ရန်ကုန်မြို့တော် မြို့ပြသာယာလှပရန် နှင့် မြို့တော်အင်္ဂါရပ်များနှင့်အညီ စီမံကိန်းများပေါ်ထွက်နိုင်ရန် ရည်ရွယ်၍ ရန်ကုန်မြို့တွင် အိမ်ရာစီမံကိန်းသစ်များ အကောင်အထည်ဖော်မည်ဟု ကြား သိရခြင်းက မြို့ပြ လူနေမှုအဆင့် အတန်းအတွက် နေထိုင်ရေးလိုအပ် ချက်ကို တစ်ဖက်တစ်လမ်းမှ ဖြည့်ဆည်း ပေးမည့် ဈေးနှုန်းသင့်တင့်သည့် တန်ဖိုး နည်းအိမ်ရာများကို ပေါ်ပေါက်လာရန် တစ်ဖက်တစ် လမ်းမှ အထောက်အကူ ပြုကြောင်း ဝါရင့်တည်ဆောက်သူများ က ပြောကြားသည်။

ဆောက်လုပ်ရေး ဝန်ကြီးဌာန အောက်ရှိ မြို့ရွာနှင့် အိုးအိမ်ဖွံ့ဖြိုးရေး ဦးစီးဌာနမှဦးဆောင်၍ မြို့ပြစီမံကိန်းများ အကောင်အထည်ဖော် တည် ဆောက်ရန်အတွက် မြို့ပြစီမံကိန်းများ အကောင်အထည်ဖော်မှုတွင် လှိုင်သာယာ၊ တောင်ဒဂုံ၊ အင်းစိန်နှင့် တောင်ဒဂုံဆိပ်ကမ်း မြို့နယ်များရှိ စုပေါင်းအိမ်ရာများနှင့် မြေလွတ်မြေရိုင်းများလည်း ပါဝင်ကြောင်းသိရသည်။ထို့ပြင် အခြားဆက်စပ်မြို့နယ်များရှိ အိမ်ရာ ဟောင်းများကိုလည်း နောင်တွင် ဆက်လက်အကောင်အထည်ဖော်သွား မည့် အစီအစဉ်ရှိသည်ဟုလည်း ကြား သိရသည်။

"ကြားတာကတော့ သက်တမ်းအို လာတဲ့ အဆောက်အအုံတွေကို ကန် ထရိုက်စနစ်နဲ့ ဆောက်မယ့်သူတွေကို ခေါ်ယူအကြောင်းကြား တယ်လို့ ကြားတယ်၊ ဥပမာပြောရရင် အင်းစိန်မှာ ရှိတဲ့ ကြို့ကုန်းအိမ်ရာ၊ ရန်ကင်းမှာရှိတဲ့ ရန်ကင်းအိမ်ရာတွေက ဆောက်ခဲ့တာလည်း ကြာပြီ။ မြေဧကအကျယ်ကြီးပေါ် မှာလည်း ဆောက်လုပ်ခဲ့တာလည်း ဖြစ်တဲ့အပြင် တည်ဆောက်ထားပုံ လည်း စနစ်မကျတဲ့ အတွက် တစ်တိုက်နဲ့ တစ်တိုက် နေရာကျဲနေပြီး အမြင်လည်း တင့်တယ်မှုမရှိဘူး၊ ဒါတွေကြောင့်လည်း အသစ်ပြန်လည်ဆောက်လုပ်ဖို့ လိုမယ် ထင်တယ်"ဟု ဆောက်လုပ်ရေးလောက အတွင်းရှိ နာမည်ရတည်ဆောက်သူ တစ်ဦးက ပြောသည်။

ထိုကဲ့သို့သော အဆင့်အတန်းမြင့် အိမ်ရာများ ပေါ်ထွက်လာမှုကိုကြိုဆိုပြီး အရည်အသွေးနှင့် ပံ့ပိုးမှု အင်္ဂါရပ်များ ပိုမိုပြည့်စုံသော အိမ် ရာများ ပေါ်ထွက်လာခြင်းက တစ်နည်းအားဖြင့် မြို့နေ လူထုနေထိုင်ရေး ပြေလည်စေမည့် ဆောက်လုပ်ရေးလောကအတွက် ကောင်း သော အလားအလာအဖြစ် ရှုမြင်သုံးသပ်ကြောင်း ၎င်းက ပြော သည်။

