မြန်မာနိုင်ငံ၏ အိမ်ခြံမြေအရောင်းအဝယ်ဈေးကွက် ရာခိုင်နှုန်း ၄၀ ခန့်ကျဆင်းနေပြီး လာမည့် ၂၀၂၀ အထိ ဆက်လက်ကျဆင်းနိုင်သော်လည်း ယင်းနောက်ပိုင်းမူ ပုံမှန်လည်ပတ်လာနိုင်ကြောင်း အိမ်ခြံမြေလုပ်ငန်းရှင်များက ခန့်မှန်းထားကြသည်။
“အငှားဈေးကွက်က အရမ်းကျသွားတယ်။ ရာခိုင်နှုန်း ၄၀ လောက် အခန်းဈေးတွေ လျော့သွားတယ်။ အရင် ၁၀ သိန်းနဲ့ ငှားနေတဲ့အခန်းဆို ငါးသိန်း၊ ခြောက်သိန်း အဲဒီလောက်အနေအထားတွေပဲရှိတယ်။ ခြုံပြီးပြောရမယ်ဆိုရင် ကွန်ဒိုမီနီယံက တစ်စတုရန်းပေကို အမေရိကန်ဒေါ်လာ ၁၀၀ ကနေပြီးတော့ ၄၀၀ အတွင်းပဲရှိတယ်။ ရန်ကုန်မှာ ရောင်းနေတာ။ မြေကတော့ ဘယ်နေရာပဲဖြစ်ဖြစ် လုံးချင်းတွေက ပြည်လမ်းမကြီးနားဆို ရာခိုင်နှုန်း ၄၀ လောက်ကျသွားတယ်။ ပြည်လမ်းမပေါ်မှာ အရင် ၁၂ သိန်းခွဲလောက်ရှိတာ။ အခုဆိုရင် ရှစ်သိန်းလောက်ပဲရှိတယ်” ဟု မြန်မာနိုင်ငံအိမ်ခြံမြေဝန်ဆောင်မှုအသင်း (MRESA) ဥက္ကဋ္ဌ ဦးခင်မောင်သန်းက ပြောကြားသည်။
မြန်မာနိုင်ငံ၏ အိမ်ခြံမြေဈေးကွက်မှာ ၂၀၁၄ ခုနှစ်နောက်ပိုင်းက အရောင်းအဝယ် စတင်ကျဆင်ခဲ့ခြင်း ဖြစ်သည်။ လက်ရှိတွင် ကျပ်သိန်းတစ်ထောင်အောက်တိုက်ခန်းနှင့် မြေကွက်များသာ အရောင်းအဝယ်ဖြစ်နေကြောင်း သိရသည်။
လက်ရှိတွင် ရန်ကုန်မြို့၌ စမ်းချောင်း၊ ကြည့်မြင်တိုင်၊ တောင်ဥက္ကလာပ၊ မရမ်းကုန်း၊ သာကေတမြို့နယ်များတွင် အိမ်ခြံမြေ အရောင်းအဝယ်ဖြစ်မှုများကြောင်း သိရသည်။
ယင်းသို့ကျဆင်းနေသည့် အိမ်ခြံမြေအရောင်းအဝယ်ဈေးကွက်မှာ လာမည့် ၂၀၂၀ အထိ ဆက်လက်ကျဆင်းနိုင်ကြောင်း မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များ အသင်းချုပ် အထွေထွေအတွင်းရေးမှူးချုပ် ဦးမျိုးမြင့်က ဧပြီ ၂၈ ရက်က ရန်ကုန်မြို့ CBC Ballroom တွင် B2B Magazine က ကျင်းပသည့် “B2B စကားဝိုင်း” တွင် ပြောကြားသည်။
“ကျွန်တော့်အမြင်ပြောရရင် လက်ရှိအစိုးရသက်တမ်းအတွင်းမှာတော့ အခက်အခဲ ရှိနိုင်ပါတယ်။ ပေါ်လစီအကူးအပြောင်းဖြစ်ရင်တော့ မဆိုးဘူးပေါ့။ ဒါပေမဲ့လည်း တစ်ချိန်တော့ ပြန်နိုးထလာမှာအမှန်ပါပဲ။ တောက်လျှောက်ကြီးတော့ မဆင်းပါဘူး။ လက်ရှိမှာတော့ ကျွန်တော်တို့ မျှော်မှန်းတာက ၂၀၂၀ အထိ ဒီအတိုင်းပဲ အခက်အခဲရှိနိုင်မယ်လို့ မှန်းပါတယ်” ဟု ဦးမျိုးမြင့်က ဆိုသည်။
