အိမ်ပြင်ဖို့အစီအစဉ်ကလည်းရှိနေတယ်။ ပိုက်ဆံကိုလည်း ချွေတာသုံးရမယ်ဆိုရင် ကိုယ်သတိမထားမိဘဲ ပိုက်ဆံအကုန်အကျများနိုင်တဲ့နေရာတွေကို သိထားမှသာ အိမ်ပြင်တဲ့အခါ ပိုက်ဆံချွေတာနိုင်မှာဖြစ်ပါတယ်။ ဥပမာ မီးဖိုချောင်ကို ပိုကောင်းအောင်ပြင်မယ်ဆိုရင် စျေးချိုတဲ့မီးဖိုချောင်သုံးပစ္စည်းတွေနဲ့ဗီရိုတွေကို ရွေးဝယ်သင့်ပါတယ်။ ၀ယ်တဲ့အခါမှာလည်း သမားရိုးကျပရိဘောဂအရောင်းဆိုင်တွေမှာထက် အရည်သွေးကောင်းပြီး စျေးသက်သာတဲ့ဗီရိုတွေကို အွန်လိုင်းမှာ ရှာဝယ်ကြည့်တာမျိုးလုပ်ပါ။ အလားတူပဲ အိမ်ပြင်တဲ့အခါ ငွေချွေတာနိုင်မယ့်တခြားနည်းလမ်းတွေကိုလည်း သိထားသင့်ပါတယ်။
 
၁။ အကုန်ခံမယ့်ငွေပမာဏတစ်ခုသတ်မှတ်ထားပြီး ပိုမသုံးမိပါစေနဲ့။
 
အိမ်ပြင်တဲ့အခါ အိမ်ပိုင်ရှင်တွေလုပ်မိတတ်တဲ့အကြီးဆုံးအမှားတွေထဲကတစ်ခုက ကိုယ်သုံးမယ့်ငွေပမာဏကို မသတ်မှတ်ထားမိတာပါပဲ။ ဒီလိုမသတ်မှတ်ထားမိတဲ့အခါ မူလကရည်ရွယ်ထားတာထက် ပိုပြီးအကုန်အကျများသွားတတ်ပါတယ်။ ကိုယ်ဘယ်လောက်တတ်နိုင်လဲဆိုတာ သေချာစဉ်းစားပြီး အိမ်ပြင်မယ့်ပရောဂျက်အတွက် ကုန်ကျစရိတ်တစ်ခုကို တိတိကျကျသတ်မှတ်လိုက်ပါ။
 
၂။ ပစ္စည်းကုန်ကျစရိတ်တွေကို အတတ်နိုင်ဆုံးချွေတာပါ။
 
အိမ်ပိုင်ရှင်တွေလုပ်မိတတ်တဲ့ နောက်ထပ်အမှားတစ်ခုက ပစ္စည်းကုန်ကျစရိတ်ကို အများကြီးသုံးမိတာပါ။ ဥပမာ တစ်ခါသုံးပြီးသား ဆောက်လုပ်ရေးပစ္စည်းတွေကိုဝယ်သုံးတာက ကုန်ကျစရိတ်သက်သာစေပါတယ်။ တစ်ခါသုံးပြီးသားပစ္စည်းတွေထဲမှာလည်း အရည်အသွေးကောင်းနေသေးတာတွေရှိတာကြောင့် ပစ္စည်းကောင်းကို စျေးချိုချိုနဲ့ ရနိုင်ပါလိမ့်မယ်။
 
၃။ မဖြစ်မနေသုံးရမယ့်ပစ္စည်းတွေအတွက် စျေးလျှော့တဲ့အချိန်ကိုစောင့်ပါ။
 
အိမ်ပြင်တဲ့အခါ မဖြစ်မနေသုံးရမယ့်ပစ္စည်းတွေဟာ အမြဲစျေးကြီးနေမှာ မဟုတ်ပါဘူး။ နှမ်းဖတ်ကျောက်မီးဖိုချောင်စားပွဲမျက်နှာပြင်ကို စျေးပေါလို့ဝယ်သုံးလိုက်မယ့်အစား အရည်အသွေးကောင်းတဲ့ပစ္စည်းတွေ စျေးချရောင်းတဲ့အချိန်ကို စောင့်လိုက်ပါ။ တခြားမီးဖိုချောင်သုံးပစ္စည်းတွေ၊ ပြတင်းပေါက်ဘောင်တွေနဲ့ အိမ်ပြင်ရာမှာ အသစ်လဲဖို့လိုတဲ့အရာမှန်သမျှကိုလည်း အလားတူပဲ စိတ်ရှည်ရှည်စောင့်ဆိုင်းဝယ်ယူပါ။
 
