အိမ်တွင်းမှာ ရိုးရှင်းတဲ့ ပစ္စည်းလေးတွေကို သုံးပြီး ကောင်းတဲ့စွမ်းအင်တွေ ပိုတိုးလာအောင်၊ အညံ့တွေ လျော့အောင် လုပ်လို့ရပါတယ်။ အခုပြောပြမယ့်နည်းလမ်းက ဗေဒင်၊ ယတြာ၊ အဆောင်လက်ဖွဲ့ မဟုတ်ပါဘူး။ နိုင်ငံအသီးသီးရဲ့ ဓလေ့ထုံးတမ်းတွေမှာ ကံကောင်းစေတယ်လို့ ယုံကြည်ထားကြတဲ့ ပစ္စည်းတွေပဲ ဖြစ်ပါတယ်။

(၁) ဓာတ်(၅)မျိုး

တရုတ်ရိုးရာ နည်းလမ်းတွေထဲက အရိုးရှင်းဆုံးနဲ့ အခြေခံအကျဆုံး တစ်ခုကတော့ အိမ်တွင်းမှာ သစ်သား၊ ရေ၊ သတ္တု၊ မြေကြီး၊ မီး စတဲ့ ဓာတ်(၅)မျိုးကို ထားရှိခြင်းပါပဲ။ တရုတ်သမားတော်ကြီးတွေရဲ့ အဆိုအရ သစ်သား (သို့မဟုတ်) ရေကို အိမ်ရဲ့ဘဏ္ဍာရှိတဲ့နေရာမှာထားရင် ပိုပြီးအကျိုးဖြစ်ထွန်းစေပါတယ်။

(၂) မြင်းခွာ

အိုင်းရစ်ချ်လူမျိုးတွေရဲ့အယူအဆမှာ မြင်းခွာကို ကံကောင်းခြင်းအဖြစ် သတ်မှတ်ကြပါတယ်။ အချို့ကလည်း မြင်းခွာဟာ မကောင်းဆိုးဝါးရန်က ကာကွယ်ပေးတယ်လို့ ဆိုကြပါတယ်။ အိမ်ရှေ့တံခါးပေါက်ရဲ့ အပေါ်မှာ သံမြင်းခွာကိုထားခြင်းက အိမ်ကို အကာအကွယ်ဖြစ်စေပါတယ်။

(၃) ဆင်သင်္ကေတ

ဗုဒ္ဓဘာသာမှာရော ဟင်ဒူဘာသာမှာပါ ဆင်ကို အထွဋ်အမြတ်ထားကြပါတယ်။ ဆင်သင်္ကေတကို အမျိုးမျိုးသော ကံကောင်းခြင်းတွေအတွက် သုံးကြပါတယ်။ နောက်ပြီး ဆင်ရဲ့ကိုယ်အနေဟန်ထား၊ အသွင်အပြင်ပေါ်မူတည်ပြီးတော့လည်း အကျိုးပေးကွာခြားတယ်လို့ ဆိုကြပါတယ်။ ဥပမာ – ဆင်နှာမောင်းက အပေါ်မြှောက်နေတဲ့ပုံစံဆိုရင် ကံကောင်းခြင်းတွေ ဖိတ်ခေါ်တဲ့သဘောမျိုးဆောင်ပါတယ်။

(၄) လိပ်သင်္ကေတ

တရုတ်ဓလေ့ထုံးစံအချို့မှာ လိပ်သင်္ကေတဟာ အိမ်ရဲ့အစောင့်အရှောက်ဖြစ်တယ်လို့ ယုံကြည်ထားကြပါတယ်။ ပြောရမယ်ဆိုရင် လိပ်ဟာ တရုတ် Feng Shui ဂိုဏ်းတွေရဲ့ အစောင့်အရှောက်တွေထဲက တစ်ခုလည်း ဖြစ်ပါတယ်။ လိပ်ကို ခွန်အားကြီးမားတဲ့ သင်္ကေတအဖြစ် သတ်မှတ်ထားကြတာပါ။ လိပ်အစစ်ဖြစ်စေ၊ အတုဖြစ်စေ အိမ်ရဲ့ ရှေ့တံခါး၊ နောက်တံခါးတွေမှာ ထားခြင်းက အိမ်ကို အညံ့တွေက ကာကွယ်ပေးပြီး၊ ကံကောင်းခြင်းတွေကို ဝင်လာစေပါတယ်။

