COVID-19 ကြောင့် ဝင်ငွေထိခိုက်မှုရှိခဲ့သည့် Customer များအား အိမ်ရာချေးငွေ (အရင်း) ပေးဆပ်မှု ဆိုင်းငံ့ဖြေလျှော့ပေးမည်ဖြစ်ကြောင်း ဆောက်လုပ်ရေး၊ အိမ်ရာနှင့် အခြေခံအဆောက်အအုံဖွံ့ဖြိုးရေးဘဏ်မှ သိရသည်။
ဆောက်လုပ်ရေး၊ အိမ်ရာနှင့် အခြေခံအဆောက်အအုံ ဖွံ့ဖြိုးရေးဘဏ်အနေဖြင့် ဆောက်လုပ်ရေးဝန်ကြီးဌာန၏ လမ်းညွှန်ချက်နှင့်အညီ ဝင်ငွေနည်းပြည်သူများအား အိမ်ရာပိုင်ဆိုင်မှုရှိစေရန်အတွက် အတိုးနှုန်း သက်သာသည့် နှစ်ရှည်ချေးငွေများကို ပံ့ပိုးထုတ်ချေးပေးလျက်ရှိသည်။
COVID-19 ကြောင့် ဝင်ငွေထိခိုက်မှု အတန်အသင့်ရှိခဲ့သည့်အတွက် Customer များ ချေးငွေပေးဆပ်ရာတွင် အဆင်ပြေမှုရှိစေရန် မြန်မာနိုင်ငံတော်ဗဟိုဘဏ်၏ လမ်းညွှန်မှုနှင့်အညီ အိမ်ရာချေးငွေအတိုးနှုန်းများကို အဆင့်ဆင့်လျှော့ချပေးခဲ့သည်။
ထို့ပြင် ၂၀၂၀ ပြည့်နှစ် ဧပြီ၊ မေ၊ ဇွန်နှင့် ဇူလိုင်လများအတွင်း ပေးဆပ်ရမည့်အိမ်ရာ ချေးငွေများကို လစဉ်ပေးဆပ်ရမည့် သတ်မှတ်နောက်ဆုံးရက် (Last Collection Date) မှ ထပ်တိုး ၁၅ ရက်ကို နောက်ကျကြေး ကောက်ခံခြင်းမရှိဘဲ ဆောက်လုပ်ရေး၊ အိမ်ရာနှင့် အခြေခံအဆောက်အအုံဖွံ့ဖြိုးရေးဘဏ်၏ ကိုယ်ပိုင်အစီအစဉ်ဖြင့် ရွှေ့ဆိုင်း လက်ခံဆောင်ရွက်ပေးခဲ့သည်။
ယခုထပ်မံ၍ Lockdown သက်ရောက်မှုကြောင့် ဝင်ငွေအမှန်တကယ်ထိခိုက်မှုရှိခဲ့ပြီး ယခင်ပေးဆပ်မှု မှန်ကန်ခဲ့သော Customer များအား သတ်မှတ်ချက်များနှင့်အညီ စိစစ်၍ လစဉ်အိမ်ရာချေးငွေ အရင်းပေးဆပ်မှုကို သင့်လျော်သောကာလအပိုင်း အခြားဖြင့် ရွှေ့ဆိုင်းလက်ခံဆောင်ရွက်ပေးမည်ဖြစ်ကြောင်း သိရသည်။
Customer များအနေဖြင့် မိမိတို့အိမ်ရာ ချေးငွေရယူထားသည့်သက်ဆိုင်ရာ ဘဏ်ခွဲ မန်နေဂျာများထံသို့ ဆက်သွယ်စုံစမ်းဆောင်ရွက်နိုင်ကြောင်း ဆောက်လုပ်ရေး၊ အိမ်ရာနှင့် အခြေခံအဆောက်အအုံ ဖွံ့ဖြိုးရေးဘဏ်မှ သိရသည်။
