့စကားအရ မစိုက်ပျိုးသင့် မလုပ်သင့် မထားသင့် ဆိုတဲ့အရာမှာ အကြောင်းပြချက်စုံစုံလင်လင်တော့ရှိကြတာပါပဲ။ အိမ်တွင်းခိုက်တယ်ဆိုတာထက် ဥပမာ- အိမ်ရဲ့တောင်ဘက်မှာဗူးပင်စိုက်ထားပြီး အသီးသီးလာရင် လူသေတတ်တယ်ဆိုတဲ့ စကားမှာ အိမ်ရဲ့တောင်ဘက်မှာလေတိုက်နှုန်းအရ ဗူးပင်များဝတ်မှုံကူးတဲ့အခါ မအောင်မြင်တတ်ပဲ အသီးမတင်မှုများဖြစ်တဲ့အခါ မစိုက်ပျိုးရအောင်လို့ ရှေးအယူအရ တိုက်ဆိုင်မှုတွေနဲ့ ဆိုခဲ့တဲ့စကားများဖြစ်တယ်လို့လည်း ကြားသိခဲ့ရတာပေါ့။ဒါ့ကြောင့် အိမ်တွင်းမစိုက်သင့်တဲ့အပင်များကို ရှေးလူကြီးများရဲ့အဆိုအရ ဗဟုသုတအနေနဲ့ လေ့လာနိုင်စေရန် ရေးသားဖော်ပြလိုက်ရပါတယ်။

လေ့လာမှတ်သားစရာ အိမ်ခြံမြေဆောင်းပါးများ

Credit By: Greenway Myanmar
Posted By: Chan Myae ShweProperty.com