(၅) အနီရောင်

ကမ္ဘာတစ်ဝှမ်းက နိုင်ငံအတော်များများရဲ့ ဓလေ့ထုံးစံမှာ အနီကို ကံကောင်းစေတဲ့အရောင်အဖြစ် သတ်မှတ်ထားကြပါတယ်။ တရုတ်နှစ်သစ်ကူးဆိုရင် အနီရောင်တွေနဲ့အလှဆင်ကြပြီး အန်ဘောင်းကိုလည်း အနီရောင်အိတ်နဲ့ ထည့်ပေးကြပါတယ်။ အိန္ဒိယမှာလည်း မင်္ဂလာပွဲဆိုရင် သတို့သမီးတော်တော်များများဟာ သန့်စင်ခြင်းနဲ့ကံကောင်းခြင်း သင်္ကေတအဖြစ် အနီရောင်ဝတ်စုံကို ဝတ်ဆင်ကြပါတယ်။ ဒါကြောင့် သင့်အိမ်မှာ အနီရောင်ပန်းအိုး၊ အနီရောင်ချိတ်၊ အနီရောင်ကော်ဇောကို ထားခြင်းက ကံကောင်းခြင်းတွေ တိုးပွားစေနိုင်ပါတယ်။

(၆) ဝက်သင်္ကေတ

ဝက်သင်္ကေတကို ကံကောင်းခြင်းအဖြစ် မှတ်ယူတာက ဂျာမန်လူမျိုးတွေပါ။ ဒီအယူကတော့ ဘာသာရေး အယူမဟုတ်ပါဘူး။ သမိုင်းကြောင်းအယူပါ။ အလယ်ခေတ်လောက်ကတည်းက ဥရောပနိုင်ငံတွေမှာ ဝက်သင်္ကေတဟာ ချမ်းသာကြွယ်ဝခြင်းနဲ့ ကံကောင်းခြင်းအဆောင်အဖြစ် ယုံကြည်ထားကြတာပါ။ ဝက်မွေးပြီဆိုရင် ချမ်းသာလာတော့မယ်ဆိုတဲ့ နိမိတ်ပါပဲတဲ့။ အခြားသော ကျွဲ၊ နွား၊ ကြက်တွေနဲ့ စမ်းသပ်ကြည့်ပေမယ့် အလုပ်မဖြစ်ခဲ့ပါဘူး။ ဝက်ကသာ ကံကောင်းစေခဲ့တာကြောင့် ယနေ့တိုင် ဝက်သင်္ကေတာကို ကံကောင်းခြင်းအဖြစ် သတ်မှတ်ထားကြတာပါ။

(၇) ဝက်သစ်ချသီး

စကင်ဒနေဗီးယားနိင်ငံတွေမှာ ဝက်သစ်ချသီးတွေကို ပန်းကန်လုံးထဲထည့်ပြီး (သို့မဟုတ်) ပြတင်းပေါက်မှာ ချိတ်ဆွဲပြီး အလှဆင်တာက အိမ်ကို အကာအကွယ်ဖြစ်စေတယ်လို့ ယုံကြည်ကြပါတယ်။ သင်လည်း ကံကောင်းချင်တယ်ဆိုရင်တော့ အိမ်မှာ ဝက်သစ်ချသီးတွေနဲ့ အလှဆင်ထားလိုက်ပါ။

(၈)  ဝါး

တရုတ်လူမျိုးတွေဟာ ဝါးကို ကံကောင်းစေတဲ့ အဆောင်အဖြစ် စိုက်ပျိုးလေ့ရှိကြပါတယ်။ အိမ်ရဲ့ ကျက်သရေနဲ့ ပြည့်စုံဖို့အတွက် ဝါးပင်တွေကို အိမ်မှာ ထားလေ့ရှိပြီး မိတ်ဆွေတွေကို လက်ဆောင်ပေးတဲ့အခါမှာ အဆစ် ၄ခု ပါတဲ့ ဝါးကို မပေးကြပါဘူး။ ၄ ဂဏန်းဟာ တရုတ်စကားရဲ့ သေခြင်းဆိုတာနဲ့ အသံထွက်တူတာကြောင့် ဖြစ်တယ်လို့ ဆိုပါတယ်။

