တန်ဖိုးနည်းအိမ်ရာတွေဆောက်လုပ် ရောင်းချပေးပေမဲ့ အောက်ခြေဝန်ထမ်းတွေအတွက် လက်လှမ်းမမှီ နိုင်သေးဘူးလို့ ဝန်ထမ်းအများစုက ဆိုပါတယ်။
"တန်ဖိုးနည်းအိမ်ရာလို့သာပြောတာ သတ်မှတ်ထားတဲ့တိုက်ခန်း တန်ဖိုးရဲ့ (၃၀) ရာခိုင်နှုန်းဆိုတာ အောက်ခြေဝန်ထမ်းတွေ အနေနဲ့ ဘယ်လိုမှမတတ်နိုင်ဘူး"လို့ ဗဟို အမျိုးသမီးဆေးရုံကြီး မော်တော်ယာဉ်ဌာနမှာ တာဝန်ထမ်းဆောင်နေတဲ့ ဦးအောင်ကျော်မျိုးက ပြောပါတယ်။
ဝန်ထမ်းအများစုမှာ တန်ဖိုးနည်းအိမ်ရာ ဝယ်ယူခွင့်လျှောက်လွှာ တင်ထားကြပေမဲ့ မယူတော့ဘဲ တိုက်ခန်း ပြန်အပ်လိုက်ကြသူတွေလည်း ရှိပါတယ်။
အိမ်ခန်းဝယ်ယူခွင့် မဲပေါက်သူတွေကို သတ်ဆိုင်ရာဘဏ်တွေနဲ့ ချိတ်ဆက်ပြီး ငွေချေးယူတဲ့ အခါမှာ အတိုးနှုန်း မတတ်နိုင်တာ၊ ဝင်ငွေစိစစ်တာ၊ ပိုင်ဆိုင်မှု အထောက်အထားတင်ပြရတာတို့ တွေကြောင့် ငွေချေးယူသူတွေ အနေနဲ့ အခက်အခဲတွေ ကြုံရတယ်လို့ သိရပါတယ်။
"ရွှေလင်ပန်း တန်ဖိုးနည်းအိမ်ရာ အခန်းဝယ်ယူခွင့် မဲပေါက်သူ၊ အလုံမှာနေသူတစ်ဦးက လင်မယားနှစ်ယောက် ဝင်ငွေတစ်လကို သုံးသိန်းရှိမှ ချေးငွေရမယ်၊ ပြီးတော့မပြည့်ရင် ပိုင်ဆိုင်မှုအထောက်အထား တင်ပြပြီးမှ ချေးပေးတယ်၊ သွင်းရတဲ့ပိုက်ဆံနဲ့ သူကိုချေးတဲ့ ပိုက်ဆံကို အတိုးတွက်ကြည့်ရင် ငါကြင်းဆီနဲ့ ငါကြင်းပြန်ကြော် တာပဲ"လို့ ပြောပါတယ်။
တန်ဖိုးနည်းအိမ်ရာစီမံကိန်းက တစ်ခုနဲ့တစ်ခု မတူညီပါဘူး။ တိုက်ခန်းတွေရဲ့ တန်ဖိုး (၃၀) ရာခိုင်နှုန်းကို ပထမအရစ်ပေးသွင်းရမှာ ဖြစ်ပြီး ကျန်တဲ့ငွေကို လေးနှစ် ဒါမှမဟုတ် ရှစ်နှစ်မှာ လအလိုက်ပေးသွင်း ရတာဖြစ်ပါတယ်။
"ပေးသွင်းရတဲ့အရစ်က အိမ်ရာတစ်ခုနဲ့တစ်ခု မတူညီဘူး၊ တချို့ကျ လချင်းသွင်း၊ တချို့ကျ ဘယ်နှလကို တစ်ရစ်သွင်း၊ အဲဒီလိုသတ်မှတ်ထားတယ်၊ တချို့ဘဏ်တွေဆိုရင် သွင်းရမယ့်လ ငွေမပြည့်လို့ အသနားခံစာ တင်ရင် စောင့်ပေးတယ်"လို့ မြောက်ဒဂုံ ဗိုလ်မင်းရောင်အိမ်ရာ အိမ်ခန်းမဲပေါက်သူ၊ ဗဟိုအမျိုးသမီးဆေးရုံကြီး ဓာတ်ခွဲခန်းဌာန ဝန်ထမ်းတစ်ဦးက ပြောပါတယ်။
လူမှုဝန်ထမ်းဦးစီးဌာနမှ တာဝန်ထမ်းဆောင်နေတဲ့ မသန္တာဦးက "ဝန်ထမ်းတွေအနေနဲ့ တစ်လကို ကျပ်သောင်း ဂဏန်းလောက်ပဲ သွင်းရတဲ့ တကယ်တန်ဖိုးနည်းအိမ်ရာ ဖြစ်စေချင်တယ်၊ အဲဒါမှ ရတဲ့လခနဲ့ တတ်နိုင်မှာ"လို့ ပြောပါတယ်။
Ref : The Kumudra
Photo Credit : skycity
Posted By : Wai Phyoe
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