မြို့ပြစီမံကိန်းများပေါ်ထွက်ရန် အစ ပျိုးလာခြင်းက ဆောက်လုပ်ရေးလောက ၏ လိုအပ်ချက်တစ်ခုဖြစ်နေသည့် ဈေးနှုန်းသင့်တင့် သည့် တန်ဖိုးနည်း၊ တန်ဖိုးလတ်ကဲ့သို့သော အိမ်ရာများပေါ် ထွက်ရန်အတွက် အလားအလာတစ်ခု ဟုလည်း မြို့ပြဆိုင်ရာကျွမ်းကျင် သူများ က သုံးသပ်သည်။

"တိုက်ခန်းဈေးနှုန်းသက်သာအောင် လုပ်ပေးတဲ့အတွက်လည်း နေထိုင်စရာ မရှိတဲ့သူတွေ နေထိုင်စရာတွေရလာမယ်၊ တချို့နေရာ တွေမှာ တန်ဖိုးနည်းအိမ်ရာ တွေ ဆောက်နိုင်ဖို့အတွက် နေထိုင်သူ တွေဝယ်ဖို့အဆင်ပြေအောင် အငှားဝယ် စနစ် (hire purchase) နဲ့ပေးတာ၊ ဒီတော့ အိမ်ရာမဝယ်နိုင်တဲ့သူတွေ အိမ်ရာ ပိုင်ဆိုင်နိုင်လာမယ်။ ဒီတော့ အခု လို အိမ်ရာသစ်တွေအများကြီး အကောင်အ ထည် ဖော်လာနိုင်တာကို ဝမ်းပန်းတသာ လက်ခံကြိုဆိုသင့်ပါ တယ်။ ဆောက်လုပ်ရေးလောက အတွက် သတင်းကောင်းပေါ့"ဟု ၎င်း က ပြောသည်။

ထိုကဲ့သို့အိမ်ရာသစ်များ ပေါ်ပေါက် လာခြင်းက တစ်နည်းအားဖြင့်ဆိုလျှင် ရန်ကုန်တွင် ပေါ်ပေါက်မှုနည်းလာနိုင် သည့် တန်ဖိုးနည်း အိမ်ရာစီမံကိန်းများအတွက် အားဖြည့်ရာရောက်သလို အခြေခံ လူတန်းစားများအတွက် နေထိုင်ရေး ပြေလည်စေရန် အတွက်လည်း တစ်ဖက် တစ်လမ်းမှ အထောက်အကူပြုသည် ဟုလည်း ၎င်းကပြောသည်။

"တန်ဖိုးနည်းအိမ်ရာတွေ ပေါ်ထွက် ဖို့က တည်ဆောက်မှုပိုင်းဆိုင်ရာ စီမံခန့် ခွဲမှုတွေမှာ အားနည်းချက်တွေရှိတယ်။ ဒီလိုအားနည်း ချက်တွေရှိတဲ့အတွက် ကုန်ကျသင့်တာထက် ပိုကုန်ကျတယ်။ ဆောက်လုပ်စရိတ်ကြီးတဲ့အပြင် အရေ အတွက် နည်းနည်းပဲဆောက်တဲ့ အတွက် အမြတ်ကလည်း များများတင်မှရမယ်။ ဒီတော့ အခန်းဈေးတွေက ရှိသင့်တာ ထက် ပိုမြင့်လာပြီး ငွေကြေးမတတ်နိုင် တဲ့ သူ အများစုအတွက် အဆင်မပြေ ဘူး။ နောက်တစ်ချက်ကတော့ မြေဈေး ပေါ့၊ မြေဈေးကြီးတာက တန်ဖိုးနည်း အိမ်ရာတွေ ပေါ်ထွက်ဖို့ ရာခိုင်နှုန်း ထက်ဝက်ကျော်အရေးကြီးတဲ့ အဟန့် အတားတစ်ရပ်ဖြစ်တယ်"ဟု ပြော သည်။