(၉) လတ်ဆက်ပြီးတောက်ပတဲ့ ပန်းများ

လတ်ဆက်တဲ့ပန်းများကို အိမ်အတွင်းအလှဆင်ထားရှိခြင်းက သင့်ထံကို စိတ်ပျော်ရွှင်ကြည်နူးမှုနဲ့ ကောင်းမွန်လှပတဲ့ အနာဂတ်တွေ ဆောင်ကျဉ်းပေးနိုင်တယ်လို့ ဖုန်းရွှဲ့ (Feng Shui) ကဆိုထားပါတယ်။ အထူးသဖြင့်တောက်ပတဲ့ အရောင်အသွေးရှိတဲ့ ပန်းတွေကို အိမ်ရဲ့ဧည့်ခန်းလိုနေရာမျိုးမှာ အလှဆင်ထားရှိခြင်းက ရွှေငွေ များ သင့်အိမ်ကို စီးဆင်းဝင်ရောက်လာစေနိုင်ပါသတဲ့။

(၁၀) ရွှေငါးများ

ရွှေငါးလေးတွေက သင့်အိမ်ကိုကျရောက်လာနိုင်တဲ့ အပျက်စွမ်းအားတွေကို စုပ်ယူထားနိုင်စွမ်းရှိတယ်လို့ ဖုန်းရွှဲ့ (Feng Shui) နိယာမမှာဖော်ပြထားပါတယ်။ ဒါတင်မကသေးဘဲ သူတို့က သင့်အိမ်မသားစုကို ကျန်းမာပျော်ရွှင်ခြင်း နဲ့ ကြွယ်ဝမှုတွေကို ပေးစွမ်းနိုင်ပါသတဲ့။ ဒါပေမယ့် ရွှေငါးလေးတွေရဲ့ အကောင်အရေအတွက် ကတော့အရေးကြီးပါတယ်။ အကောင်းဆုံးကတော့ (၉) ကောင်မွေးမြူထားခြင်းပဲ ဖြစ်ပါတယ်။ ရွှေငါး (၉) ကောင် လာဘ်ကိုဆောင်ဆိုတာ ဒါကိုဆိုလိုတာ ထင်ပါရဲ့နော် ။

(၁၁)  ဖုန်းရွှေနည်းပညာ

အိမ်တွေကို ပြောင်းရွှေ့တဲ့အခါ ပစ္စည်းတွေကို ဖုန်းရွှေနည်းနဲ့ သင့်တင့်တဲ့ နေရာမှာ ထားရမယ်လို့ တရုတ်တွေက ယုံကြည်ပါတယ်။ ဓာတ်ကြီး ၄ ပါးကို သင့်တင့်မျှတအောင် ဖုန်းရွှေနည်းကို သုံးလေ့ရှိကြပြီး ဒီလို အသုံးပြုတာကြောင့် ငွေကြေးဝင်ရောက်မှု၊ ကျန်းမာရေး စတာတွေကို ကောင်းမွန်စေတယ်လို့ ယုံကြည်ကြပါတယ်။

(၁၂) ကျောက်လိပ်

ကျောက်လိပ်ဆိုတာ လိပ်ပုံစံ အသေချာ မတူပါ အနည်းငယ်တူရုံမျှနဲ့ပင် စွမ်းပါတယ်။ ကျောက်ရေကန်လေးနဲ့ထားပေးရတယ်။ အနားမှာ ပေါက်ပေါက်ပွင့်ကျွေးရပါတယ်။ အိမ်အဝင် တံခါးဘက်ကို ခေါင်းလှည့်ရပါတယ်။ ဒါဆို လဘ်လာဘ အလွန်ပွင့်ပါတယ်။ကျောက်လိပ်ရှိပါလျှက် မွဲတေနေပါက ခေါင်းကိုပြောင်းပြန်ထားမိသောကြောင့်ပါ။

(၁၃) လာဘ်ခေါ်တဲ့ကြောင်ကလေး

လက်လေးတစ်ဖက်လှုပ်ကာ လက်ယပ်ခေါ်နေတဲ့ ဒီဖုန်းရွှေလာဘ်ခေါ် ကြောင်ရုပ်လေးတွေကိုတော့ လူအတော်များများ တွေ့ဖူးကြပါလိမ့်မယ်။ ရန်ကုန်မှာတော့ စီးပွားရေးလုပ်သူတွေ၊ ဆိုင်ဖွင့်သူတွေက လာဘ် ခေါ်ကြောင်ကို အဆောင်အဖြစ် အတော်သုံးစွဲကြတာကို တွေ့ရပါတယ်။

ဒီလာဘ်ခေါ်ကြောင်ကို ကံကောင်းစေတဲ့ကြောင်လို့လည်း ခေါ်ပါတယ်။ ဒီလာဘ်ခေါ်ကြောင်ရုပ်လေးက တရုတ်ပြည်ဘက်က တရုတ်လူမျိုးတွေ ယုံကြည်စွာနဲ့ဆောင်တဲ့ အဆောင်တစ်ခုပါ။ နောက်ပိုင်း ဂျပန်နိုင်ငံကလည်း ကြောင်ရုပ်လှလှလေးတွေလုပ်ပြီး လိုက်ဆောင်လာကြ တယ်လို့သိရပါတယ်။