၄။ စရိတ်မှန်သမျှကို ငွေသားနဲ့ချေပါ။
 
အိမ်ပြင်တဲ့အချိန်မှာ စရိတ်ချွေတာချင်ရင် စရိတ်မှန်သမျှကို ငွေသားနဲ့ချေတဲ့နည်းက လက်တွေ့မှာ တကယ်အသုံးတည့်တာကို တွေ့ရပါလိမ့်မယ်။ ပစ္စည်းစရိတ်တွေကိုရော လက်သမားခတွေကိုပါ ငွေသားနဲ့ပေးချေသင့်တဲ့ အကြောင်းရင်းနှစ်ခုရှိပါတယ်။ ပထမတစ်ခုက အကြွေးဝယ်ကတ်နဲ့ဝယ်တာမဟုတ်လို့ အတိုးငွေထပ်ကုန်တော့မှာ မဟုတ်ပါဘူး။ နောက်တစ်ခုကတော့ လက်ငင်းငွေချေတဲ့အတွက် လက်သမားနဲ့ကန်ထရိုက်က ကျသင့်တာထက် လျှော့ပေးသွားတာမျိုးလည်း ရှိတတ်ပါတယ်။



၅။ ပြီးမယ့်ရက်ကို အလျင်မလိုပါနဲ့။
 
တစ်ခါတလေ အိမ်ပြင်တာကို မြန်မြန်ပြီးချင်စိတ်ဖြစ်မိတတ်ကြပါတယ်။ ဒီလိုစိတ်မရှည်တာဟာ အမှားကြီးတစ်ခုပါပဲ။ အလျင်လိုပြီး အကြွေးဝယ်ကတ်နဲ့ငွေချေလိုက်တာမျိုးလုပ်မယ့်အစား စိတ်ရှည်ရှည်ထားပါ။ စိတ်ရှည်ရှည်စောင့်ဆိုင်းရင် အကုန်အကျနည်းရမယ့်အစား စိတ်လောမိရင် ပစ္စည်းတွေအတွက်ရော၊ ကန်ထရိုက်ဖိုးတွေပါ မကုန်သင့်ဘဲ အများကြီးအကုန်ခံနေရပါလိမ့်မယ်။
 
၆။ ကိုယ်တိုင်လုပ်ကြည့်ပါ။
အကြီးစားအိမ်ပြင်ဆင်မှုတွေကို မတတ်နိုင်ပေမယ့် အမျိုးသားအများစုက တချို့အသေးစားပြင်ဆင်မှုလေးတွေကိုတော့ လုပ်တတ်ကြပါတယ်။ လွယ်တဲ့အလုပ်လေးတွေကို သူများကို ပိုက်ဆံပေးပြီး လုပ်ခိုင်းနေမယ့်အစား ကိုယ်တိုင်လုပ်ကြည့်လိုက်ရင် ငွေချွေတာနိုင်ပါလိမ့်မယ်။
 
၇။ အတတ်နိုင်ဆုံးပြန်သုံးပါ။
 
ပြန်သုံးလို့ရမယ့်ပစ္စည်းတွေကို အလဟဿအဖြစ်မခံဘဲ သုံးလို့ရတာတွေကို အတတ်နိုင်ဆုံးပြန်သုံးပါ။ သတ်မှတ်ထားတဲ့ကုန်ကျစရိတ်ကို မကျော်ချင်ဘူး ဒါမှမဟုတ် ဘဏ်ထဲကထပ်မထုတ်ချင်ဘူးဆိုရင်တော့ နည်းလမ်းကောင်းတစ်ခုပါပဲ။ ဗီရိုနဲ့တချို့အသုံးအဆောင်ပစ္စည်းတွေက အသစ်ဝယ်စရာမလိုဘဲ ပြန်သုံးလို့ရကောင်းရနိုင်ပါတယ်။
 
၈။ ပစ္စည်းတွေစျေးမချခင်မှာ ကြီးကြီးမားမားမဝယ်မိပါစေနဲ့။
 
ပြင်ဆင်မွမ်းမံထားတဲ့မီးဖိုချောင်ထဲမှာ တန်ဖိုးကြီးပစ္စည်းတွေကို အသစ်ဝယ်ထည့်မယ်ဆိုရင် စျေးချတဲ့အချိန်ကို စောင့်ဆိုင်းသင့်ပါတယ်။ အချိန်ပေးရမယ်ဆိုတာမှန်ပေမယ့် ချက်ချင်းကြီးတွေ့ကရာတော့ ကောက်မဝယ်သင့်ပါဘူး။ ရက်ကြီးအခါကြီးမှာ လျှော့စျေးပေးတဲ့အချိန်ကိုတော့ တွက်ကြည့်လို့ရပါတယ်။ ဒီနည်းက ပိုက်ဆံအကုန်အကျအများကြီး သက်သာစေနိုင်ပါတယ်။
 