အိမ်ခြံမြေဈေးကွက် ပြန်လည်နိုးထလာ နိုင်မည်လားဆိုပါက တဖြည်းဖြည်းနှင့် အကောင်းဘက်ကိုသွားမည်ဟု ယုံကြည်ကြောင်း Shweproperty.com မှ Founder ဖြစ်သူ ဦးကောင်းသူဝင်းက ပြောကြားသည်။
ယင်းကဲ့သို့ အိမ်ခြံမြေဈေးကွက် ပြန်လည်နိုးထလာနိုင်ရန်အတွက် အချက်လေးချက်ကို မြန်မာနိုင်ငံအိမ်ခြံမြေဝန်ဆောင်မှုအသင်း၊ အထွေထွေအတွင်းရေးမှူးချုပ်ဒေါ် မို့မို့အောင်က သုံးသပ်တင်ပြခဲ့သည်။
“အခွန်စနစ် လျှော့ချပေးဖို့ နံပါတ်တစ်အနေနဲ့ မြင်ပါတယ်။ နံပါတ်နှစ်ကတော့ ဘဏ်တိုးနှုန်းတွေကလည်း တခြားနိုင်ငံတွေနဲ့ညီတဲ့ ဘဏ်တိုးနှုန်းထားတွေဖြစ်သင့်တယ်လို့ မြင်ပါတယ်။ ပြီးတော့ ဌာနဆိုင်ရာတွေဖြစ်တဲ့ အိုး / အိမ်၊ စည်ပင်တို့ကလည်း စာရွက်စာတမ်းတွေမှာ အမည်ပေါက်ဖြစ်ဖို့ဆိုတာကို မြန်မြန်ဆန်ဆန်လေးလုပ်ဖို့လိုတယ်လို့ မြင်ပါတယ်။ စင်ကာပူမှာဆိုရင် နာမည်ပြောင်းတာ နှစ်ရက်ပဲကြာပါတယ်။ အမည်ပေါက်ဖြစ်ဖို့ ခုနစ်ရက်ပဲကြာတယ်။ ကျွန်မတို့ နိုင်ငံက ၈၈ ရက်လို့တော့ ပြောတယ်။ ဒါပေမဲ့ တကယ်တမ်းကျတော့ အိမ်ခြံမြေလုပ်တဲ့သူတွေက နားလည်ပါတယ်။ ၈၈ ရက်ဖြစ်ရဲ့လားဆိုတာ။ နိုင်ငံခြားသားရင်းနှီးမြှုပ်နှံဖို့ဆိုတာကလည်း ဒီဥပဒေ ခိုင်မာရဲ့လားပေါ့။ ဒီဥပဒေတွေ ခိုင်မာမှ နိုင်ငံခြားသားရင်းနှီးမြှုပ်နှံသူတွေက လာမှာဖြစ်တယ်။ ကျွန်မတို့ နိုင်ငံအတွက် ဥပဒေကလည်း အရေးကြီးတဲ့အချက်ဖြစ်နေပါတယ်။ Real Estate Law ကလည်း အရေးကြီးပါတယ်။ အဲဒီအတွက်ကြောင့် ဒီဟာတွေသာ နိုင်ငံတော်ကလည်း ပံ့ပိုးမယ်ဆိုရင် အိမ်ခြံမြေဈေးကွက်က အရင်လို တစ်ဟုန်ထိုးမဟုတ်တောင် ပုံမှန်လည်ပတ်မယ်လို့မြင်ပါတယ်။ ၂၀၂၀ ကျရင်တော့ ပုံမှန်လည်ပတ်တဲ့အနေအထားကို ရောက်မယ်လို့မျှော်လင့်ပါတယ်” ဟု ဒေါ်မို့မို့အောင်က ပြောကြားသည်။
Ref & Photo Credit : Eleven Media Group
Posted By : Sint Sint (ShweProperty.com)
အိမ်ခြံမြေပြပွဲများ
နောက်ဆုံးရ သတင်းများ
ဝယ်ရန်
ငှားရန်
စီမံကိန်း အသစ်များ
အခြားအိမ်ခြံမြေများ