လာဘ်ခေါ်ကြောင်ရုပ်လေးဟာ ရွှေရောင်၊ အမည်းရောင်၊ အဖြူရောင်၊ အနက်ရောင်… စသဖြင့် အရောင်အမျိုးမျိုးနဲ့ ပြုလုပ်ထားပါတယ်။ တချို့သူတွေက ဒီလာဘ်ခေါ်ကြောင်ရုပ်လေးကို တီရှပ်ပေါ်မှာ ရိုက်နှိပ်ပြီးဆောင်ကြပါတယ်။ တချို့ ကလည်း သော့တွဲကီးချိန်းမှာ ချိတ်ဆွဲတတ်ကြပါတယ်။

ဒီလာဘ်ခေါ်ကြောင်ရုပ်လေးကို ဆောင်ထားမယ်ဆိုရင်တော့ မိမိတို့ထံသို့ ကံကောင်းခြင်းတွေ ရောက်ရှိ လာအောင် ခေါ်ဆောင်ပေးနိုင်ခြင်း၊ လာဘ်များရောက်ရှိလာအောင် ခေါ်ဆောင်ပေးနိုင်ခြင်း၊ ချမ်းသာကြွယ်ဝမှုတွေ ရောက်ရှိလာအောင် ခေါ်ဆောင်ပေးနိုင်ခြင်း၊ အလုပ်အောင်မြင်စေနိုင်ခြင်း၊ စီးပွားရေးလုပ်ငန်း များ အောင်မြင်စေနိုင်ခြင်း အကျိုးထူးတို့ ရရှိစေမှာဖြစ်ပါတယ်။ဒီလာဘ်ခေါ်ကြောင်ရုပ်လေးကို အိမ်မှာဆောင်ထားတာမျိုးကိုတော့ သိပ်မတွေ့ရပါဘူး။ အိမ်မှာဆောင် တဲ့သူဦးရေတော့ နည်းပါးတတ်ပါတယ်။

လာဘ်ခေါ်ကြောင်ရုပ်လေးကို အဆောင်အဖြစ်ထားမယ်ဆိုရင်တော့ စတိုးဆိုင်၊ စားသောက်ဆိုင်၊ ရုံးခန်းတွေမှာ ထားရင် ပိုပြီးသင့်တော်ပါတယ်။ စတိုးဆိုင်၊ စားသောက်ဆိုင်၊ ရုံးခန်းတို့ရဲ့ ငွေသိမ်းကောင်တာ၊ အလုပ်စားပွဲတို့မှာ ထားရှိသင့်ပါတယ်။ ထားရှိသင့်တဲ့ အသင့်လျော်ဆုံး အရပ်မျက်နှာအနေနဲ့ကတော့ အရှေ့တောင်ဘက်မှာ ထားပေးတာ အကောင်းဆုံးပါ။

ကံဆိုတာ အလုပ်ပါ။ ကိုယ်ပြုတဲ့ အတိုင်း ကိုယ်ပြန်ရတတ်ပါတယ်။ ဒါပေမယ့် တခါတရံမှာတော့ ကိုယ်မမြင်နိုင်တဲ့ စွမ်းအင်တချို့က ကိုယ့်ကို ကံကောင်းအောင်၊ ကံဆိုးအောင် ပြုလုပ်နိုင်ပါတယ်။

မိသားစုလိုက် ကျန်းမာရေး ချူချာနေတာတွေ၊ ဘာလုပ်လုပ် အဆင်မပြေဘဲ အထစ်အငေါ့လေးတွေ အမြဲကြုံရတာတွေနဲ့ တခြားသော ကံဆိုးခြင်းတွေ မဖြစ်ရလေအောင် အိမ်ထဲမှာ ဒီအချက်တွေ မဖြစ်အောင် သတိထားပါနော်