"တန်ဖိုးနည်းအိမ်ရာတွေက အန္တရာယ် ကြီးတဲ့ စီးပွားရေးလုပ်ငန်းတစ်ခုလို ဖြစ်နေတယ်။ စီမံကိန်းစီမံခန့်ခွဲမှု မပိုင် နိုင်တာ၊ နောက်ပြီး အမြတ်နည်းပြီး ရှုံးနိုင် ခြေ များတဲ့အခါမှာ ဘယ်သူမှ စမ်းပြီး မလုပ်ချင်ကြဘူး၊ အမြတ်ကိုလည်း မလျှော့ချနိုင်တဲ့အခါမှာ ဆောက် လိုက်တဲ့ တိုက်ခန်းတန်ဖိုးက တန်ဖိုးနည်းလို့ သတ်မှတ်လို့ မရနိုင်တော့ဘူး။ ဥပမာ သိန်း ၁၂၀ အရင်းရှိတဲ့ဟာကို သိန်း ၁၈၀ လောက် နဲ့ ရောင်းတာမျိုးပေါ့"ဟု ဝါရင့်လုပ်ငန်းရှင်တစ်ဦးက ၎င်းအမြင်ကို ပြောသည်။
ယနေ့ခေတ်တွင် တည်ဆောက် သူများက တန်ဖိုးနည်းအိမ်ရာဟု ခေါ်ဆိုနိုင်သည့် ဈေးနှုန်းသက်သာပြီး အရည်အသွေးမနိမ့်သော အိမ်ရာများ ကို ရည်ရွယ်ချက်အမျိုးမျိုးဖြင့် တည်ဆောက်လာကြသည်ကို တွေ့ရှိရ သော်လည်း အမှန်တကယ်ဈေးသက် သာနိုင်မည့် အခြေအနေဟုတ်မဟုတ်၊ ဝယ်ယူသူများကို တိုက်အရည်အသွေး အတွက် အာမခံချက်မည်မျှပေးနိုင်မည် လဲဆိုသည့် အချက်များမှာ မေးခွန်းထုတ် စရာများဖြစ်ကြောင်း ၎င်းက ပြောသည်။

"တန်ဖိုးနည်းအိမ်ရာတွေက ဝယ်လို အားများတယ်။ ဒါကြောင့်လူတိုင်း ဆောက်ချင်ကြတယ်။ တန်ဖိုးနည်းဆိုတဲ့ အတိုင်း ဈေးသက် သာမှာဖြစ်တဲ့အတွက် ငွေပြန်ရဖို့လွယ်တယ်။ တန်ဖိုးကြီးတွေလို ငွေကုန်ကြေးကျခံပြီး ကြော်ငြာအားသုံးစရာလည်း မလိုဘူး။ ဒါပေ မယ့် တိုက် အရည်အသွေး၊ ဆောက်ပေးလိုက်တဲ့ ဟာနဲ့ ပေးရတဲ့ ဈေးနှုန်းသင့်တင့်ပါ့မလား ဆိုတဲ့ ပြန်လည်ချိန်ဆရတာတွေကတော့ ဘေးကျပ်နံကျပ်ဖြစ်တဲ့ စဉ်းစာစရာတွေ ဖြစ်တယ်။ ဒါပေမယ့် ဒီလိုအခက်အခဲကို ဖြေရှင်းကျော်လွှားနိုင်မှသာ အောင်မြင်တဲ့ လုပ်ငန်း ရှင် တစ်ယောက်ဖြစ်မယ်လို့ ခံယူတယ်"ဟု ပြောသည်။

ဈေးနှုန်းသင့်တင့်သက်သာသည့် တန်ဖိုးနည်းများပေါ်ထွက်ရန်အတွက် ကျယ်ဝန်းသည့် မြေနေရာ တစုတစည်းတည်း ရရှိရန်သည် လည်း လိုအပ်ချက် တစ်ခုဖြစ်ကြောင်း ၎င်းကပြောသည်။