၉။ ကန်ထရိုက်ကောင်းကို သေချာစုံစမ်းပါ။
 
အိမ်ပြင်တယ်ဆိုကတည်းက အိမ်ကိုအလှဆုံးဖြစ်စေချင်မှာ အသေအချာပါပဲ။ ဒါနဲ့ပဲ စျေးအကြီးဆုံးနဲ့ အကောင်းဆုံးကန်ထရိုက်ကို ပိုက်ဆံအများကြီးအကုန်အကျခံငှားစရာမလိုပါဘူး။ ဘယ်ကန်ထရိုက်က ဘယ်လိုကောင်းတယ်ဆိုတာ လိုက်စုံစမ်းကြည့်ပါ။ ဒါမှသာ လက်ရာလည်းကောင်းပြီး စျေးလည်းမကြီးတဲ့ ကန်ထရိုက်ကို ရနိုင်မှာပါ။
 
၁၀။ အဟောင်းတွေကို ပြန်ရောင်းပါ။
 
ပစ္စည်းတွေ အသစ်လဲမယ်ဆိုရင် သုံးလို့ရသေးတဲ့ပစ္စည်းအဟောင်းတွေကို ပြန်ရောင်းကြည့်ပါ။ ရေခဲသေတ္တာနဲ့ မီးဖိုလိုပစ္စည်းတွေကို အသစ်ဝယ်ဖို့စိတ်ကူးရှိတယ်ဆိုရင် တစ်ခါသုံးပြီးသားပစ္စည်းတွေရောင်းတဲ့ အွန်လိုင်းဝက်ဆိုက်ဒ်တွေမှာ ပြန်ရောင်းပါ။ ၀ယ်ချင်တဲ့လူရှိရင်လည်း ရှိနေမှာပါ။ အဟောင်းပြန်ရောင်းတယ်ဆိုပေမယ့် သုံးလို့ရနေသေးတဲ့ပစ္စည်းတွေဖြစ်တာကြောင့် ရောင်းထွက်သွားတယ်ဆိုရင် တစ်ဖက်မှာကုန်ကျနေတဲ့အိမ်ပြင်စရိတ်လည်း သက်သာသွားနိုင်ပါတယ်။
 
အခုဖော်ပြသွားတဲ့အချက် ၁၀ ချက်ဟာ လက်ရှိမဟုတ်ရင်တောင် နောက်အိမ်ပြင်ဖို့ရှိလာခဲ့ရင် အသုံးတည့်နိုင်ပါတယ်။ တကယ်အသုံးချချင်စိတ်ရှိဖို့နဲ့ တိတိကျကျလိုက်နာနိုင်ဖို့တော့လိုပါတယ်။ လျှော့စျေးချရောင်းတဲ့အချိန်တွေကို ကောင်းကောင်းအသုံးချပါ။ လက်ရာကောင်းပြီး စျေးမကြီးတဲ့ကန်ထရိုက်ကို ငှားပါ။ အိမ်ပြင်တဲ့နေရာမှာ ပိုက်ဆံချွေတာနိုင်ဖို့အတွက် တခြားအချက်တွေကိုလည်း နည်းနည်းမှန်မှန်အသုံးပြုကြည့်သင့်ပါတယ်။
 
လေ့လာမှတ်သားစရာ အိမ်ခြံမြေဆောင်းပါးများ

ကုန်ကျစရိတ်နည်း အိမ်အလှဆင်နည်းများ

ကိုယ့်အခန်းကို နေချင်စဖွယ်ဖြစ်အောင် ဘယ်လို DECORATION လုပ်ကြမလဲ

လှပသေသပ်တဲ့ အိပ်ခန်းတစ်ခန်းရရှိဖို့ လိုအပ်တဲ့ အခြေခံအချက်တွေက ဘာတွေလဲ

သင့်ရဲ့အိမ်လေးကို အလွယ်ကူဆုံး အလှဆင်နိုင်မည့် နည်းလမ်းကောင်းများ

Credit By: mm-homedecor
Posted By : Ra Wai (ShweProperty.com)