မြို့ပြအိမ်ရာအဆောက်အအုံများတွင် မြေပိုင်ဆိုင်မှု၊ အိမ်ခန်းပိုင်ဆိုင်မှုများနှင့် ပတ်သက်သည့် အငြင်းပွားမှုများ လျှော့နည်းစေရေးအတွက် ဥပဒေတစ်ရပ်ပြဌာန်းသွားရန် စီစဉ်နေကြောင်း မြန်မာနိုင်ငံလိုင်စင်ရ ကန်ထရိုက်တာ အသင်းမှ သိရသည်။
ယင်းအတွက် မြန်မာနိုင်ငံလိုင်စင်ရကန်ထရိုက်တာများအသင်းက တိုက်ခန်းအိမ်ရာအဆောက်အအုံ ဆိုင်ရာ ဥပဒေ (အဆိုပြုဥပဒေကြမ်း) ဆွေးနွေးပွဲကို ဒီဇင်ဘာလ ၂၆ ရက်က မြန်မာနိုင်ငံဆောက်လုပ်ရေး လုပ်ငန်းရှင် များ အသင်းတွင် ပြုလုပ်ခဲ့သည်။
အဆိုပါဥပဒေကြမ်းနှင့်ပတ်သက်ပြီး မြန်မာနိုင်ငံ လိုင်စင်ရကန်ထရိုက်တာများအသင်းမှ အလုပ်အမှုဆောင် ဦးနန္ဒကျော်က “ တိုက်ခန်းတစ်ခန်းကို ငွေကြေး ရာဂဏန်း၊ ထောင်ဂဏန်းပေးဝယ်ပြီး သူတို့မှာ ပိုင်ဆိုင်မှု အထောက်အထားမရှိပါဘူး။ တကယ့် တကယ်နှစ်ပြည့်လို့ ပြန်ဖျက်တဲ့အခါ၊ နောက်တခါ ပြန်ဖျက်တာ မဟုတ်ပဲနဲ့ တခါပြန်ရောင်းတဲ့အခါ အဲဒီအခါမှာ သူတို့က ပိုင်ဆိုင်မှုမရှိတဲ့အခါကြတော့ သူတို့ကို ဥပဒေအရ ပိုင်ဆိုင်ကြောင်းထုတ်ပေးစေချင်တယ်။ ထုတ်ပေးနိုင်မယ်ဆိုရင် သူတို့အနေနဲ့ အိမ်ပိုင်ဆိုင်လာမယ်။ ဒီထက်ပိုမြင့်လာရင်သူတို့က တခြားနိုင်ငံတွေ လိုပေါ့ နေအိမ် တိုက်ခန်းဝယ်တဲ့အခါမှာ ဘဏ်အပေါင်နဲ့ဝယ် လို့ရတယ်။ သုံးရာတန် တိုက်ခန်းကို တစ်ရာရှိရင် တစ်ရာပေးမယ်။ ကျန်တဲ့နှစ်ရာကို ဘဏ်မှာ ပေါင်ပြီးပြန် ဆပ်မယ်။ အဲလိုဆိုရင် လူနေမှုအဆင့်အတန်းမြင့်လာမယ်“ ဟု ပြောသည်။
ယင်းဥပဒေအား အတည်ပြုပြဌာန်းနိုင်ရေးအတွက် အိမ်ရာကဏ္ဍနှင့် ဆက်နွယ်နေသည့် ဆောက်လုပ်ရေး ဝန်ကြီးဌာန၊ မြန်မာနိုင်ငံဆောက်လုပ်ရေးလုပ်ငန်းရှင်များအသင်းနှင့် အဆိုပြုဥပဒေကြမ်း အား တင်သွင်းသည့် မြန်မာနိုင်ငံ လိုင်စင်ရကန်ထရိုက်တာများအသင်းမှ တာဝန်ရှိသူများ တက်ရောက်ဆွေးနွေးခဲ့ကြသည်။