"မြို့စွန်ဘက်မှာ မြေကျယ်ကျယ်ရတဲ့ အတွက် တန်ဖိုးနည်းအိမ်ရာစီမံကိန်း တစ်ခုကိုလည်း စတင်နိုင်ဖို့စီစဉ် ဆောင်ရွက်နေပါတယ်။ ပြောချင်တာက မြေကျယ်ကျယ်ဝန်းဝန်းရှိမယ်၊ ဒီပေါ်မှာ တစုတစည်းတည်း တည်ဆောက်လို့ရရင် စီမံကိန်းအတွက် စီမံခန့်ခွဲရတာ လည်း လွယ်မယ်၊ ဘာဖြစ်လို့လဲဆိုတော့ လက်ရှိ အချိန်မှာ တန်ဖိုးနည်းအိမ်ရာကို ဝယ်ချင် တဲ့သူ အရမ်းများနေတယ်။ နေရေးမပြေ လည်တဲ့သူတိုင်းက ဝယ်ဖို့အားသန်နေတဲ့အတွက်လူတိုင်းနီးပါးအိမ်ရာပိုင်ဆိုင်နိုင်မှာ ဖြစ်ပါတယ်။ တန်ဖိုးနည်းဆိုပေမယ့်တည်ဆောက် မှု အရည်အသွေး (structural quality)ကို လုံးဝမလျှော့ချ ပဲ လုပ်ကိုင်ခဲ့တယ်လို့ ပြောချင်တယ်။ ဒါက ကိုယ့်နာမည်၊ကိုယ့် image ကို ထိန်း တဲ့ အဓိကအချက်ပါပဲ"ဟု ၎င်းကပြောသည်။

၎င်းက သက်တမ်းကြာမြင့်နေသည့် နိုင်ငံတော်ပိုင် အိမ်ရာစီမံကိန်းများအား အသစ်ပြန်လည်ဖော်ထုတ်မည်ဆိုသည် ကို ကြိုဆိုပြီး အဆင့်အတန်းမြင့် အထပ်မြင့် အိုးအိမ်တိုက်တာများ ပေါ်ပေါက်လာခြင်းက မြို့ပြဖွံ့ဖြိုးမှုကို တစ်ဖက်တစ်လမ်းမှ အထောက်အကူ ပြုသည်ဟု ထင်မြင်ကြောင်းလည်း ပြောကြားခဲ့သည်။

"အဆင့်အတန်းမီတဲ့ အိမ်ရာစီမံကိန်း တွေ ပေါ်ပေါက်လာမှာကို ကြိုဆိုပါတယ်၊ အဆင့်အတန်းမီတဲ့ တန်ဖိုးနည်းအိမ်ရာတွေကို နေရာ ကောင်းတွေမှာ ဆောက်ရမှာပါ။ အဟောင်းတွေကို ဖြိုဖျက်ပြီး အသစ်ပြန်လည်တည် ဆောက်လိုက်တဲ့အတွက် နေထိုင်သူတွေ အနေ နဲ့ living facility မြင့်သွားတဲ့အပြင် နိုင်ငံတော်မှာ အိမ်ရာမဲ့လူတန်းစားတွေ နည်းပါးလာမယ်၊ ဆင်းရဲမွဲတေမှုတွေ လျော့နည်း လာ မယ်။ ဒါ့ပြင် မြို့ပြ သာယာလှပရေးအတွက် အများကြီး အထောက်အကူပြုမှာ ဖြစ်ပါတယ်။ နိုင်ငံတော်စီမံကိန်းတွေဖြစ်တဲ့အတွက် ဒီကနေ အခွန်ဝင်ငွေတွေရလာမယ် စတဲ့ အကျိုးဖြစ်ထွန်းမှုတွေရှိတဲ့အတွက် ဒါတွေကို အများကြီးကြိုဆိုပါတယ်၊ တစ်နည်းအားဖြင့် မြေဈေး၊ တိုက်ခန်း ဈေးတွေကိုလည်း လျော့ပါးထိန်းချုပ်ပြီး သားဖြစ်သွားမယ်"ဟု ၎င်းက မြန်မာ တိုင်း(မ်)ကို ပြောကြားခဲ့သည်။

မင်္ဂလာတောင်ညွန့်မြို့နယ်အတွင်းရှိ ဆောက်လုပ်ရေးတစ်ခုမှ နာမည်ရ တည်ဆောက်သူတစ်ဦးကလည်း "ကျွန်တော်တို့ဆောက် လုပ်ရေးအနေနဲ့ တန်ဖိုးနည်း၊ တန်ဖိုးလတ်အိမ်ရာတွေ ဆောက်ဖို့ အဆိုပြုထားတာတွေ ရှိပါတယ်။ ဒဂုံဆိပ်ကမ်း၊ လှိုင်သာယာ၊ တောင်ဒဂုံမြို့နယ်တွေထဲက တစ်ခုုခုမှာ ရွေးချယ်ဆောက်လုပ်သွားဖို့ ရှိပါ တယ်။