(၁) အိမ်ထဲမှာ ကြည့်မှန်တွေ အများကြီး ထားခြင်း

အိမ်တစ်အိမ်မှာ မှန်အကြီးကြီး တစ်ချပ် နှစ်ချပ် ထားတာမျိုး၊ နံရံအပြည့် ကြည့်မှန် ကပ်ထားတာမျိုးက ဘာပြဿနာမှ မရှိပါဘူး။ ဒါပေမယ့် အိမ်တစ်အိမ်ထဲမှာ ကြည့်မှန်တွေ အချပ်ရေများများရှိနေခြင်းက အဲ့ဒီအိမ်မှာ နေသူတွေရဲ့ ငွေကြေးကံ မကောင်းခြင်းကို ဖြစ်စေပါတယ်။ ဒါကြောင့် မှန်တွေအများကြီး ရှိနေရင် အမြန်ဆုံး ရှင်းထုတ်လိုက်ပါ။

(၂) နံရံ အက်ကွဲကြောင်းများကို မပြုပြင်ခြင်း

အိမ်နံရံမှာ အက်ကွဲကြောင်းတွေ ထင်ထင်ရှားရှား ဖြစ်နေခြင်းက အဲ့ဒီအိမ်ထဲမှာ နေထိုင်သူတွေကို ကျန်းမာရေးချို့ယွင်းစေတာ၊ မတော်တဆမှု ဖြစ်စေတာမျိုး ဖြစ်နိုင်တာကြောင့် နံရံအက်ကွဲကြောင်းတွေ ဖြစ်နေရင် ပြန်လည်ပြုပြင်တာ၊ ဆေးပြန်သုတ်တာတွေ လုပ်ပေးသင့်ပါတယ်။

(၃) တံခါးမကြီး ကွဲအက်နေခြင်း

ရှေးခေတ် အယူအဆမှာ အိမ်ရဲ့တံခါးမကြီး ကွဲအက်နေတဲ့အခါ ကံကောင်းခြင်းတွေ ဝင်ရောက်မလာတော့ဘဲ တံခါးဝကနေ လှည့်ပြန်သွားတယ်လို့ ယူဆကြပါတယ်။ ဒါကြောင့် ကံကောင်းခြင်းတွေ အိမ်ထဲဝင်လာစေချင်ရင် အိမ်တံခါးမကြီး ကွဲအက်နေတာမျိုးမဖြစ်ပါစေနဲ့။

(၄) ထမင်းအိုး၊ ဟင်းအိုး၊ ပန်းကန်ခွက်ယောက် အကွဲများကို ဆက်လက် အသုံးပြုခြင်း

ထမင်းအိုး၊ ဟင်းအိုးအကွဲတွေ၊ ပန်ကန်ခွက်ယောက် အကွဲတွေကို လွှင့်မပစ်ဘဲ၊ မပြုပြင်ဘဲ အကွဲအတိုင်းပဲ ဆက်သုံးနေတာက အဆင်မပြေမှုတွေကို ကြာရှည်ဖြစ်စေတယ်လို့ ပြောနိုင်ပါတယ်။ အဆင်မပြေတာတွေ အမြန်ဆုံးပြေလည်ချင်တယ် ဆိုရင်တော့ အဲ့ဒီအကွဲတွေကို ပြန်လည်ပြုပြင်ပြီးမှ သုံးရင်သုံး ဒါမှမဟုတ်လည်း လွှင့်ပစ်ပြီး အသစ်ဝယ်သုံးပါ။

(၅) အိပ်ခန်းထဲမှာ သံလိုက်ရှိနေခြင်း

သံလိုက်တွေကို ရေခဲသေတ္တာမှာ ကပ်ထားတာက ဘာပြဿနာမ ှမရှိပေမယ့် အိပ်ခန်းထဲမှာ ထားရင်တော့ သံလိုက်ကနေ ထုတ်လွှတ်တဲ့ သတ္တိ တစ်မျိုးကြောင့် အချစ်ရေးနဲ့ ငွေရေးကြေးရေး ကံကို ဆိုးစေနိုင်ပါတယ်။ ဒါကြောင့် အချစ်ရေးနဲ့ ငွေကြေး ကံကောင်းချင်ရင် သံလိုက်ကို အိပ်ခန်းထဲမှာ မထားမိအောင် ဂရုစိုက်ပါ။

ဖတ်ရှုမှုအများအဆုံး အိမ်ခြံမြေဆောင်းပါးများ

အိမ်တိုင်းမှာ ဆောင်ထားသင့်တဲ့ အရက်ပြန်ရဲ့ အံ့သြဖွယ်ရာ အသုံးဝင်သော နည်းလမ်းများ

အသက်ရှည်ချင်ရင် အိမ်မှာ ဒီအပင်တွေကို စိုက်ပါ

နေအိမ်များတွင်မစိုက်သင့်သော အဆိပ်ရှိသောဂမုန်းပင်

Credit : Bahuthutakabar

Posted By : Sint Sint (ShweProperty.com)