ဆောက်လုပ်ရေးဝန်ကြီးဌာန၊ မြို့ပြနှင့် အိမ်ရာဖွံ့ဖြိုးရေးဦးစီးဌာနမှ ညွှန်ကြားရေးမှူးချုပ် ဦးမင်းထိန်က “အဓိကတော့ အိမ်ရာကဏ္ဍမှာ ကွန်ဒို စုပေါင်းအိမ်ရာအဆောက်အအုံဆိုင်ရာ ဥပဒေတွေ ထွက်လာတယ်။ ထွက်လာပြီးတော့ ဒီဥပဒေထဲမှာ အကြုံးမဝင်တဲ့ အဆောက်အအုံတွေရှိတယ်။ ဒီအဆောက်အအုံတွေကိုလည်း ခိုင်မာတဲ့ အာမခံချက်ကလေးတွေ ပေါ်ပေါက်လာဖို့အတွက်ကို အဖွဲ့အစည်းတွေကနေပြီးတော့ အဆိုပြုလာတဲ့အတွက် ဒီဥပဒေလေးကလည်း ကျွန်တော်တို့ နိုင်ငံတော် အတွက်ရော ပြည်သူတွေအတွက်ရော အိမ်ရာကဏ္ဍအတွက်ရော လိုအပ်တဲ့ဥပဒေတစ်ရပ်ဖြစ်တဲ့အတွက် ကြောင့် မို့လို့ ဆွေးနွေးတာဖြစ်ပါတယ်" ဟုဆိုသည်။
ယင်းဥပဒေပေါ်ထွက်လာပါက တိုက်ခန်း အိမ်ရာ အဆောက်အအုံ၏ အိမ်ခန်းများကို ဥပဒေနှင့်အညီ တရားဝင် ပိုင်ဆိုင်လက်ရှိထားခွင့်၊ အကျိုးခံစားခွင့်နှင့် စနစ်တကျလွှဲပြောင်းခွင့်များ ရရှိစေရန် ရည်ရွယ်ထားကြောင်း သိရ သည်။
လက်ရှိ အိမ်းခန်းဝယ်ယူရာတွင် ဖြစ်ပေါ်နေသည့် ပြသာနာများနှင့် ပတ်သက်ပြီး မြန်မာနိုင်ငံဆောက်လုပ်ရေး လုပ်ငန်းရှင်များအသင်း ဒုတိယဥက္ကဋ္ဌ ဦးရှိန်ဝင်းက " အခုလောလောဆယ် အခြေအနေမှာ တချို့ကိစ္စတွေမှာ ဖြေရှင်းလို့ မရတဲ့ ကိစ္စလေးတွေရှိတယ်။ အိမ်ရှင်၊ အိမ်ငှားနဲ့ဖြစ်တဲ့ ပြသာနာ တွေ အိမ်ခန်းပိုင်ဆိုင်မှုနဲ့ ပတ်သက်တဲ့အငြင်းပွားတဲ့ပြသာနာတွေ၊ အိမ်ခန်းပိုင်ဆိုင် ပြီးတော့ အိမ်ခန်းကို ရောင်းဝယ်တဲ့အခါမှာ အိမ်ရှင်နဲ့ အိမ်ငှားကြားထဲမှာ နာမည်ပြောင်းခဆိုတဲ့ပြသာနာတွေ အများကြီးပါ။ တရားရုံးမှာလည်း မလိုလားအပ်ပဲနဲ့ အမှုအခင်းတွေ အများကြီးဖြစ်နေတာကို တွေ့ရှိရတာဖြစ်ပါတယ်။ " ဟု ဆိုသည်။
ယင်းဥပဒေထွက်ပေါ်လာပါက လက်ရှိဖြစ်ပေါ်နေသော အိမ်ခန်းပိုင်ဆိုင်မှုအား စနစ်တကျ သတ်မှတ်ပြဌာန်း နိုင်မည် ဖြစ်သည့်အတွက် အိမ်ရှင်၊ အိမ်ငှားများအကြား ဖြစ်ပေါ်နေသည့်ပြသာနာများ အပါအဝင် အိမ်ခန်း ပိုင်ဆိုင်မှု ပြသာနာများအား ဖြေရှင်းပေးနိုင်မည်ဖြစ်ကြောင်း သိရသည်။
Ref & Photo Credit : Mizzima
Posted By : Ra Wai (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