"ကျွန်တော့အမြင်ကိုပြောရမယ်ဆို ရင် တန်ဖိုုးနည်းအိမ်ရာတွေများများ ပေါ်ထွက်ဖို့မှာ မြေဈေးထက်စာရင် နိုင်ငံ တော်ဘက်က ပံ့ပိုး မှုတွေလိုအပ်တယ် လို့ထင်တယ်။ ပုဂ္ဂလိကဘဏ်တွေကနေ hire purchase စနစ်နဲ့ချေးတဲ့အချိန် ကာလထက် ကာလပိုကြာကြာ ချေး နိုင်ဖို့ အစိုးရဘဏ်တွေဘက်ကနေ ချေးနိုင်ဖို့ သီးသန့်လုပ်ဆောင်ပေးမှ ပိုအဆင်ပြေ နိုင်မယ်လို့ ထင်တယ်။ သာမန်လူတန်း စားတွေ အနေနဲ့ သိန်း ၁၀၀ တိုက်ခန်း အတွက် တစ်လငါးသောင်း ဒါမှမဟုတ် တစ်သိန်းသွင်းရမယ်ဆိုရင်တောင် အခက်အခဲရှိတယ်လေ။ တန်ဖိုးနည်း အိမ်ရာတွေကို ဆောက်လုပ်နိုင်တယ် ဆိုရင်တောင် တိုက်ခန်းတန်ဖိုးကို ဆယ်နှစ်အရစ်ကျပေးရမယ်ဆိုရင် ဘယ်သူမှ ရောင်းနိုင်မှာ မဟုတ်ဘူးလို့ ထင်တယ်"ဟု ပြောသည်။

မြို့ရွာနှင့် အိုးအိမ်ဖွံ့ဖြိုးရေးဦးစီးဌာနမှ ဦးဆောင်၍ မြို့ပြဖွံ့ဖြိုးရေးစီမံချက်ဖြင့် ဆောင်ရွက်မည့်စီမံကိန်းများ အကောင် အထည်ဖော်မှု အရ ဗိုလ်တထောင် မြို့နယ်၊ (၅) ရပ်ကွက်ရှိ ပြည်တော်သာ အိမ်ရာသည်လည်း တစ်ခုအပါအဝင် ဖြစ်ပြီး ၎င်းအိမ်ရာကို ကွန်ဒို၊ သို့မဟုတ် အဆင့်မြင့်အိမ်ရာအဖြစ် ပြန်လည် ဆောက်လုပ်သွားမည်ဟု နေထိုင်သူများ က ပြောသည်။

"ပြန်ဆောက်မယ်ဆိုရင် လက်ရှိနေရ တာထက် ပိုကောင်းသွားမယ်လို့ ထင်ပါ တယ်။ တိုက်ခန်းတွေလည်း ပိုကျယ် ကျယ်ရလာနိုင်ပြီး ပတ်ဝန်းကျင်သန့်ပြန့် လာတာနဲ့အတူ လူနေထိုင်မှုအဆင့် လည်း မြင့်လာမယ်။ တည်ဆောက်ရေး စီမံကိန်းကတော့ အနည်းဆုံး တစ်နှစ်ခွဲ လောက်ကြာမယ်လို့ကြားတယ်"ဟု အသက် ၃၈ နှစ်အရွယ်ရှိ နေထိုင်သူ အမျိုးသားတစ်ဦးက ပြောသည်။

ပြည်တော်သာအိမ်ရာသည် သက် တမ်းအားဖြင့် နှစ်ပေါင်း ၆၀ ခန့် ရှိနေ သည်ဟုသိရပြီး အိမ်ရာတွင် လေးထပ် တိုက် စုစုပေါင်းခုနစ် လုံးပါရှိသည်။ အိမ်ရာတွင် နေထိုင်သူများကို မြို့ရွာနှင့် အိုးအိမ်ဖွံ့ဖြိုးရေးဦးစီးဌာနမှ အိမ်ရာ ပြန်လည်ဆောက်လုပ်ရန်အတွက် လွန်ခဲ့ သော နှစ်လခန့်က ခေါ်ယူအကြောင်း ကြားခဲ့ကြောင်း သိရသည်။ မူလအိမ်ရာ တွင် နေထိုင်သူများအား ၂၀၁၃ ခုနှစ်၊ မတ်လခန့်တွင် ပြောင်းရွှေ့ရန် အတွက် ညွှန်ကြားထားကြောင်း ၎င်းကပြောသည်။


Source : Myanmar TImes