တန်ဖိုးနည်း၊ တန်ဖိုးသင့်အိမ်ရာများ ဝယ်ယူရန်အတွက် စုဆောင်းထားသည့် အိမ်ရာစုဆောင်းငွေစာရင်းနှင့် ငွေစုဘဏ်အပ်ငွေစာရင်းတွင် ယခင်က အတိုးနှုန်း ၆ ဒသမ ၇၅ ရာခိုင်နှုန်းရှိပြီး ၅ ဒသမ ၂၅ ရာခိုင်နှုန်းသို့ ပြင်ဆင်သတ်မှတ်လိုက်ကြောင်း ဆောက်လုပ်ရေး၊ အိမ်ရာနှင့် အခြေခံအဆောက်အအုံ ဖွံ့ဖြိုးရေးဘဏ်က ထုတ်ပြန်လိုက်သည်။
တစ်ဦးချင်းအပ်ငွေတွင် ငွေစုဘဏ်အပ်ငွေစာရင်း (Savings Deposit A/C) တွင် ယခင်က အတိုးနှုန်း ၆ ဒသမ ၇၅ ရာခိုင်နှုန်းရှိပြီး ၅ ဒသမ ၂၅ ရာခိုင်နှုန်းသို့လည်းကောင်း၊ အိမ်ရာစုဆောင်းငွေစာရင်း (Housing Savings Deposit A/C) တွင် ယခင်က အတိုးနှုန်း ၆ ဒသမ ၇၅ ရာခိုင်နှုန်းရှိပြီး ၅ ဒသမ ၂၅ ရာခိုင်နှုန်းသို့လည်းကောင်း BG Deposit A/C တွင် ယခင်က အတိုးနှုန်း ငါးရာခိုင်နှုန်းရှိပြီး ၃ ဒသမ ၅ ရာခိုင်နှုန်းသို့ ပြင်ဆင်ပြောင်းလဲလိုက်ခြင်းဖြစ်ပြီး ပြင်ဆင်ပြောင်းလဲသည့် အတိုးနှုန်းများကို ၂၀၂၀ ပြည့်နှစ် မေ ၁ ရက်မှ စတင်သတ်မှတ်ခဲ့ခြင်းဖြစ်ကြောင်း သိရသည်။
အဖွဲ့အစည်းအပ်ငွေတွင် ငွေစုဘဏ်အပ်ငွေစာရင်း (Savings Deposit A/C) တွင် ယခင်က အတိုးနှုန်း ၆ ဒသမ ၅ ရာခိုင်နှုန်းရှိပြီး လက်ရှိတွင် ငါးရာခိုင်နှုန်းသို့လည်းကောင်း ပြင်ဆင်သတ်မှတ်လိုက်သည်။
ဝင်ငွေနည်းပြည်သူများ အိမ်ရာပိုင်ဆိုင်ခွင့်ရရှိစေရေးအတွက် အိမ်ရာများကို ဂျပန်နိုင်ငံ ODA Loan (Two-step Loan) အစီအစဉ်အရ အတိုးနှုန်းသက်သာသော နှစ်ရှည်အိမ်ရာချေးငွေဖြင့် JICA, ODA Loan Criteria နှင့်ကိုက်ညီသော အိမ်ရာများအတွက် အိမ်ရာချေးငွေများ ချေးပေးနေပြီဖြစ်ကြောင်း ပြည်ထောင်စုဝန်ကြီး ဦးဟန်ဇော်က ဆိုသည်။
မြို့ပြနှင့် အိမ်ရာဖွံ့ဖြိုးရေးဦးစီးဌာနမှ အကောင်အထည်ဖော်ဆောင်ရွက်မည့် တန်ဖိုးနည်း၊ တန်ဖိုးသင့်နှင့် တန်ဖိုးမြင့် အိမ်ရာစီမံကိန်းတိုက်ခန်းများ ဝယ်ယူသူများကို ချေးငွေ ထုတ်ချေးပေးလျက်ရှိသည်။
Credit By: Eleven Media
Posted By: Ra Wai (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
